କୋଲକାତା,୧୮ ।୧୦: ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି(ଭଜପା) ଏତେ ଭଲ ପ୍ରଦର୍ଶନ କରି ନ ଥିଲେ ବି ଅନ୍ୟ ନିର୍ବାଚନରେ ଅପେକ୍ଷାକୃତ ଭଲ ପ୍ରଦର୍ଶନ କରିଥିବା ଦେଖାଯାଇଛି । ଯେଉଁଠି ଦିନେ ତ୍ରୁଣ ମୂଳ କଂଗ୍ରେସ(ଟିଏମସି)ର ଦବଦବା ଥିଲା ସେଠି ଭାଜପା ବାଜିମାରିଛି । ତେଣୁ ରାଜ୍ୟରେ ଭାଜପାକୁ ମଜଭୁତ କରିବାକୁ ଦଳ ସୁପ୍ରିମୋ ଲଗାତାର ଭାବେ ବଡ ବଡ ପଦକ୍ଷେପ ନେଉଥିବା ଦେଖାଯାଇଛି ।
ଏହି କ୍ରମରେ ଏବେ ପାର୍ଟି ହାଇକମାଣ୍ଡ ଏକ କୋର କମିଟି ଗଠନ କରିଛନ୍ତି । ସୋମବାର ଗଠନ କରାଯାଇଥିବା ଏହି କୋର କମିଟିରେ ବଲିଉଡ ଅଭିନେତା ତଥା ରାଜନେତା ମିଥୁନ ଚକ୍ରବର୍ତ୍ତିଙ୍କୁ ସାମିଲ କରାଯାଇଛି । ଏହା ସମସ୍ତଙ୍କୁ ଚମକାଇ ଦେଇଛି । ଦଳର ଏହି ନିଷ୍ପତ୍ତି ପରେ ସବୁଠି ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି ।
ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ସୋମବାର ଏକ ବୈଠକ ପରେ ପଶ୍ଚିମବଙ୍ଗ କୋର କମିଟିର ଘୋଷଣା କରିଥିଲେ । ଏହି କୋର କମିଟିରେ ମିଥୁନଙ୍କ ନାମ ସମସ୍ତଙ୍କୁ ଚମକାଇ ଦେଇଥିଲା । ଏଥର ଏହି କୋର କମିଟିରୁ ପୂର୍ବତନ ରାଜ୍ୟ ସଭା ଏମପି ରୂପା ଗାଙ୍ଗୁଲିଙ୍କୁ ବାହାର କରି ଦିଆଯାଇଛି । ଏହି କମିଟିରେ ୨୦ ଜଣ ସଦସ୍ୟଙ୍କୁ ସାମିଲ କରାଯାଇଛି । ଏଥିରେ ଅମିତ ମାଲବିୟ ଓ ଆଶା ଲକଡା ସାମିଲ ଅଛନ୍ତି । ସୁକାନ୍ତ ମଜୁମଦାର ଓ ଶୁଭେନ୍ଦୁ ଅଧିକାରୀ ରାଜ୍ୟ ଅଧ୍ୟକ୍ଷ ଓ ଏଲଓପି ପଦରେ ରହିବେ ।
