କାବୁଲ,୧୧।୩ : ଦୁଇ ଦିନ ପରେ ଆଫଗାନିସ୍ତାନର ମଜାର-ଇ-ଶରିଫ ସହରରେ ପୁଣିଥରେ ଆତଙ୍କବାଦୀ ଆକ୍ରମଣ ହୋଇଛି। ସହରରେ ଗଣମାଧ୍ୟମ ପ୍ରତିନିଧିମାନଙ୍କ ପୁରସ୍କାର କାର୍ଯ୍ୟକ୍ରମରେ ଶନିବାର ବୋମା ବିସ୍ଫୋରଣ ହୋଇଛି। ଯେଉଁଥିରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୫ ଜଣ ଆହତ ହୋଇଛନ୍ତି। ବାଲ୍ଖ ପୋଲିସର ତାଲିବାନ ଦ୍ୱାରା ନିଯୁକ୍ତ ମୁଖପାତ୍ର ମହମ୍ମଦ ଆସିଫ ୱାଜିରୀ ସୂଚନା ଦେଇଛନ୍ତି ଯେ ଏକ ସମାରୋହରେ ଏହି ବୋମା ବିସ୍ଫୋରଣ ହୋଇଛି।
ଆସିଫ କହିଛନ୍ତି ଯେ ବାଲ୍ଖ ପ୍ରଦେଶର ରାଜଧାନୀ ମଜାର-ଇ-ଶରିଫ ସ୍ଥିତ ତାବିଆନ ଫରହଙ୍ଗ କେନ୍ଦ୍ରରେ ପୂର୍ବାହ୍ନ ସାଢ଼େ ୧୧ଟାରେ ଗଣମାଧ୍ୟମ ପ୍ରତିନିଧିମାନେ ଏକ ପୁରସ୍କାର ବିତରଣ ଉତ୍ସବ ପାଇଁ ଏକାଠି ହୋଇଥିଲେ।
ସୂଚନାଯୋଗ୍ୟ,ଦୁଇ ଦିନ ପୂର୍ବରୁ ମଜାର-ଇ-ଶରିଫରେ ଏକ ବୋମା ବିସ୍ଫୋରଣ ହୋଇଥିଲା। ଯେଉଁଥିରେ ପ୍ରାଦେଶିକ ଗଭର୍ନର ଦାଉଦ ମୁଜମଲ ଏବଂ ଅନ୍ୟ ଦୁଇଜଣଙ୍କର ମୃତ୍ୟୁ ଘଟିଥିବା ବେଳେ ଚାରିଜଣ ଆହତ ହୋଇଥିଲେ।
ମଜାର-ଇ-ସରିଫ ସହରରେ ଶନିବାର ହୋଇଥିବା ବିସ୍ଫୋରଣରେ ମୃତ୍ୟୁ ଘଟିଥିବା ବ୍ୟକ୍ତିଙ୍କ ପରିଚୟ ଜଣା ପଡି ନାହିଁ। କିନ୍ତୁ ଆହତ ହୋଇଥିବା ପାଞ୍ଚ ଜଣଙ୍କ ମଧ୍ୟରେ ଜଣେ ଗଣମାଧ୍ୟମ ପ୍ରତିନିଧି ଅଛନ୍ତି। ଏହି ଆକ୍ରମଣରେ ଆହତଙ୍କ ମଧ୍ୟରେ ଆର୍ଯ୍ୟ ନ୍ୟୁଜ ଟେଲିଭିଜନ ଷ୍ଟେଶନର ଗଣମାଧ୍ୟମ ପ୍ରତିନିଧି ନଜୀବ ଫରିଦ ମଧ୍ୟ ଅଛନ୍ତି।