ସରଣ୍ଡା,୨୫ା୩(ଡି.ଏନ୍.ଏ.): ବରଗଡ଼ ଜିଲା ଅତାବିରା ଏନ୍ଏସି ନିର୍ବାଚନ ଯେତେ ପାଖେଇ ଆସୁଛି ସେତେ ରାଜନୈତିକ ତତ୍ପରତା ଦେଖିବାକୁ ମିଳୁଛି। ସହର ସାରା ଖେଳି ଗଲାଣି ଦଳୀୟ ପତାକା ଓ ପୋଷ୍ଟର। ବିଜେଡି ଓ କଂଗ୍ରେସ ଜୋର୍ଦାର୍ ପ୍ରଚାର ଜମାଇଥିବା ବେଳେ ଶନିବାର ଭାଜପା ଡୋର ଟୁ ଡୋର ପ୍ରଚାରକୁ ଗୁରୁତ୍ୱ ଦେଇଛି। ବିଗତ ଦୁଇ ଏନ୍ଏସି ନିର୍ବାଚନରେ ନୈରାଶ୍ୟଜନକ ସ୍ଥିତି ପରେ ଚଳିତ ଥର ଖାତା ଖୋଲିବାକୁ ଭାଜପା କସରତ ଆରମ୍ଭ କରିଦେଇଛି। ଭାଜପା ନଗରପାଳ ପ୍ରାର୍ଥିନୀ ଲକ୍ଷ୍ମୀ ବେହେରା ଓ ୪ ନମ୍ବର ଓ୍ବାର୍ଡର କାଉନସିଲର ପ୍ରାର୍ଥିନୀ ପଦ୍ମା ବାଗ୍ ଘର ଘର ବୁଲୁଛନ୍ତି। କେନ୍ଦ୍ର ସରକାର ବିଭିନ୍ନ ଯୋଜନା ପ୍ରଣୟନ କରି ବିକାଶ ଚାହୁଁଥିବା ବେଳେ ବିଗତ ୧୦ ବର୍ଷ ଏନ୍ଏସି ଶାସନରେ ଉଭୟ କଂଗ୍ରେସ ଓ ବିଜେଡି ସ୍ଥାନୀୟ ଅଞ୍ଚଳବାସୀଙ୍କ ସର୍ବନିମ୍ନ ମୌଳିକ ସୁବିଧା ଯୋଗାଇବାରେ କିଭଳି ବିଫଳ ହୋଇଛି ତାକୁ ଲୋକଙ୍କୁ ବୁଝାଉଛନ୍ତି l ନିଜ ସପକ୍ଷରେ ଭୋଟରଙ୍କୁ ନେବା ପାଇଁ ଆପ୍ରାଣ ଚେଷ୍ଟା ଲଗାଇଛି ଭାଜପା। ତେବେ ବିଗତ ୧୦ବର୍ଷ ଏନ୍ଏସି ଶାସନରେ ଖାତା ଖୋଲି ପାରି ନ ଥିବା ଭାଜପା କିଭଳି ନିଜ ସପକ୍ଷରେ ମତଦାତାଙ୍କୁ ନେଇ ସ୍ଥିତି ସଜାଡୁଛି ତାହା ଦେଖିବାକୁ ବାକି ରହିଲା।