ଚଣ୍ଡିଗଡ଼,୨୮।୯ : ଭାଜପାର ପୁରୁଣା ସହଯୋଗୀ ଭାବେ ପରିଚିତ ଶିରୋମଣି ଅକାଳି ଦଳ (ଏସ୍ଏଡି) ଏନ୍ଡିଏରୁ ସମ୍ପର୍କ ତୁଟାଇଛି। କେନ୍ଦ୍ରର କୃଷି ବିଲ୍କୁ ବିରୋଧ କରି ଶନିବାର ଅନୁଷ୍ଠିତ କୋର କମିଟି ବୈଠକରେ ଏସ୍ଏଡି ଏଭଳି ନିଷ୍ପତ୍ତି ଗ୍ରହଣ କରିଛି। ଆଲୋଚନା ପରେ ଏସ୍ଏଡି ନେତା ସୁଖବୀର ସିଂ ବାଦଲ ଏନେଇ ଅବଗତ କରିଥିଲେ।
ଏସ୍ଏଡିର ଏଭଳି ନିଷ୍ପତ୍ତି ଦୁଃଖଦାୟକ ବୋଲି ଭାଜପା କହିଛି। ଅନ୍ୟପକ୍ଷରେ ପଞ୍ଜାବର ବରିଷ୍ଠ ଭାଜପା ନେତା ମଦନମୋହନ ମିତ୍ତଲ, ମନୋରଞ୍ଜନ କାଳିଆ ଓ ମାଷ୍ଟର ମୋହନ ଲାଲ୍ ରବିବାର କହିଛନ୍ତି, ୨୦୨୨ ବିଧାନସଭା ନିର୍ବାଚନରେ ଭାଜପା ଏକାକୀ ପଞ୍ଜାବରେ ନିର୍ବାଚନ ଲଢ଼ି ବିଜୟୀ ହୋଇପାରିବ। ଏସ୍ଏଡି ସହ ଭାଜପା ସୁସମ୍ପର୍କ ଚାହୁଁଥିବାବେଳେ ଏଭଳି ନିଷ୍ପତ୍ତି ଗ୍ରହଣଯୋଗ୍ୟ ନୁହେଁ। ଭାଜପା ମଧ୍ୟ ଏକାକୀ ନିର୍ବାଚନ ଲଢ଼ି ପଞ୍ଜାବରେ ବିଜୟୀ ହୋଇପାରିବ ବୋଲି କାଳିଆ ପ୍ରକାଶ କରିଛନ୍ତି। ବହୁ ଏସ୍ଏଡି ନେତା ଭାଜପା ସହ ଯୋଗାଯୋଗରେ ଥିବା ମିତ୍ତଲ ପ୍ରକାଶ କରିଛନ୍ତି।
