ଭାଜପାର କେନ୍ଦ୍ରୀୟ ହେଭିୱେଟ୍ ବନାମ ବିଜେଡିର ଦୁଇ ହେଭିୱେଟ୍, କିଏ କାହା ଉପରେ ପଡ଼ିବେ ଭାରି ?

ଭୁବନେଶ୍ୱର,୮ା୫: ଓଡ଼ିଶାରେ ପ୍ରଥମ ପର୍ଯ୍ୟାୟ ମତଦାନକୁ ଆଉ କେଇଟା ଦିନ ବାକି ଥିବା ବେଳେ ପ୍ରଚାର ଜୋରଦାର କରିଛନ୍ତି ତିନି ପ୍ରମୁଖ ଦଳ। ଭାରତୀୟ ଜନତା ପାର୍ଟି ଏବଂ ବିଜୁ ଜନତା ଦଳ ଶିଙ୍ଘରେ ଶିଙ୍ଘ ଲଗାଇ ଲଢେଇ କରୁଥିବା ବେଳେ ପଛରେ ପଡିଯାଇଛି କଂଗ୍ରେସ। ତେଣୁ ଓଡ଼ିଶାରେ ଆଗାମୀ ନିର୍ବାଚନୀ ହାୱା ତୀବ୍ର ହେବା ସହ ଏହା ଭାଜପା ବନାମ ବିଜେଡି ହେବାକୁ ଯାଉଥିବା ଚର୍ଚ୍ଚା ହେଉଛି।

ଏହି କ୍ରମରେ ଦେଖିଲେ କେନ୍ଦ୍ରୀୟ ଭାଜପା ହେଭିୱେଟ୍ ମାନଙ୍କୁ ଗୁରୁତ୍ୱପୂର୍ଣ୍ଣ ଭୂମିକା ମିଳିଥିଲା ବେଳେ ଏହି ଅଭିଯାନରେ ରାଜ୍ୟ ଭାଜପା ନେତାମାନଙ୍କୁ ଦଳରେ ସାମାନ୍ୟ କମ୍ ଗୁରୁତ୍ୱ ଦିଆଯାଇଛି। ଓଡ଼ିଶାରେ ଦଳ ଏହାର ସ୍ଥିତି ମଜବୁତ କରିବା ପାଇଁ ଜୋରଦାର ପ୍ରୟାସ ଆରମ୍ଭ କରିଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହମନ୍ତ୍ରୀ ଅମିତ ଶାହାଙ୍କ ବ୍ୟତୀତ ଓଡ଼ିଶା ନିର୍ବାଚନ ରାଲିରେ ବୁଧବାର ରାଜନାଥ ସିଂହ ରାୟଗଡାରେ ପ୍ରଚାର କରିଥିଲା ବେଳେ ଗୁରୁବାର ନିତିନ ଗଡ଼କରୀ ପୁରୀରେ ବିଶାଳ ଜଣ ସମାବେଶକୁ ସମ୍ବୋଧିତ କରିବେ।

ଏହାପରେ ଆସାମ ମୁଖ୍ୟମନ୍ତ୍ରୀ ଏବଂ ଛତିଶଗଡ ମୁଖ୍ୟମନ୍ତ୍ରୀ ମଧ୍ୟ ରାଜ୍ୟରେ ପ୍ରଚାର କରିବେ। ଏଥିରେ ବଲିଉଡ ଅଭିନେତ୍ରୀ ତଥା ଦଳର ବରିଷ୍ଠ ନେତ୍ରୀ ହେମା ମାଳୀନି ମଧ୍ୟ ଅଭିଯାନର ସାମିଲ ହେବେ। କୁହାଯାଉଛି ଯେ, ଓଡ଼ିଶାରେ ଏହି ଅଭିଯାନର ନେତୃତ୍ୱ ନେବାକୁ ବରିଷ୍ଠ କେନ୍ଦ୍ରୀୟ ନେତା, ସେମାନଙ୍କ ମୁଖ୍ୟମନ୍ତ୍ରୀ ଏବଂ ଜଣାଶୁଣା ବଲିଉଡ ଅଭିନେତାଙ୍କ ଉପରେ ଓଡିଶା ଭାଜପା ଅଧିକ ନିର୍ଭର କରୁଛି।

ରାଜ୍ୟରେ ଭାଜପା ଏପରି ଶକ୍ତି ପ୍ରଦର୍ଶନ କରି ନିଶ୍ଚିତ ଭାବରେ ଆଶା କରୁଛି ଯେ, ଲୋକସଭା ଆସନରୁ ଅଧିକାଂଶ ଜିତିବା ବ୍ୟତୀତ ଦଳ ଓଡିଶାରେ ସରକାର ଗଠନ କରିବ।

କିନ୍ତୁ ଅନ୍ୟପଟେ ବିଜେଡି କିପରି ପୁନର୍ବାର କ୍ଷମତାକୁ ଫେରିବ, ସେଥିପାଇଁ ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଦଳର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ଦୃଢ ପ୍ରୟାସ ଆରମ୍ଭ କରିଛନ୍ତି। ଦୁହେଁ ରାଜ୍ୟର ବିଭିନ୍ନ ଜିଲାରେ ପ୍ରଚାର କରି ବିଜେଡି ଅଭିଯାନର ନେତୃତ୍ୱ ନେଉଛନ୍ତି।

ଏହାରି ମଧ୍ୟରେ ଭାଜପା ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅନ୍ୟ ନେତାମାନଙ୍କ ଦ୍ୱାରା ସେମାନଙ୍କ ଉପରେ ହୋଇଥିବା ବଡ ଆକ୍ରମଣରେ ମୁଖ୍ୟମନ୍ତ୍ରୀ ଏବଂ କାର୍ତ୍ତିକ ପାଣ୍ଡିଆନ୍ କିପରି ପ୍ରତିକ୍ରିୟା କରୁଛନ୍ତି ତାହା ଉପରେ ଏବେ ଓଡ଼ିଶାବାସୀ ତୀକ୍ଷ୍ଣ ନଜର ରଖିଛନ୍ତି।