କଟକ ଅଫିସ, ୨୩ା୮:କଟକର ପୁରୁଣା ସଚିବାଳୟ ମାର୍ଗରେ ସୋମବାର ଜଣେ ମହିଳା ଏବଂ ଜଣେ ବ୍ୟକ୍ତିଙ୍କ ମଧ୍ୟରେ ଧସ୍ତାଧସ୍ତି ଓ ମାର୍ପିଟ୍ ହୋଇଛି। ସମ୍ପୃକ୍ତ ବ୍ୟକ୍ତି ତାଙ୍କୁ ସାମ୍ବାଦିକା କରାଇଦେବା ନାଁରେ ବ୍ଲାକ୍ମେଲ୍ କରୁଥିବା ମହିଳା ଜଣକ ଅଭିଯୋଗ ଆଣିଛନ୍ତି। ଦୁହେଁ ମହିଳା ଥାନାକୁ ଅଭିଯୋଗ କରିବା ପାଇଁ ଆସୁଥିବାବେଳେ ସାମ୍ନାସାମ୍ନି ହେବାରୁ ଏଭଳି ଘଟଣା ଘଟିଥିବା ଜଣାପଡ଼ିଛି।
ସୂଚନା ଅନୁସାରେ, ପୂର୍ବରୁ ମହିଳା ଥାନାରେ ମହିଳା ଓ ସମ୍ପୃକ୍ତ ବ୍ୟକ୍ତି ପରସ୍ପର ବିରୋଧରେ ଏତଲା ଦାଏର କରିଥିଲେ। ଉଭୟଙ୍କ ଅଭିଯୋଗ ଆଧାରରେ ଥାନାରେ ଦୁଇଟି ପୃଥକ ମାମଲା ରୁଜୁ କରାଯାଇଛି। ଗତ ଜୁଲାଇରେ ମାମଲା ରୁଜୁ ହୋଇଥିବା ବେଳେ ତଦନ୍ତ ଲାଗି ପୋଲିସ ଉଭୟଙ୍କୁ ଥାନାକୁ ଡାକିଥିଲା। ସୋମବାର ଦୁହେଁ ପୃଥକ୍ ଭାବେ ଥାନାକୁ ଆସୁଥିଲେ। ତେବେ ବାଟରେ ଉଭୟଙ୍କର ଭେଟ ହୋଇଥିଲା। ଏହି ସମୟରେ ସମ୍ପୃକ୍ତ ବ୍ୟକ୍ତିଙ୍କୁ ମହିଳା ଜଣକ ମାଡ଼ ମାରିଥିଲେ। ଥାନାଠାରୁ କିଛି ଦୂରରେ ଉଭୟଙ୍କ ମଧ୍ୟରେ ଖଣ୍ଡଯୁଦ୍ଧ ଚାଲିଥିଲା। ତେବେ ଏ ନେଇ କେହି ଥାନାରେ ଅଭିଯୋଗ କରିନାହାନ୍ତି। ତେଣୁ ଘଟଣାକ୍ରମ ସନ୍ଦେହ ଘେରକୁ ଆସୁଥିବା ସାଧାରଣରେ ଚର୍ଚ୍ଚା ହେଉଛି। ପୂର୍ବରୁ ମହିଳା ଥାନାରେ ହୋଇଥିବା ଅଭିଯୋଗ ଅନୁସାରେ, ପୁରୀଘାଟ ଥାନା ଅନ୍ତର୍ଗତ ହଜାରିଲେନ୍ ଅଞ୍ଚଳର ଉକ୍ତ ମହିଳାଙ୍କୁ ସାମ୍ବାଦିକା କରାଇଦେବା ନଁାରେ ଜଣେ ଯୁବକ ବ୍ଲାକମେଲ କରିଥିଲେ। ଦୀର୍ଘ ୫ବର୍ଷ ଧରି ତାଙ୍କ ସହ ଅନୈତିକ ସମ୍ପର୍କ ରଖିବା ସହିତ ଟଙ୍କା, ସୁନା ଆଦି ନେଇ ପ୍ରତାରଣା କରିଆସୁଥିଲେ। ତାଙ୍କ କଥାରେ ରାଜି ନ ହେଲେ ଅନ୍ତରଙ୍ଗ ମୁହୂର୍ତ୍ତର ଫଟୋ ସବୁ ଭାଇରାଲ କରିଦେବାର ଧମକ ମଧ୍ୟ ଦେଉଥିଲେ। ସମ୍ପୃକ୍ତ ବ୍ୟକ୍ତିଙ୍କ ସହ ଅନ୍ୟ ଜଣେ ଯୁବକ ସାମିଲ ଥିବା ମହିଳା ଜଣକ ଏତଲାରେ ଦର୍ଶାଇଛନ୍ତି। ଏ ନେଇ ମହିଳା ଥାନା ଆଇଆଇସି ଅନୁସୂୟା ନାୟକ କହିଛନ୍ତି, ସୋମବାର ସେମାନଙ୍କ ମଧ୍ୟରେ କ’ଣ ସବୁ ହୋଇଛି ସେନେଇ ଆମ ପାଖରେ କୌଣସି ତଥ୍ୟ ନାହିଁ। ତେବେ ପୂର୍ବରୁ ମହିଳା ଥାନାରେ ଦୁଇଟି ମାମଲା ରୁଜୁ ହୋଇଥିବାବେଳେ ତଦନ୍ତ ଜାରି ରହିଛି।