କ୍ୱେଟ୍ଟା,୫ା୨: କ୍ୱେଟ୍ଟା ଷ୍ଟାଡିୟମରେ ଏକ ପ୍ରଦର୍ଶନୀ ମ୍ୟାଚ୍ ଖେଳା ଯାଉଥିବା ବେଳେ ଷ୍ଟାଡିୟମର କିଛି ଦୂରରେ ଏକ ଭୟଙ୍କର ବିସ୍ଫୋରଣ ଘଟିଛି। ବିସ୍ଫୋରଣ ସମୟରେ ପାକିସ୍ତାନ ଅଧିନାୟକ ବାବର ଆଜମ ଓ କିମ୍ବଦନ୍ତୀ ଶାହିଦ୍ ଆଫ୍ରିଦି ଷ୍ଟାଡିୟମରେ ଉପସ୍ଥିତ ଥିଲେ। ତେବେ ମ୍ୟାଚ ପରେ ଉଭୟ ଖେଳାଳିଙ୍କୁ ସୁରକ୍ଷିତ ସ୍ଥାନାନ୍ତର କରାଯାଇଥିବା ସୂଚନା ମିଳିଛି।
ଫେବୃୟାରୀ ୧୩ରେ ପାକିସ୍ତାନ ସୁପର ଲିଗ୍ (ପିଏସ୍ଏଲ୍) ଆରମ୍ଭ ହେବ। ବେଲୁଚିସ୍ତାନର ଫ୍ୟାନଙ୍କ ଦାବି ପରେ ପ୍ରଥମ ଥର ଭେନ୍ୟୁର ମାନ୍ୟତା ପାଇଥିବା କ୍ୱେଟ୍ଟାର ନଓ୍ବାବ ଆକବର ବୁଗତି ଷ୍ଟାଡିୟମରେ କ୍ୱେଟ୍ଟା ଗ୍ଲାଡିଏଟର୍ସ ଏବଂ ପେଶାଓ୍ବର ଜାଲମୀ ମଧ୍ୟରେ ପ୍ରଦର୍ଶନୀ ମ୍ୟାଚ୍ ଖେଳାଯାଉଥିଲା। ସେତିକିବେଳେ ଷ୍ଟାଡିୟମର କିଛି ଦୂରରେ ପୋଲିସ କଲୋନୀରେ ଏକ ବିସ୍ଫୋରଣ ଘଟିଥିଲା। ପରେ କଡ଼ା ସୁରକ୍ଷା ମଧ୍ୟରେ ଖେଳାଳିଙ୍କୁ ଡ୍ରେସିଂ ରୁମ୍କୁ ନିଆଯାଇଥିଲା। ହେଲେ ପୋଲିସ ପକ୍ଷରୁ ସବୁଜ ସଙ୍କେତ ପରେ ପୁଣି ମ୍ୟାଚ୍ ହୋଇଥିଲା। ତେହରିକ୍ ଏ ତାଲିବାନ ପାକିସ୍ତାନ(ଟିଟିପି) ଏହି ବିସ୍ଫୋରଣ ପାଇଁ ନିଜକୁ ଦାୟୀ କରିଛି। ଏହି ବିସ୍ଫୋରଣରେ ୫ ଜଣ ଆହତ ହୋଇଥିବା ଜଣାପଡିଛି। କିଛି ଦିନ ତଳେ ପେଶାଓ୍ବରରେ ଏକ ମସ୍ଜିଦ ଭୟଙ୍କର ବିସ୍ଫୋରଣ ଘଟିଥିଲା।
