ନୂଆଦିଲ୍ଲୀ,୨୯।୮ : ଖଣି ଲିଜ୍ ମାମଲାରେ ସମ୍ପୃକ୍ତ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କ ବିଧାୟକ ପଦ ରଦ୍ଦ ଲାଗି ନିର୍ବାଚନ କମିଶନ ସୁପାରିସ କରିଥିବାବେଳେ ରାଜ୍ୟପାଳଙ୍କ ନିଷ୍ପତ୍ତିକୁ ଅପେକ୍ଷା ରହିଛି। ରାଜ୍ୟ ରାଜନୀତିରେ ସଙ୍କଟ ଦେଖାଦେଇଥିବାବେଳେ ଏଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ମୁଖ୍ୟମନ୍ତ୍ରୀ ସୋରେନ ଶାସକ ବିଧାୟକମାନଙ୍କୁ ଲକ୍ଜୁରିୟସ୍ ବସ୍ରେ ନେଇ ଖୁଣ୍ଟି ଜିଲା ଲତ୍ରାତୁ ଡ୍ୟାମ୍ରେ ନୌବିହାର କରିବା ଘଟଣାକୁ ଭାଜପା କଡ଼ା ସମାଲୋଚନା କରିଛି।
ନିଜ ନାମରେ ଖଣି ଲିଜ୍ ନେଇଥିବା ମୁଖ୍ୟମନ୍ତ୍ରୀ ସୋରେନଙ୍କ ବିଧାୟକ ପଦ ରଦ୍ଦ ଲାଗି ଇସି ଶୁକ୍ରବାର ରାଜ୍ୟପାଳ ରମେଶ ବୈଶଙ୍କୁ ସୁପାରିସ କରିଥିଲେ। ତାଙ୍କ ବିରୋଧରେ ରାଜ୍ୟପାଳ ଏପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ନାହାନ୍ତି। ରାଜନୈତିକ ଅନିଶ୍ଚିତତାକୁ ନେଇ ରାଜ୍ୟର ଶାସକ କଳ ଅଚଳ ହୋଇପଡ଼ିଥିବାବେଳେ ମୁଖ୍ୟମନ୍ତ୍ରୀ ପିକ୍ନିକରେ ବ୍ୟସ୍ତ ରହିବା ଲଜ୍ଜାଜନକ ଘଟଣା ବୋଲି ଭାଜପା ନେତା ବାବୁଲାଲ ମାରାଣ୍ଡି ରବିବାର କହିଛନ୍ତି। ରାଜ୍ୟପାଳ ସୋରେନଙ୍କ ସଭ୍ୟପଦ ରଦ୍ଦ କରିବା ପୂର୍ବରୁ ସେ ନିଜ ପଦରୁ ଇସ୍ତଫା ଦିଅନ୍ତୁ ବୋଲି ପୂର୍ବତନ ମନ୍ତ୍ରୀ ଭାନୁପ୍ରତାପ ଶାହି ଦାବି କରିଛନ୍ତି। ଅନ୍ୟପକ୍ଷରେ ଜେଏମ୍ଏମ୍ ନେତୃତ୍ୱାଧୀନ ଉପା ମେଣ୍ଟ ଇସ୍ତଫା ଦାବିକୁ ଅଗ୍ରାହ୍ୟ କରିଛି। ଶାସନ ଜାରି ରଖିବା ଲାଗି ବିଧାନସଭାରେ ସେମାନଙ୍କର ସଂଖ୍ୟାଗରିଷ୍ଠତା ରହିଥିବା ଉପା ପକ୍ଷରୁ କୁହାଯାଇଛି।