ଭୁବନେଶ୍ବର, ୧୩ା୨(ବ୍ୟୁରୋ): ୨୦୨୪ ସାଧାରଣ ନିର୍ବାଚନକୁ ଆଉ ମାତ୍ର ଗୋଟିଏ ବର୍ଷ ସମୟ ଥିବାବେଳେ ଏହା ପୂର୍ବରୁ ରାଜ୍ୟ ରାଜନୀତି ଚଳଚଞ୍ଚଳ ହେବା ଆରମ୍ଭ ହେଲାଣି। ବିଭିନ୍ନ ପ୍ରସଙ୍ଗରେ ପରସ୍ପର ବିରୋଧରେ ଆନ୍ଦୋଳନ କରିବା ଲାଗି ଉଭୟ ବିଜେଡି ଏବଂ ଭାଜପା ପ୍ରସ୍ତୁତି ଆରମ୍ଭ କରିଦେଇଛନ୍ତି। କେନ୍ଦ୍ର ଅବହେଳା ପ୍ରସଙ୍ଗ ଉଠାଇ ବିଜେଡି ରାସ୍ତାକୁ ଓହ୍ଲାଇବା ଲାଗି ଶାସକ ଦଳ ନିଜର ପ୍ରସ୍ତୁତି କରୁଥିବା ବେଳେ ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ନେଇ ଭାଜପା ଆନ୍ଦୋଳନ କରିବ। ଆସନ୍ତା ୧୪, ୧୫ ଏବଂ ୧୬ ଏହି ୩ ଦିନ ଧରି ଭାଜପା, ବିଜେଡି ପରସ୍ପର ବିରୋଧରେ ଆନ୍ଦୋଳନ କରିବାକୁ ସଜବାଜ ଆରମ୍ଭ କରିଦେଇଛନ୍ତି। ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ନେଇ ଆସନ୍ତା ୧୪ରେ ଭୁବନେଶ୍ୱରର ବିଭିନ୍ନ ସ୍ଥାନରେ ହରତାଳ, ୧୫ରେ ସବୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ଏବଂ ୧୬ରେ ରାଜଭବନ ଆଗରେ ବିକ୍ଷୋଭ ଓ ହରତାଳ କରିବାକୁ ଭାଜପା ପକ୍ଷରୁ ଯୋଜନା କରାଯାଇଛି। ତେବେ ଭାଜପାର ଏହି ଆନ୍ଦୋଳନକୁ କାଉଣ୍ଟର କରିବା ଲାଗି ବିଜେଡି ପକ୍ଷରୁ ଆସନ୍ତା ୧୫ରେ ସବୁ ପଞ୍ଚାୟତ ଅଫିସ୍ ଆଗରେ ଆନ୍ଦୋଳନ ଏବଂ ୧୬ରେ ସବୁ ବ୍ଲକ ଅଫିସ୍ ଘେରାଉ କାର୍ଯ୍ୟକ୍ରମ ସ୍ଥିର କରାଯାଇଛି।
ତେବେ ଭାଜପା ନବ ଦାସ ହତ୍ୟାକାଣ୍ଡ, ବାଲି ମାଫିଆଙ୍କ ଦୌରାତ୍ମ୍ୟ, ତିର୍ତ୍ତୋଲ ବିଜେଡି ବିଧାୟକଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ପ୍ରସଙ୍ଗକୁ ନେଇ ସବୁ ଜିଲାରେ ହରତାଳ କରିବ। ଅପରପକ୍ଷରେ କେନ୍ଦ୍ର ସରକାର ହିତାଧିକାରୀଙ୍କ ୫ କେଜି ଲେଖା ଚାଉଳ କାଟି ଦେଉଥିବା ଅଭିଯୋଗ ଆଣି ବିଜେଡି ପକ୍ଷରୁ ସବୁ ବିଧାୟକ ଏବଂ ଜିଲା ସଭାପତିମାନଙ୍କୁ ପ୍ରତିବାଦ କରିବା ଲାଗି କୁହାଯାଇଛି। ତେବେ ଆସନ୍ତା ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଦୁଇ ରାଜନୈତିକ ଦଳ ବିଭିନ୍ନ ପ୍ରସଙ୍ଗରେ ଆନ୍ଦୋଳନ କରିବାକୁ ଅଣ୍ଟା ଭିଡିଥିବା ବେଳେ ଆସନ୍ତା ୧୯ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଦମ୍ପୁର ଯିବାର କାର୍ଯ୍ୟକ୍ରମ ରହିଛି। ପଦମ୍ପୁର ଉପନିର୍ବାଚନ ସମୟରେ ଶାସକ ଦଳ ଦେଇ ଆସିଥିବା ପ୍ରତିଶ୍ରୁତି ପୂରଣ ଲାଗି ଦଳ ଯୋଜନା ରଖିଛି। ଅନ୍ୟପଟେ ମାର୍ଚ୍ଚ ପ୍ରଥମ ସପ୍ତାହରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଓଡ଼ିଶା ଗସ୍ତରେ ଆସି ଢେଙ୍କାନାଳ ଏବଂ ଭଦ୍ରକ ଯିିବାର କାର୍ଯ୍ୟକ୍ରମ ରହିଛି।
