ନୂଆଦିଲ୍ଲୀ,୬।୧(ପି.ଟି.): ଦେଶରେ ଥିବା ଜୈନ ଧର୍ମର ତୀର୍ଥକ୍ଷେତ୍ରଗୁଡ଼ିକୁ ବ୍ୟବସାୟୀକରଣ କରିବା ଲାଗି ଭାଜପା ଉଦ୍ୟମ ଚଳାଇଥିବା ଗୁରୁବାର କଂଗ୍ରେସ ଅଭିଯୋଗ କରିଛି। ଗୈରିକ ଦଳର ଏଭଳି ଉଦ୍ୟମ ଜୈନ ସମ୍ପ୍ରଦାୟର ଭାବାବେଗକୁ ଆଘାତ ଦେଇଥିବା ବିରୋଧୀ ଦଳ କହିଛି। ଜୈନ ଧର୍ମର ପବିତ୍ର ସାମ୍ମେଦ ଶିଖରଜୀ ପର୍ବତକୁ ଅକ୍ତିଆର କରିବା ଲାଗି ଝାଡ଼ଖଣ୍ଡ ସରକାର ବିଜ୍ଞପ୍ତି ଜାରି କରିଛନ୍ତି, ଯାହା ପୂର୍ବର ରଘୁବର ଦାସଙ୍କ ନେତୃତ୍ୱାଧୀନ ଭାଜପା ସରକାର ସମୟରେ ହୋଇଥିଲା। ଉକ୍ତ ବିଜ୍ଞପ୍ତିକୁ ତୁରନ୍ତ ପ୍ରତ୍ୟାହାର କରିନେବା ଲାଗି କଂଗ୍ରେସ ଦାବି କରିଛି। ସାମ୍ମେଦ ଶିଖରଜୀ ଭଳି ଗୁଜରାଟର ଶତ୍ରୁଞ୍ଜୟ ପାହାଡ଼, ମାଉଣ୍ଟ ଗିର୍ନାରକୁ ମଧ୍ୟ ବ୍ୟବସାୟୀକରଣ କରିବାକୁ ଭାଜପା ଉଦ୍ୟମ ଚଳାଇଥିବା କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ପ୍ରଦୀପ ଜୈନ ଆଦିତ୍ୟ ଏବଂ ଦଳ ମୁଖପାତ୍ର ପଓ୍ବନ ଖେରା କହିଛନ୍ତି। କଂଗ୍ରେସ ଦେଶର ସମସ୍ତ ଧର୍ମୀୟ ସ୍ଥଳକୁ ସୁରକ୍ଷା ଦେବା ଲାଗି ପ୍ରତିଶ୍ରତିବଦ୍ଧ ବୋଲି ସେମାନେ କହିଛନ୍ତି। ପରିବେଶ ପର୍ଯ୍ୟଟନ ଲାଗି ଝାଡ଼ଖଣ୍ଡର ପବିତ୍ର ପର୍ବତକୁ ଅଧିଗ୍ରହଣ ଲାଗି ପୂର୍ବର ଭାଜପା ସରକାରଙ୍କ ନିଷ୍ପତ୍ତି ବିରୋଧରେ ସମୁଦାୟ ଜୈନ ସମ୍ପ୍ରଦାୟ ରାସ୍ତାକୁ ଓହ୍ଲାଇଛନ୍ତି। ଭାଜପା ଏବଂ ଆର୍ଏସ୍ଏସ୍ ଜୈନ ସମାଜକୁ ପ୍ରତାରିତ କରିଥିବା କଂଗ୍ରେସ ଅଭିଯୋଗ କରିଛି।