ଭୁବନେଶ୍ୱର, ୧୪।୧୨(ସୁନିତ୍ ମିଶ୍ର): ୨୦୨୪ ଲୋକ ସଭା ନିର୍ବାଚନରେ ଓଡ଼ିଶାରେ ଭାଜପା ଅତିକମ୍ରେ ୧୫ଟି ଆସନରେ ଜିତିବ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି। ନୂଆଦିଲ୍ଲୀଠାରେ ଏକ ଜାତୀୟ ଗଣମାଧ୍ୟମ କାର୍ଯ୍ୟକ୍ରମରେ ଯୋଗଦେଇ ସେ ଏହି ସୂଚନା ଦେଇଛନ୍ତି। ଧର୍ମେନ୍ଦ୍ର କହିଛନ୍ତି, ୨୦୨୪ ସାଧାରଣ ନିର୍ବାଚନରେ ଓଡ଼ିଶାରେ ଭାଜପା ୪୫% ଭୋଟ ପାଇବ। ଓଡ଼ିଶାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗ୍ରହଣୀୟତା ୮୦ ପ୍ରତିଶତରୁ ଅଧିକ ରହିଛି। ୨୦୧୪ ଲୋକ ସଭା ନିର୍ବାଚନରେ ଓଡ଼ିଶାରେ ଭାଜପା ୨୨% ଭୋଟ ପାଇବା ସହ ଗୋଟିଏ ଆସନରେ ଜିତିଥିଲା। ୨୦୧୪ ବିଧାନସଭା ନିର୍ବାଚନରେ ୧୮% ଭୋଟ ମିଳିବା ସହ ୧୦ଟି ଆସନରେ ଜିତିଥିଲା।
୨୦୧୯ ଲୋକ ସଭା ନିର୍ବାଚନରେ ଦଳର ଭୋଟ ୩୮%କୁ ବୃଦ୍ଧିପାଇବା ସହ ଆସନ ସଂଖ୍ୟା ୮ରେ ପହଞ୍ଚିଥିଲା। ସେଥିର ବିଜେଡିକୁ ୪୨ ପ୍ରତିଶତ ଭୋଟ ଲୋକ ସଭା ନିର୍ବାଚନରେ ମିଳିଥିଲା। ବିଧାନସଭା ନିର୍ବାଚନରେ ବିଜେଡିକୁ ୪୪ ପ୍ରତିଶତ ଭୋଟ୍ ମିଳିଥିବା ବେଳେ ଭାଜପାର ଭୋଟ୍ ପ୍ରତିଶତ ୧୮%ରୁ ବୃଦ୍ଧି ପାଇ ୩୨ ପ୍ରତିଶତରେ ପହଞ୍ଚିଥିଲା ବୋଲି ଧର୍ମେନ୍ଦ୍ର କହିଛନ୍ତି। ଭାଜପାର ଭୋଟ ହାର ପାଖାପାଖି ୧୦୦% ବଢ଼ିଛି। ରାଜନୀତିରେ ୩ ମାସ ବହୁତ ଅଧିକ ସମୟ। ପ୍ରଧାନମନ୍ତ୍ରୀ ଓଡ଼ିଶାର ସବୁଠାରୁ ବେଶି ଲୋକପ୍ରିୟ ରାଜନେତା । ମୋଦି ସରକାରଙ୍କ ସମୟରେ କେଉଁ ରାଜ୍ୟ ଯଦି ସବୁଠୁ ଅଧିକ ରାଜସ୍ବ ପାଇଛି ତାହା ହେଉଛି ଓଡ଼ିଶା। ୪ ମାସ ପରେ ଫଳାଫଳ ଯାହା ଆସିବ ତା’ପରେ ଯଦି ଡାକିବେ ସେତେବେଳେ ବାସ୍ତବତା ଜଣାପଡିଥିବ ବୋଲି ସେ କହିଛନ୍ତି। ତେବେ ଧର୍ମେନ୍ଦ୍ରଙ୍କ ଏହି ମନ୍ତବ୍ୟ ପରେ ଉଭୟ ବିଜେଡି ଓ କଂଗ୍ରେସ ପ୍ରତିକ୍ରିୟା ରଖିଛନ୍ତି।
ବିଜେଡି ବିଧାୟକ ଅମର ପ୍ରସାଦ ଶତପଥୀ କହିଛନ୍ତି , ଲୋକଙ୍କୁ ଆକର୍ଷିତ କରିବା ପାଇଁ ବିଭିନ୍ନ ରାଜନୀତିକ ଦଳ ସେମାନଙ୍କ କଥା କହିଥାଆନ୍ତି। ହେଲେ ଓଡ଼ିଶାରେ ବାସ୍ତବ ସ୍ଥିତି ହେଉଛି ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ପ୍ରତି ଲୋକଙ୍କ ବିଶ୍ୱାସ ଅତୁଟ ରହିଛି। ମୁଖ୍ୟମନ୍ତ୍ରୀଙ୍କ ସ୍ବଚ୍ଛ ନେତୃତ୍ୱ ଓ ଲୋକାଭିମୁଖୀ କାମ ପାଇଁ ତାହା ସମ୍ଭବ ହୋଇଛି। ୨୦୨୪ ନିର୍ବାଚନରେ ବିଜେଡିର ଭୋଟ ପ୍ରତିଶତ ଏବଂ ସିଟ୍ ସଂଖ୍ୟା ବୃଦ୍ଧି ପାଇବ।
ବରିଷ୍ଠ କଂଗ୍ରେସ ନେତା ଜୟଦେବ ଜେନା କହିଛନ୍ତି, ଧର୍ମେନ୍ଦ୍ରବାବୁ ବହୁଦିନ ହେଲା ଓଡ଼ିଶାରୁ ନିର୍ବାଚନ ଲଢ଼ିନାହାନ୍ତି। ନିକଟରେ ୩ଟି ରାଜ୍ୟର ବିଧାନସଭା ନିର୍ବାଚନ ଫଳାଫଳରୁ ଉତ୍ସାହିତ ହୋଇ ସେ ଏକଥା କହିଛନ୍ତି। ଭାଜପା ଓ ବିଜେଡି ଭିତରେ ସମଦୂରତା ନାହିଁ ସମଝୋତା ଅଛି। ଏ ବାର୍ତ୍ତା ତୃଣମୂଳ ସ୍ତରରେ ପହଞ୍ଚିଲାଣି। ରାଜ୍ୟରେ ଭାଜପାକୁ ୧୫ଟି ଏମ୍ପି ସିଟ୍ ମିଳିବା କେବଳ ସ୍ବପ୍ନ। ସେ କେବଳ କହୁ କହୁ କହି ଦେଇଛନ୍ତି ବୋଲି ଜୟଦେବ କହିଛନ୍ତି।