ନୂଆଦିଲ୍ଲୀ,୨୭ା୮: ଦିଲ୍ଲୀ ବିଧାନସଭାର ସ୍ବତନ୍ତ୍ର ଅଧିବେଶନରେ ମୁଖ୍ୟମନ୍ତ୍ରୀ ତଥା ଆମ୍ ଆଦ୍ମୀ ପାର୍ଟି (ଏଏପି) ଆବାହକ ଅରବିନ୍ଦ କେଜ୍ରିଓ୍ବାଲ୍ ଶୁକ୍ରବାର ଭାଜପା ଉପରେ ଜୋର୍ଦାର ବର୍ଷିଛନ୍ତି। ନିର୍ବାଚିତ ସରକାରଗୁଡ଼ିକୁ ଭାଙ୍ଗିଦେଉଥିବା ଭାଜପାକୁ ସେ ସିରିଏଲ୍ କିଲର ବୋଲି କହିଛନ୍ତି। ଗୈରିକ ଦଳ ଷଡ଼ଯନ୍ତ୍ର କରି ବିରୋଧୀ ଦଳ ଶାସିତ ଏକାଧିକ ରାଜ୍ୟ ସରକାରକୁ ଭାଙ୍ଗିଥିବା ଏଏପି ନେତା ଅଭିଯୋଗ କରିଛନ୍ତି।
ନୀତି ଉଲ୍ଲଂଘନ ଅଭିଯୋଗରେ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଘରେ ସିବିଆଇ ଚଢ଼ାଉ ପରେ କେଜ୍ରିଓ୍ବାଲ ଭାଜପା ଉପରେ ଆକ୍ରମଣ ଆରମ୍ଭ କରିଦେଇଛନ୍ତି। ଜିଏସ୍ଟି ଏବଂ ପେଟ୍ରୋଲ, ଡିଜେଲ ଦର ବଢ଼ାଇ ସଂଗ୍ରହ କରୁଥିବା ଅର୍ଥରେ ଭାଜପା ଅନ୍ୟ ଦଳରୁ ବିଧାୟକ କିଣୁଛି। ବର୍ତ୍ତମାନ ସୁଦ୍ଧା ଏହି ଦଳ ୨୭୭ ବିଧାୟକ କିଣିଲାଣି। ଯଦି ଦଳ ସେମାନଙ୍କୁ ୨୦ କୋଟି ଲେଖାଏ ଟଙ୍କା ଦେଇଥାଏ ତେବେ ବିଧାୟକ କିଣିବାରେ ୫,୫୦୦ କୋଟି ଟଙ୍କା ବ୍ୟୟ ହୋଇଛି। ସେଥିପାଇଁ ଦରଦାମ୍ ହୁହୁ ହୋଇ ବଢ଼ିଚାଲିଛି। ଭାଜପା ଇତିମଧ୍ୟରେ ଗୋଆ, କର୍ନାଟକ, ମହାରାଷ୍ଟ୍ର, ଆସାମ, ମଧ୍ୟପ୍ରଦେଶ, ବିହାର, ଅରୁଣାଚଳପ୍ରଦେଶ, ମଣିପୁର ଓ ମେଘାଳୟ ସରକାର ଭାଙ୍ଗିଦେଇଛି। ଲୋକେ ସରକାରଙ୍କୁ ନିର୍ବାଚନ କରୁଛନ୍ତି, ଭାଜପା ତାହାକୁ ଭାଙ୍ଗିଦେଉଛି। ଭାଜପା ଶାସିତ ଗୁଜରାଟରେ ଦଳର ସ୍ଥିତି ଭଲ ନ ଥିବାରୁ ଆଗାମୀ ନିିର୍ବାଚନକୁ ଦୃଷ୍ଟିରେ ରଖି ଏଏପି ନେତାଙ୍କ ଘରେ ଚଢ଼ାଉ କରାଯାଉଥିବା ସେ ଅଭିଯୋଗ କରିଛନ୍ତି।