ଇସ୍ଲାମାବାଦ, ୩ା୫: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ବିରୋଧରେ ଧର୍ମନିନ୍ଦା ମାମଲା ରୁଜୁ ହୋଇଛି। ପ୍ରଧାନମନ୍ତ୍ରୀ ଶେହବାଜ୍ ଶରିଫ୍ ଗୁରୁବାର ସାଉଦିଆରବ ଗସ୍ତ କରିଥିବାବେଳେ ଇସ୍ଲାମର ଗୁରୁତ୍ୱପୂର୍ଣ୍ଣ ଧାର୍ମିକ ସ୍ଥଳ ମେଦିନାରେ ଶ୍ରଦ୍ଧାଳୁମାନେ ତାଙ୍କୁ ‘ଚୋର’, ‘ଦେଶଦ୍ରୋହୀ’ ବୋଲି କହି ଚିଲାଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ପାକିସ୍ତାନ ତେହରିକ୍-ଏ-ଇନ୍ସାଫ୍ (ପିଟିଆଇ) ଅଧ୍ୟକ୍ଷ ଇମ୍ରାନ୍ ନିଜ ସମର୍ଥକଙ୍କୁ ଏପରି କରିବାକୁ ଉସୁକାଇଥିଲେ ବୋଲି ଅଭିଯୋଗ ହୋଇଛି। ପବିତ୍ର ଧାର୍ମିକସ୍ଥଳ ମେଦିନାରେ ଶେହବାଜ୍ଙ୍କ ବିରୋଧରେ ନାରାବାଜି ଏବଂ ଗୁଣ୍ଡାଗିରି ମାମଲାରେ ଇମ୍ରାନ୍ଙ୍କୁ ଗିରଫ କରାଯିବ ବୋଲି ପାକ୍ ଆଭ୍ୟନ୍ତରୀଣ ମନ୍ତ୍ରୀ ରାଣା ସନାଉଲା କହିଛନ୍ତି। ଶେହବାଜଙ୍କ ବିରୋଧରେ ନାରବାଜି କରିଥିବା ୫ ଜଣଙ୍କୁ ଗିରଫ କରାଯାଇଥିବା ମେଦିନା ପୋଲିସ କହିଛି।