ଭୁବନେଶ୍ବର,୬ା୯(ବ୍ୟୁରୋ):ଭାଜପା ରାଜ୍ୟ ପ୍ରଭାରୀ ସୁନୀଲ ବଂଶଲ ଦାୟିତ୍ୱ ପାଇବା ପରେ ପ୍ରଥମ ଥର ଲାଗି ୨ ଦିନିଆ ଓଡ଼ିଶା ଗସ୍ତରେ ଆସି ସୋମବାର ଭୁବନେଶ୍ୱରରେ ପହଞ୍ଚିଛନ୍ତି। ବିମାନବନ୍ଦରଠାରେ ବଂଶଲ ପହଞ୍ଚିବା ପରେ ରାଜ୍ୟ ଭାଜପା ପକ୍ଷରୁ ତାଙ୍କୁ ବିପୁଳ ସ୍ବାଗତ କରାଯାଇଛି। ପ୍ରଭାରୀ ରୂପେ ଦାୟିତ୍ୱ ନେବାପରେ ବଂଶଲ ଭୁବନେଶ୍ୱରରେ ଦଳୀୟ ନେତାଙ୍କ ସହ ବୈଠକ ଆରମ୍ଭ କରିଦେଇଛନ୍ତି। ୨୦୨୪ ନିର୍ବାଚନ ପାଇଁ ପାଗ ଭିଡ଼ିବାକୁ ବଂଶଲଙ୍କ ଉପରେ ଭାଜପା କେନ୍ଦ୍ରୀୟ ନେତାମାନେ ଭରସା କରିଥିବା କୁହାଯାଉଛି।
ବିମାନବନ୍ଦରରୁ ସିଧା ଦଳୀୟ କାର୍ଯ୍ୟାଳୟଠାରେ ପହଞ୍ଚି ଅପରାହ୍ନରେ ଦଳର ରାଜ୍ୟ ସଭାପତି ସମୀର ମହାନ୍ତି, ସଙ୍ଗଠନ ମନ୍ତ୍ରୀ ଏବଂ ରାଜ୍ୟ ସାଧାରଣ ସମ୍ପାଦକଙ୍କ ସହ ପ୍ରାଥମିକ ଆଲୋଚନା କରିଛନ୍ତି। ଦୀର୍ଘ ସମୟ ଆଲୋଚନା ଭିତରେ ସେ ଦଳୀୟ ନେତାମାନେ ସଙ୍ଗଠନ ଆଗକୁ ବଢ଼ିବାରେ ଉପୁଜୁଥିବା ସମସ୍ୟା ସମ୍ପର୍କରେ କହିଛନ୍ତି। ଆଗକୁ ଦଳର କାର୍ଯ୍ୟକ୍ରମ କିପରି ଶାସକ ଦଳ ବିରୋଧରେ ତୀବ୍ର ହେବ ଏବଂ କେନ୍ଦ୍ରୀୟ ନେତାଙ୍କ ଆଭିମୁଖ୍ୟ ବଦଳିବାର ଆବଶ୍ୟକତା ଥିବା ନେଇ ଆଲୋଚନା ହୋଇଛି। ପର୍ଯ୍ୟାୟକ୍ରମେ କେତେଜଣ ନେତାଙ୍କୁ ମଧ୍ୟ ସେ ଏକୁଟିଆ ଭେଟି କିଛି କଥା ହୋଇଛନ୍ତି। ସାରେ ବଂଶଲ ପୁରୀ ଗସ୍ତ କରିଥିବା ବେଳେ ବିଳମ୍ବିତ ରାତିରେ ସେଠାରୁ ଫେରିଛନ୍ତି। ସେ ଦଳୀୟ କାର୍ଯ୍ୟାଳୟଠାରେ ରାତ୍ରିଯାପନ କରିବା ସହ ମଙ୍ଗଳବାର ଜିଲା ସଭାପତି, ଜିଲା ପ୍ରଭାରୀ, ସମସ୍ତ ପଦାଧିକାରୀ ଏବଂ ମୋର୍ଚ୍ଚା ସଭାପତିମାନଙ୍କ ସହିତ ଏକ ବୈଠକ କରିବେ। ଜିଲାସ୍ତରରେ ଦଳର ଭବିଷ୍ୟତ ରଣନୀତି କିପରି ହେବ ସେନେଇ ସେ ଆଲୋଚନା ହେବ। ଏହାସହ କେଉଁସବୁ ପ୍ରସଙ୍ଗରେ ଆଗକୁ ଦଳ ରାସ୍ତାକୁ ଓହ୍ଲାଇବ ଏବଂ କର୍ମୀମାନଙ୍କୁ ବାନ୍ଧି ରଖିବା ପାଇଁ କି ପ୍ରକାର ସମସ୍ୟା ହେଉଛି ସେନେଇ ଧ୍ୟାନଦେବାକୁ କୁହାଯାଇଛି। ବଂଶଲ ମଙ୍ଗଳବାର ଉକ୍ତ ବୈଠକ ଶେଷ କରିବା ପରେ ପୁଣି ଦିଲ୍ଲୀ ଫେରିଯିବା କାର୍ଯ୍ୟକ୍ରମ ରହିଛି। ସେ ଦିଲ୍ଲୀ ଫେରିବା ପରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେ.ପ.ି ନଡ୍ଡାଙ୍କୁ ରିପୋର୍ଟ ପ୍ରଦାନ କରିବେ। ଆଗକୁ ନଡ୍ଡା ଓଡ଼ିଶା ଆସିବା କାର୍ଯ୍ୟକ୍ରମ ଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି। ଏହା ପୂର୍ବରୁ ବଂଶଲ ନଡ୍ଡାଙ୍କ ଗସ୍ତ କିପରି ସଫଳ ହେବ ସେନେଇ ମଧ୍ୟ ରଣନୀତି ପ୍ରସ୍ତୁତ କରୁଥିବା କୁହାଯାଉଛି। ତେବେ ନିକଟରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଓଡ଼ିଶା ଗସ୍ତରେ ଆସିଥିଲେ। ତାଙ୍କ ଗସ୍ତ ସମୟରେ ଶାହା ଦଳର ବିଭିନ୍ନ ବର୍ଗର ନେତାଙ୍କ ସହ ଆଲୋଚନା କରିଥିବା ବେଳେ ଏକାଧିକ କାର୍ଯ୍ୟକ୍ରମରେ ଯୋଗଦେଇଥିଲେ। ୨୦୨୪ରେ ଓଡ଼ିଶାରେ ନିଶ୍ଚୟ ଭାଜପା ସରକାର କରିବ ବୋଲି ସେ କହିଥିଲେ। ତାଙ୍କ ଗସ୍ତ ଶେଷକରି ସେ ଫେରିବା ପରେ ଦଳର ପ୍ରଭାରୀ ପଦରେ ପରିବର୍ତ୍ତନ ହୋଇ ବଂଶଲଙ୍କୁ ଦାୟିତ୍ୱ ଦିଆଯାଇଛି।