ଯାଜପୁର ଅଫିସ,୪।୧: କଳାହୀରା କୋଇଲାର କଳାବଜାର ତାଳଚେରଠାରୁ ଯାଜପୁର ଜିଲା ଷଠିପୁର ପର୍ଯ୍ୟନ୍ତ ଲମ୍ବିଛି। ଏହାର କାରବାର ଦିନକୁ ଦିନ ବଢ଼ିବାରେ ଲାଗିଛି। ଗତ ବର୍ଷକ ମଧ୍ୟରେ ଯାଜପୁର ପୋଲିସ ଦ୍ୱାରା ୫ରୁ ଊର୍ଦ୍ଧ୍ୱ ଥର କୋଇଲା କଳାବଜାର ଧରାପଡ଼ିଛି। ରବିବାର ସକାଳେ ପାଣିକୋଇଲି ପୋଲିସ ଏକ ଚୋରା କୋଇଲା ଗାଡି ଜବତ କରିବା ସହ ଡ୍ରାଇଭରଙ୍କୁ ଗିରଫ କରିଛି। କୌଣସି ବିଶ୍ୱସ୍ତ ସୂତ୍ରରୁ ଖବର ପାଇ ପାଣିକୋଇଲି ପୋଲିସ ରାଜପଥରେ ଯାଞ୍ଚ କରିଥିଲା। ଯାଞ୍ଚ ସମୟରେ ତାଳଚେରରୁ ୨୦ ଏମ୍ଟି ଚୋରା କୋଇଲା ବୋଝେଇ ଏକ ଟ୍ରକ ଧରାପଡିଥିଲା। କୋଇଲାର କୌଣସି କାଗଜପତ୍ର ନଥିବାରୁ ଗାଡିଟିକୁ ଜବତ କରିବା ସହ ଅନୁଗୋଳ ଜିଲା ବ୍ୟାରେଜ ମଇଦ୍ୱାରପୁର ଗ୍ରାମର ଡ୍ରାଇଭର ଅନିଲ କୁମାର ସାହୁ(୨୫)ଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। ନିୟମିତ ବ୍ୟବଧାନରେ ଚୋରା କୋଇଲା ଯାଜପୁର ଜିଲା ଦେଇ ପରିବହନ ହେଉଥିବାରୁ ଯାଜପୁରରୋଡ ଖଣି ବିଭାଗ ଓ କୋଇଲା ମାଫିଆଙ୍କ ମଧ୍ୟରେ ମଧୁଚନ୍ଦ୍ରିକା ଥିବା ଚର୍ଚ୍ଚା ଜୋର ଧରିଛି।
କୋଇଲା ପାଇଁ ତାଳଚେର ସାରା ଭାରତରେ ପରିଚିତ। ଦିନକୁ ଦିନ କୋଇଲାର କଳାବଜାର ବଢ଼ିବା ଯୋଗୁ ତାଳଚେର ଅଶାନ୍ତ ହେଉଥିବାବେଳେ ଏବେ ଯାଜପୁର ଜିଲା ମଧ୍ୟ ଏଥିରୁ ବାଦ ପଡୁନାହିଁ। ଏକ ସୁସଂଗଠିତ ର଼୍ୟାକେଟ ମାଧ୍ୟମରେ ଏହି ଚୋରାକାରବାର ହେଉଥିବାରୁ ଏମ୍ସିଏଲ ଓ ରାଜ୍ୟ ସରକାରଙ୍କ ବିପୁଳ କ୍ଷତି ହେଉଛି। ଗାଡ଼ିରେ କ୍ଷମତାଠାରୁ ଓଭରଲୋଡିଂ କରି କୋଇଲା ଚୋରାଚାଲାଣ ହେଉଥିବାବେଳେ ତାହାକୁ ଯାଜପୁର ଜିଲାର ବିଭିନ୍ନ ସ୍ଥାନରେ ବିକ୍ରି କରାଯାଉଛି। ଓଭରଲୋଡିଂ ଯାଞ୍ଚ ଦାୟିତ୍ୱରେ ରହିଥିବା ଆରଟିଓ ବିଭାଗ ମଧ୍ୟ ଏହା ଜାଣି ନୀରବ ରହୁଛି। ଏମ୍ସିଏଲର ସିଂହଭାଗ କୋଇଲା ତାଳଚେରରୁ ଉତ୍ତୋଳନ ହେଉଛି। ସେଠାରୁ ପ୍ରାୟ ୩୫ ର଼୍ୟାକ(ମାଲଗାଡ଼ି) କୋଇଲା ଦେଶର ବିଭିନ୍ନ ପ୍ରାନ୍ତକୁ ପରିବହନ ହୋଇଥାଏ। ଗୋଟିଏ ର଼୍ୟାକରେ ପ୍ରାୟ ୬୦ ୱାଗନ ଥାଏ। ଏହି ର଼୍ୟାକଗୁଡିକ ଜରିଆରେ ଏମ୍ସିଏଲ ବିିଭିନ୍ନ ସରକାରୀ ଓ ଘରୋଇ କମ୍ପାନୀକୁ କୋଇଲା ପରିବହନ କରିଥାଏ। ଜଣାଯାଇଛି ଯେ, କେବଳ ଘରୋଇ କମ୍ପାନୀକୁ ଯାଉଥିବା କୋଇଲାରେ କୋଟି କୋଟି ଟଙ୍କାର ଅନିୟମିତତା ହେଉଛି। ର଼୍ୟାକ ଲୋଡିଂ କରିବା ଓ ଚାଲାଣ କାଟିବା ଦାୟିତ୍ୱରେ ଥିବା କର୍ମଚାରୀ ଓ ଅଧିକାରୀଙ୍କ ସୁଲାସୁତୁରାରେ ଏହି ଦୁର୍ନୀତି ହେଉଛି। କୋଇଲା ସାଇଡିଂଠାରୁ ଗୋଟିଏ ଟ୍ରକରେ ପ୍ରାୟ ୧୬ରୁ ୧୭ ମେଟ୍ରିକ ଟନ ପର୍ଯ୍ୟନ୍ତ କୋଇଲା ପରିବହନ ହୋଇଥାଏ। ଏଥିପାଇଁ ଟ୍ରାଞ୍ଜିଟ ପାସ(ଟିପି) କଟାଯାଇଥାଏ। କିନ୍ତୁ ସେଠାରେ ଚଞ୍ଚକତା କରି ୨ ରୁ ୩ ମେଟ୍ରିକଟନ କୋଇଲା ଅଧିକା ଲୋଡିଂ ହୋଇଥାଏ ବୋଲି କୁହାଯାଉଛି। ଯାଜପୁର ଜିଲାର ଷଠିପୁର, ବଡଚଣା ଅଞ୍ଚଳ କୋଇଲା କଳାବଜାରର ପେଣ୍ଠସ୍ଥଳୀ ପାଲଟିଛି। ଏ ସଂକ୍ରାନ୍ତରେ ଯାଜପୁରରୋଡ ଖଣି ଉପନିର୍ଦ୍ଦେଶକ ସନ୍ଦୀପ କୁମାର ବଳଙ୍କ ମତାମତ ମିଳିପାରିନାହିଁ।