କାବୁଲ, ୯।୫: ଆଫଗାନିସ୍ତାନ ରାଜଧାନୀ କାବୁଲର ଏକ ମାଧ୍ୟମିକ ସ୍କୁଲ୍ ନିକଟରେ ଶନିବାର ବିସ୍ଫୋରଣ ଘଟିଛି। ଏଥିରେ ୨୫ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୫୨ ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ଅଧିକାଂଶ ଛାତ୍ରୀ। ସ୍କୁଲ୍ ଛୁଟି ପରେ ପିଲାମାନେ ଘରକୁ ଫେରୁଥିବାବେଳେ ବିସ୍ଫୋରଣ ଘଟିଥିଲା। ବିସ୍ଫୋରଣ ସ୍ଥଳରେ ପିଲାମାନଙ୍କ ବ୍ୟାଗ୍ ଏଣେତେଣେ ପଡ଼ିଥିବା ଦେଖାଯାଇଛି। ଆକ୍ରମଣ ପାଇଁ କୌଣସି ସଂଗଠନ ନିଜକୁ ଦାୟୀ କରିନାହାନ୍ତି। ୪୬ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ସ୍ବାସ୍ଥ୍ୟ ମନ୍ତ୍ରଣାଳୟ ମୁଖପାତ୍ର ଗୁଲାମ ଦସ୍ତାଗିର ନାଜାରି ସୂଚନା ଦେଇଛନ୍ତି। ଆଫଗାନିସ୍ତାନରୁ ଆମେରିକା ତା’ର ସୈନ୍ୟ ପ୍ରତ୍ୟାହାର କରିନେବା ଲାଗି ଗତମାସରେ ଘୋଷଣା କରିବା ପରେ କାବୁଲ ହାଇଆଲର୍ଟରେ ରହିଛି। ତାଲିବାନମାନେ ପୁଣି ଥରେ ସକ୍ରିୟ ହୋଇ ବିଭିନ୍ନ ସ୍ଥାନରେ ଆକ୍ରମଣ ଆରମ୍ଭ କରିଦେଇଛନ୍ତି। ଏହାବ୍ୟତୀତ ଶିହା ମୁସଲମାନ ବହୁଳ କାବୁଲ ପଶ୍ଚିମ ଭାଗରେ ଇସ୍ଲାମିକ ଷ୍ଟେଟ୍ (ଆଇଏସ୍) ଆତଙ୍କବାଦୀ ଅନେକ ସମୟରେ ଆକ୍ରମଣ କରିଆସୁଛନ୍ତି।
