ମୁମ୍ବାଇ,୧୮।୧୦ : ମୁମ୍ବାଇର ଅନ୍ଧେରୀ ଇଷ୍ଟ ଆସନରେ ଭାରତୀୟ ଜନତା ପାର୍ଟି ପ୍ରାର୍ଥୀ ନାମାଙ୍କନ ପ୍ରତ୍ୟାହାର କରିବା ନେଇ ରାଜନୈତିକ ଆରୋପ ପ୍ରତ୍ୟାରୋପ ବୃଦ୍ଧି ପାଇବାରେ ଲାଗିଛି। ଭାଜପା ଏଠାରେ ମୁର୍ଜି ପଟେଲଙ୍କୁ ପ୍ରାର୍ଥୀ କରିଥିଲା। ସେ ଜଣେ ଗୁଜୁରାଟୀ। ତାଙ୍କ ବିରୋଧରେ ଉଦ୍ଧବ ବାଲାସାହେବ ଠାକରେ ଦଳ ପକ୍ଷରୁ ପୂର୍ବତନ ଶିବସେନା ବିଧାୟକ ରମେଶ ଲଟକେଙ୍କ ସ୍ତ୍ରୀ ଋତୁଜା ଲଟକେଙ୍କୁ ପ୍ରାର୍ଥୀ କରାଯାଇଛି।
ତେବେ ଭାଜପା ଏବେ ମୁର୍ଜିଙ୍କ ପ୍ରାର୍ଥୀପତ୍ର ପ୍ରତ୍ୟାହାର କରିଛି। ଏନେଇ ଭାଜପାକୁ ଶିବସେନା ଉଦ୍ଧବ ବାଲାସାହେବ ଠାକରେ ନେତା ସଞ୍ଜୟ ରାଉତ ଟାର୍ଗେଟ କରିଛନ୍ତି। କୋର୍ଟରେ ହାଜର ହେବାବେଳେ ସଞ୍ଜୟ କହିଛନ୍ତି ଅନ୍ଧେରୀ ଇଷ୍ଟ ବିଧାନସଭା ଆସନରେ ଭାଜପା ପ୍ରାୟ ପଚାଶ ହଜାରରୁ ଅଧିକ ଭୋଟରେ ହାରୁଥିବାର ଜଣାପଡ଼ିଥିଲା। ଭାଜପାର ନିଜସ୍ବ ଆଭ୍ୟନ୍ତରୀଣ ସର୍ଭେରେ ଏହା ମଧ୍ୟ ସାମ୍ନାକୁ ଆସିଥିଲା ବୋଲି ସେ କହିଛନ୍ତି। ପରାଜୟକୁ ଭୟ କରି ଭାଜପା ଏହାର ପ୍ରାର୍ଥୀଙ୍କ ନାମାଙ୍କନ ପ୍ରତ୍ୟାହାର କରିନେଇଛି।
ଏହି ସମଗ୍ର ରାଜନୈତିକ ସ୍ଥିତି ଉପରେ ବରିଷ୍ଠ ଖବର ଦାତା ଚନ୍ଦ୍ରଶେ ୱାଡୱାଲକର କହିଛନ୍ତି ଯେ ନିକଟ ଅତୀତରେ ମହାରାଷ୍ଟ୍ରରେ ଯେଉଁ ପ୍ରକାରର ବଡ ରାଜନୈତିକ ବିବାଦ ଜାରି ରହିଛି ସେଥିରୁ କିଛି ନିର୍ଭୁଲ ଭାବେ ଅନୁମାନ କରି ହେଉନାହିଁ। ଏପର୍ଯ୍ୟନ୍ତ କୁହାଯାଇପାରିବ ନାହିଁ ଯେ ଭାଜପା ଏବଂ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ମଧ୍ୟରେ ଥିବା ମେଣ୍ଟକୁ ରାଜ୍ୟର ଜନସାଧାରଣ କେତେ ପସନ୍ଦ କରିବେ। ସେ କହିଛନ୍ତି ଯେ ଯେତେବେଳେ ବହୁ ଆସନରେ ନିର୍ବାଚନ ଅନୁଷ୍ଠିତ ହେବ ଏବଂ ଏହାର ଫଳାଫଳ ଆସିବ ସେତେବେଳେ ହୁଏତଭାଜପା ଏବଂ ଶିନ୍ଦେଙ୍କ ମିଳିତ ସରକାର ସର୍ବସାଧାରଣଙ୍କ ନିକଟରେ ଗ୍ରହଣୀୟ ହୋଇପାରିବେ। ଭାଜପାର ନେତା ତଥା ଶିନ୍ଦେଙ୍କ ଶିବସେନା ନେତାମାନେ ଏହାକୁ ଭଲଭାବେ ବୁଝିଛନ୍ତି। ବୋଧହୁଏ ଏହା ହେଉଛି ମୁଖ୍ୟ କାରଣ ଯେଉଁଥି ପାଇଁ ସେମାନେ କମ କାର୍ଯ୍ୟକାଳ ଥିବା ଉପ-ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁ ନ ଥିଲେ।
