ନୂଆଦିଲ୍ଲୀ,୧୩।୧୨ : ଭାରତୀୟ ଜନତା ପାର୍ଟି ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡ଼ରେ ୩ ଜଣ ନୂତନ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିବା ପରେ ତିନି ହିନ୍ଦୀ ଭାଷାଭାଷୀ ରାଜ୍ୟରେ ସିଏମ ଚୟନକୁ ନେଇ କଂଗ୍ରେସ କଡାସମାଲୋଚନା କରିଛି। କଂଗ୍ରେସର ଜାତୀୟ ମୁଖପାତ୍ର ତଥା ପୂର୍ବତନ ଖବରଦାତା ସୁପ୍ରିୟା ଶ୍ରୀନେତ କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ ଯିଏ ଚ୍ୟାଲେଞ୍ଜ ସୃଷ୍ଟି କରିବେ ତାଙ୍କୁ ଶେଷ କରି ଦିଆଯିବ।
କଂଗ୍ରେସ ନେତା ସୁପ୍ରିୟା ଶ୍ରୀନେତ ସୋସିଆଲ ମିଡିଆ ଏକ୍ସ ରେ ଏକ ପୋଷ୍ଟ କରିଛନ୍ତି ଯେଉଁଥିରେ ସେ ଭାଜପା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଡ଼ା ସମାଲୋଚନା କରିଛନ୍ତି ଏବଂ ତିନି ରାଜ୍ୟର ନବନିଯୁକ୍ତ ମୁଖ୍ୟମନ୍ତ୍ରୀଙ୍କୁ କାଠ କଣ୍ଢେଇ ବୋଲି କହିଛନ୍ତି। ସେ ତାଙ୍କ ପୋଷ୍ଟରେ ଲେଖିଛନ୍ତି, ଭାଜପା କାହାକୁ ମୁଖ୍ୟମନ୍ତ୍ରୀ କରିବ କାହାକୁ ନୁହେଁ ତାହା ଦଳର ନିଜସ୍ବ ବିଷୟ। କିନ୍ତୁ ତିନି ରାଜ୍ୟର ନିଷ୍ପତ୍ତିକୁ ଐତିହାସିକ ବୋଲି କହିବା କେତେ ଦୂର ଠିକ? ବାସ୍ତବତା ହେଉଛି, ଏହା ହେଉଛି ଭାଜପାର ଆଞ୍ଚଳିକ ବିରୋଧୀର ସମାପ୍ତି ଏବଂ ଯିଏ ପ୍ରଧାନମନ୍ତ୍ରୀ ମୋଦିଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିବ ତାଙ୍କର ଅନ୍ତ ଘଟିବ।
ଏଥିସହ ସୁପ୍ରିୟା ଶ୍ରୀନେତ ଲେଖିଛନ୍ତି ନିର୍ବାଚିତ ବିଧାୟକ ନୁହଁନ୍ତି, କିନ୍ତୁ ଦିଲ୍ଲୀରେ ଦୁଇ ଜଣଙ୍କ ନିଷ୍ପତ୍ତି ରାଜ୍ୟରେ ଲାଗୁ ହେବ, ଏହି ମୁଖ୍ୟମନ୍ତ୍ରୀମାନେ କାଠ କଣ୍ଢେଇ ପରି ସେମାନଙ୍କ ନିର୍ଦ୍ଦେଶ ପାଳନ କରିବେ ଏବଂ ମାଲିକ ଯେତେବେଳେ ଯାହା କହିବେ ତାହା ସେମାନଙ୍କୁ କରିବାକୁ ହେବ। ସେମାନଙ୍କୁ ଯେକୌଣସି ସମୟରେ ହଟାଇ ଦିଆ ଯାଇପାରିବ। ଏହା ଉତ୍ତରାଖଣ୍ଡ, ଗୁଜରାଟ, ଆସାମ ଭଳି ଅନେକ ରାଜ୍ୟରେ ଘଟିଛି। ଭାଜପା ଭିତରେ ଗଣତନ୍ତ୍ର ସମ୍ପୂର୍ଣ୍ଣ ରୂପେ ଶେଷ ହୋଇଛି। ମୋଦି ପୂର୍ବରୁ ବହୁ ବରିଷ୍ଠ ନେତାଙ୍କୁ କୋଣଠେସା କରି ସାରିଛନ୍ତି। ଏହା ତାଙ୍କ ପାଇଁ କିଛି ନୂଆ ନୁହେଁ।
