ଓ୍ବାଶିଂଟନ୍/ନୂଆଦିଲ୍ଲୀ,୨୧।୩: ଭାଜପା ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ଅନ୍ତର୍ଜାତୀୟ ରାଜନୈତିକ ଦଳ। ଆମେରିକାର ଖବରକାଗଜ ‘ଦ ୱାଲ ଷ୍ଟ୍ରିଟ ଜର୍ଣ୍ଣାଲ’ର ଏକ ଓପିନିୟନ୍ ଆର୍ଟିକିଲ୍ରେ ଏହି ଦାବି କରାଯାଇଛି। ୱାଲ୍ଟର ରସେଲ ମିଡଙ୍କ ଦ୍ୱାରା ଲିଖିତ ଏହି ଆର୍ଟିକିଲରେ ଦର୍ଶାଯାଇଛି ଯେ, ଆମେରିକାର ସ୍ବାର୍ଥ ଦୃଷ୍ଟିରୁ ଭାରତର ଭାରତୀୟ ଜନତା ପାର୍ଟି ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ବିଦେଶୀ ରାଜନୈତିକ ଦଳ। ଏହି ପାର୍ଟି ବିଷୟରେ ବୋଧହୁଏ ବିଶ୍ୱରେ ଖୁବ୍ କମ୍ ଲୋକ ଜାଣିଥିବେ।
ଆର୍ଟିକିଲରେ ଆହୁରି ଦର୍ଶାଯାଇଛି ଯେ, ୨୦୧୪ ଏବଂ ୨୦୧୯ରେ କ୍ରମାଗତ ବିଜୟ ପରେ ଭାଜପା ୨୦୨୪ରେ ମଧ୍ୟ ବିଜୟର ପୁନରାବୃତ୍ତି ଆଡକୁ ଗତି କରୁଛି। ଏହା ସହିତ ଭାରତ ମଧ୍ୟ ଏକ ପ୍ରମୁଖ ଅର୍ଥନୈତିକ ଶକ୍ତି ପାଲଟିଛି। ଏହି କାରଣରୁ ଜାପାନ ସହିତ ଏହି ଦେଶ ଭାରତ-ପ୍ରଶାନ୍ତ ମହାସାଗରରେ ଆମେରିକାର ନୀତିର ମୂଳ ସ୍ଥାନ ପାଲଟିଛି। ନିକଟ ଭବିଷ୍ୟତରେ ଭାଜପା ଭାରତରେ ଅଧିକାଂଶ ନିଷ୍ପତ୍ତି ନେବ ଏବଂ ଏହାର ସାହାଯ୍ୟ ବିନା ଆମେରିକା ଚାଇନାର ବଢୁଥିବା ଶକ୍ତି ସନ୍ତୁଳନ ପାଇଁ ନେଇଥିବା ସମସ୍ତ ପଦକ୍ଷେପ ଦୁର୍ବଳ ରହିବ।
ମିଡ କହିଛନ୍ତି, ଭାଜପାକୁ ବିଶ୍ୱରେ ଖୁବ୍ କମ୍ ଲୋକ ଜାଣନ୍ତି। କାରଣ ଅଧିକାଂଶ ଅଣ-ଭାରତୀୟ ଏହାର ଉତ୍ଥାନ ସହିତ ଜଡିତ ରାଜନୈତିକ ଏବଂ ସାଂସ୍କୃତିକ ଇତିହାସ ବିଷୟରେ ଜାଣିନାହାନ୍ତି। ମୁସଲିମ ଭାଇଚାରା ଭଳି ଭାଜପା ପାଶ୍ଚାତ୍ୟ ଉଦାରବାଦୀବାଦର ଅନେକ ଧାରଣାକୁ ପ୍ରତ୍ୟାଖ୍ୟାନ କରିଛି ଏବଂ ଆଧୁନିକତାର ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ପାରାମିଟରକୁ ଗ୍ରହଣ କରିଛି। ଚାଇନା କମ୍ୟୁନିଷ୍ଟ ପାର୍ଟି ପରି ଭାଜପା ଏକ ବିଲିୟନରୁ ଅଧିକ ଜନସଂଖ୍ୟା ବିଶିଷ୍ଟ ଏକ ଦେଶକୁ ବିଶ୍ୱ ସୁପର ପାୱାର କରିବାକୁ ଚାହୁଁଛି।