ବରଗଡ଼ ଅଫିସ,୧୩।୨: ଖରିଫ ଧାନ ସଂଗ୍ରହ ପ୍ରକ୍ରିୟାକୁ ତିନି ମାସ ବିତିଯାଇଛି। ମାତ୍ର ପଶ୍ଚିମ ଓଡ଼ିଶାର ବରଗଡ଼ ସମେତ ବିଭିନ୍ନ ଜିଲାରେ ଧାନ କିଣାବିକା ନେଇ ସମସ୍ୟା ତୁଟି ନାହିଁ। ବହୁସଂଖ୍ୟକ ଚାଷୀଙ୍କ ପାଖରେ ଲକ୍ଷ, ଲକ୍ଷ ବସ୍ତା ଧାନ ବିକ୍ରି ନ ହୋଇ ପଡିରହିଛି । ଅନ୍ୟପଟେ ଧାନ ବିକ୍ରି ନ ସରୁଣୁ ମଣ୍ଡିଗୁଡିକୁ ବନ୍ଦକରି ଦିଆଯାଇ ଥିବାବେଳେ ଚଷୀଙ୍କୁ ମିଳିଥିବା ଟୋକନ ଅବଧି ସରିଯାଇଛି। ଫଳରେ ଧାନ ବିକ୍ରି କରି ନ ପାରି ଚାଷୀମାନେ ନାନା ସମସ୍ୟାରେ ଛନ୍ଦି ହୋଇପଡିଛି। ଏହାର ପ୍ରତିବାଦରେ ଚଳିତ ସପ୍ତାହ ଆରମ୍ଭରୁ ବିଭିନ୍ନ ଚାଷୀ ସଂଗଠନ ଗୁଡ଼ିକ ଅମ୍ବାଭୋନା, ପଦ୍ମପୁର, ଝାରବନ୍ଧ ଆଦି ଅଞ୍ଚଳରେ ଆନ୍ଦୋଳନ ଜାରିରଖି ବିଭିନ୍ନ ସରକାରୀ କାର୍ଯ୍ୟାଳୟ ଅଚଳକରି ଦେଇଥିବା ବେଳେ ଶନିବାର ଭାଜପା ତିନି ଘଣ୍ଟିଆ ଚକାଜାମ ଆନ୍ଦୋଳନକୁ ଓହ୍ଲାଇଥିଲା। ବରଗଡ଼ ଅମ୍ବାଭୋନା ସମେତ ଜିଲାର ବିଭିନ୍ନ ସ୍ଥାନରେ ଭାଜପା କର୍ମୀମାନେ ରାସ୍ତା ଅବରୋଧ କରିବା ଯୋଗୁ ଯାତାୟତ ପ୍ରଭାବିତ ହୋଇଥିଲା।