ଭୁବନେଶ୍ୱର, ୩୧ା୧୨ (ବନ୍ଦନା ସେଠୀ):ଡିସେମ୍ବର ୩୧ ଆକାଶରେ ତଥାକଥିତ ‘କଳା ଜହ୍ନ’ ଦେଖାଯିବ ନାହିଁ। ତେଣୁ ବିଭିନ୍ନ ଗଣମାଧ୍ୟମ ଓ ସୋସିଆଲ ମିଡିଆରେ ପ୍ରଚାରିତ ହେଉଥିବା ‘କଳା ଜହ୍ନ’ କଥା ଠିକ୍ ନୁହେଁ। ସବୁ ଅମାବାସ୍ୟା ଭଳି ଡିସେମ୍ବର ୩୦ ରାତି ଆକାଶରେ ବିଲ୍କୁଲ୍ ଜହ୍ନ ଦେଖାଯିବ ନାହିଁ। ସେହିପରି ୩୧ ରାତିରେ ଧଳା ବଙ୍କୁଲି ଭଳି ଜହ୍ନ ଦେଖାଯିବ ବୋଲି ପଠାଣି ସାମନ୍ତ ପ୍ଲାନେଟୋରିୟମ୍ର ପୂର୍ବତନ ଉପନିର୍ଦ୍ଦେଶକ ତଥା ଜନବିଜ୍ଞାନୀ ଡ. ଶୁଭେନ୍ଦୁ ପଟ୍ଟନାୟକ ସୂଚନା ଦେଇଛନ୍ତି।
ଇଂଲିଶ କ୍ୟାଲେଣ୍ଡର ମାସରେ ଦୁଇଟି ପୂର୍ଣ୍ଣିମା ପଡିଲେ ଦ୍ୱିତୀୟ ପୂର୍ଣ୍ଣିମାକୁ ‘ନୀଳ ଜହ୍ନ’ ଭାବେ ନାମିତ କରାଯାଏ। ସେହିପରି ଏକ ଇଂଲିଶ କ୍ୟାଲେଣ୍ଡର ମାସରେ ଦୁଇଟି ଅମାବାସ୍ୟା ପଡିଲେ ଦ୍ୱିତୀୟ ଅମାବାସ୍ୟାକୁ ‘କଳା ଜହ୍ନ’ ଭାବେ ନାମିତ କରାଯାଏ। ତେବେ ଚନ୍ଦ୍ରର ରଙ୍ଗ ସହିତ ଏହାର କୌଣସି ସମ୍ପର୍କ ନାହିଁ। ଏହି ନାମ କେବଳ ଦ୍ୱିତୀୟ ଅମାବାସ୍ୟାକୁ ବ୍ୟାଖା କରିବା ପାଇଁ ବ୍ୟବହୃତ ହୁଏ। ସେହିପରି କଳା ଜହ୍ନ ଶବ୍ଦକୁ ଜ୍ୟୋତିର୍ବିଜ୍ଞାନରେ ଏତେ ବ୍ୟବହାର କରାଯାଏ ନାହିଁ। ଦୁଇଟି କ୍ରମାଗତ ପୂର୍ଣ୍ଣିମା ବା ଅମାବାସ୍ୟା ମଧ୍ୟରେ ସମୟ ପ୍ରାୟ ୨୯.୫ ଦିନ ରହିଥାଏ। ୩୦ ଦିନିଆ ମାସ ଅପେକ୍ଷା ୩୧ଦିନିଆ ମାସରେ କଳାଜହ୍ନ ହେବାର ସମ୍ଭାବନା ଅଧିକ। ବାୟୁମଣ୍ଡଳରେ ଆଗ୍ନେୟଗିରି ପାଉଁଶ ଓ ଧୂଆଁ, ବାୟୁରେ ଜଳ ବୁନ୍ଦା କିମ୍ବା କିଛି ପ୍ରକାରର ମେଘ ଆଦିର ସ୍ଥିତି ଯୋଗୁ କେବେକେବେ ଏକ ପୂର୍ଣ୍ଣିମା ଜହ୍ନ କିଛି ସମୟ ପାଇଁ କଳା ଦେଖାଯାଇପାରେ। ମାତ୍ର ଏହା ଅତି ବିରଳ ବୋଲି ଡ. ପଟ୍ଟନାୟକ କହିଛନ୍ତି।
