ଢେଙ୍କାନାଳ ଅଫିସ, ୩।୮: ଢେଙ୍କାନାଳ ପୌରାଞ୍ଚଳର ୧୫ନଂ. ଓ୍ବାର୍ଡରେ ଥିବା ଏକ ଗେଷ୍ଟହାଉସ୍ରେ ଅନୈତିକ କାର୍ଯ୍ୟ ହେଉଥିବା ମାମଲାରେ ପୋଲିସକୁ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଛି। ବାହାରୁ ଯୁବତୀଙ୍କୁ ଆଣି ଗେଷ୍ଟହାଉସ୍ରେ ରଖି ଦେହ ବ୍ୟବସାୟ କରାଯାଉଥିଲା। ଗେଷ୍ଟ ହାଉସ୍ ମାଲିକଙ୍କ ପୁଅ ଜଣେ ନାବାଳିକାଙ୍କୁ ପ୍ରେମ ନିବେଦନ କରି ବ୍ଲାକମେଲିଂ କରୁଥିଲେ। ଖୋଳତାଡ଼ରୁ ଏପରି ସଙ୍ଗିନ ତଥ୍ୟ ପଦାକୁ ଆସିବା ପରେ ଗେଷ୍ଟହାଉସ୍ ମାଲିକ ବିଶ୍ୱଜିତ ମିଶ୍ର ଓରଫ ଢେଗା (୫୫) ଏବଂ ତାଙ୍କ ପୁଅ ନିଶାନ୍ତ ମିଶ୍ର (୨୦)ଙ୍କୁ ରବିବାର ପୋଲିସ ଗିରଫ କରିଛି। ଗେଷ୍ଟହାଉସକୁ ସିଲ୍ କରାଯାଇଛି। ଘଟଣାସ୍ଥଳରୁ ମୋବାଇଲ, କମ୍ପ୍ୟୁଟର ଏବଂ ଏକ ଚିଠି ଜବତ କରାଯାଇଛି। ଉକ୍ତ ଚିଠି ନାବାଳିକାଙ୍କ ଉଦ୍ଦେଶ୍ୟରେ ଲେଖାଯାଇଥିଲା। ପ୍ରେମ ନ କଲେ ଆତ୍ମହତ୍ୟା କରିବେ ବୋଲି ଅଭିଯୁକ୍ତ ଯୁବକ ଜଣକ ଏଥିରେ ଉଲ୍ଲେଖ କରିଥିବା ପୋଲିସ କହିଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସହରର ଜଣେ ନାବାଳିକାଙ୍କୁ ନିଶାନ୍ତ ପ୍ରେମ ନିବେଦନ କରିବା ସହ ତାଙ୍କ ଅଶ୍ଳୀଳ ଫଟୋକୁ ସୋସିଆଲ ମିଡିଆରେ ପ୍ରଘଟ କରିଦେବେ ବୋଲି ଧମକ ଦେଉଥିଲେ। ପ୍ରେମ ନ କଲେ ଆତ୍ମହତ୍ୟା କରିବେ ବୋଲି ନାବାଳିକା ଉଦ୍ଦେଶ୍ୟରେ ଏକ ନୋଟ୍ ଲେଖିଥିଲେ। ଏ ନେଇ ନାବାଳିକାଙ୍କ ପରିବାର ଟାଉନ୍ ଥାନାର ଦ୍ୱାରସ୍ଥ ହୋଇଥିଲେ। ଏ ସଂକ୍ରାନ୍ତରେ ନଂ. ୩୧୬/୨୦, ଦଫା-୩୪୧, ୨୯୪, ୫୦୬, ୩୫୪ (ଏ), ୩୫୪(ସି) ଓ ୩୪ ଆଇପିସି, ୧୨ ଏବଂ ୧୫ ପୋକ୍ସୋ ଆକ୍ଟ ଓ ୬୭ (ଏ)(ବି) ଆଇଟି ଆକ୍ଟରେ ମାମଲା ରୁଜୁ କରାଯାଇଛି। ଅଭିଯୁକ୍ତ ବାପା ଏବଂ ପୁଅଙ୍କୁ ଗିରଫ କରାଯାଇଥିବା ଥାନାଧିକାରୀ ନମିତା ନାୟକ ସୂଚନା ଦେଇଛନ୍ତି। ସୂଚନାଯୋଗ୍ୟ, ଗେଷ୍ଟହାଉସ୍ରେ ଅନୈତିକ କାର୍ଯ୍ୟ ଚାଲୁଥିବା ସୂଚନା ପାଇବା ପରେ ପୋଲିସ ଶନିବାର ରାତିରେ ଚଢ଼ାଉ କରିଥିଲା। ସେଠାରୁ ଜଣେ ଯୁବତୀଙ୍କୁ ଉଦ୍ଧାର କରି ଥାନାରେ ଅଟକ ରଖି ପଚରାଉଚୁରା କରାଯାଇଥିଲା। ଏହି ଘଟଣାକୁ ନେଇ ନଂ. ୩୧୮/୨୦, ଦଫା ୪ ଓ ୫ ଇମୋରାଲ ଟ୍ରାଫିକିଂ ଆକ୍ଟରେ ଅନ୍ୟ ଏକ ମାମଲା ରୁଜୁ କରାଯାଇଥିବା ଥାନାଧିକାରୀ ସୂଚନା ଦେଇଛନ୍ତି।