ଚଣ୍ଡିଗଡ଼,୩୧।୧: ଚଣ୍ଡିଗଡ଼ ମେୟର ନିର୍ବାଚନରେ ଭାଜପା ପ୍ରାର୍ଥୀ ମନୋଜ ସୋଙ୍କର ବିଜୟୀ ହୋଇଛନ୍ତି। ଇଣ୍ଡିଆ ମେଣ୍ଟରୁ ପ୍ରାର୍ଥୀ ହୋଇଥିବା ଏଏପିର କୁଲଦୀପ କୁମାରଙ୍କୁ ସେ ପରାଜିତ କରିଛନ୍ତି। ମନୋଜଙ୍କୁ ୧୬ ଭୋଟ ମିଳିଥିବାବେଳେ କୁଲଦୀପ୍ ୧୨ ଭୋଟ ପାଇଛନ୍ତି ଏବଂ ୮ଟି ଭୋଟ ନାକଚ ହୋଇଯାଇଛି। ମଙ୍ଗଳବାର ମଧ୍ୟାହ୍ନରେ ଫଳାଫଳ ଘୋଷଣା ହେବା ପରେ ଏଏପି ଏବଂ କଂଗ୍ରେସ କାଉନସିଲରମାନେ ଏହାର ଜୋର୍ଦାର ବିରୋଧ କରିଥିଲେ। ଭୋଟରେ ଜାଲିଆତି ଓ ଠକେଇ ହୋଇଥିବା ସେମାନେ ଅଭିଯୋଗ କରି ହଟ୍ଟଗୋଳ କରିବାରୁ ଉତ୍ତେଜନାପୂର୍ଣ୍ଣ ସ୍ଥିତି ଉପୁଜିଥିଲା। ୩୫ ସଦସ୍ୟ ବିଶିଷ୍ଟ ଚଣ୍ଡିଗଡ଼ ମ୍ୟୁନିସିପାଲ କର୍ପୋରେଶନରେ ଭାଜପାର ୧୪ କାଉନସିଲର ଥିବାବେଳେ ଏଏପିର ୧୩ ଏବଂ କଂଗ୍ରେସର ୭ ସଦସ୍ୟ ରହିଛନ୍ତି। ଶିରୋମଣି ଅକାଳୀ ଦଳର ଜଣେ କାଉନସିଲର ଅଛନ୍ତି। କଂଗ୍ରେସ ଏବଂ ଏଏପି ମିଳିତ ପ୍ରାର୍ଥୀ ଦେଇଥିବାବେଳେ ଭାଜପା ପ୍ରାର୍ଥୀ ବିଜୟୀ ହେବାକୁ ଦିବାଲୋକରେ ସାଂଘାତିକ ଠକେଇ ବୋଲି କହି ଏଏପି ଆବାହକ ଅରବିନ୍ଦ କେଜ୍ରିଓ୍ବାଲ ଉଦ୍ବେଗ ପ୍ରକାଶ କରିଛନ୍ତି। ମେୟର ନିର୍ବାଚନରେ ଯଦି ସେମାନେ ଏଭଳି ସ୍ତରକୁ ଖସିପାରୁଛନ୍ତି, ତେବେ ସାଧାରଣ ନିର୍ବାଚନରେ କେଉଁ ସ୍ତରକୁ ଯିବେ ବୋଲି ସେ ପ୍ରଶ୍ନ କରିଛନ୍ତି। ନିର୍ବାଚନ ପରିଚାଳନା ଦାୟିତ୍ୱରେ ଥିବା ଅଫିସରଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ କରାଯାଉ ବୋଲି ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଦାବି କରିଛନ୍ତି। ଦେଶର ଗଣତନ୍ତ୍ରରେ ଆଜିର ଦିନ ଏକ କଳା ଦିବସ ଭାବେ ମନେ ରହିବ ବୋଲି ସେ କହିଛନ୍ତି।