ଜୁରିକ,୨୫।୩(ଏପି): ବିଶ୍ୱ ଫୁଟ୍ବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ଦ୍ୱିତୀୟଥର ପାଇଁ ପୂର୍ବତନ ଅଧ୍ୟକ୍ଷ ସେପ୍ପ ବ୍ଲାଟରଙ୍କୁ ବାସନ୍ଦ କରିଛି। ୮୫ ବର୍ଷୀୟ ବ୍ଲାଟରଙ୍କ ପ୍ରଥମ ବାସନ୍ଦର ଅବଧି ଶେଷ ହେବାର ୭ ମାସ ପୂର୍ବରୁ ବୁଧବାର ଫିଫା ପୁଣି ଥରେ ତାଙ୍କୁ ବାସନ୍ଦ କରିଛି। ଆର୍ଥିକ ଅନିୟମିତତା ପାଇଁ ଫିଫା ଏହି ନିଷ୍ପତ୍ତି ନେଇଛି।
ବ୍ଲାଟରଙ୍କ ସ୍ବାସ୍ଥ୍ୟାବସ୍ଥା ଏବେ ଖରାପ ରହିଛି। ଗତ ଡିସେମ୍ବରରେ ତାଙ୍କର ହାର୍ଟ ସର୍ଜରୀ କରାଯାଇଥିଲା ଓ ଏହାର ଗୋଟିଏ ସପ୍ତାହ ପରେ ସେ କୋମାକୁ ଚାଲିଯାଇଥିଲେ। ଆର୍ଥିକ ଅନିୟମିତତା କରିଥିବାରୁ ବ୍ଲାଟର ଓ ଫିଫାର ପୂର୍ବତନ ସାଧାରଣ ସମ୍ପାଦକ ଜେରୋମ ଭାଲ୍କେଙ୍କୁ ଯଥାକ୍ରମେ ୬ ଓ ୮ ମାସ ବାସନ୍ଦ କରାଯାଇଛି। ଏହି ଦୁଇ ଫୁଟ୍ବଲ ପ୍ରଶାସକ ସବୁ ନିୟମର ଉଲ୍ଲଂଘନ କରି ନିଜକୁ ଲକ୍ଷ ଲକ୍ଷ ଡଲାରର ଚୁକ୍ତିଭିତ୍ତିକ ବୋନସ ପ୍ରଦାନ କରିଥିଲେ। ଏହି ଦୁଇଜଣଙ୍କ ବିରୋଧରେ ସୁଇଜରଲାଣ୍ଡରେ ଆପରାଧିକ ମାମଲା ଜାରି ରହିଛି। ପ୍ରଥମ ବାସନ୍ଦ ଶେଷ ହେବା ମାତ୍ରେ ଦ୍ୱିତୀୟ ବାସନ୍ଦ ଅବଧି ଲାଗୁ ହେବ ବୋଲି ଫିଫା ତରଫରୁ କୁହାଯାଇଛି।
ପୂର୍ବରୁ ବ୍ଲାଟରଙ୍କୁ ୬ ବର୍ଷ ଓ ଭାଲ୍କେଙ୍କୁ ୧୦ ବର୍ଷ ବାସନ୍ଦ କରାଯାଇଥିଲା। ବ୍ଲାଟରଙ୍କ ପ୍ରଥମ ବାସନ୍ଦ ଆସନ୍ତା ଅକ୍ଟୋବରରେ ଶେଷ ହେଉଛି। ସେହିପରି ଭାଲ୍କେଙ୍କ ପ୍ରଥମ ବାସନ୍ଦ ୨୦୨୫ ଅକ୍ଟୋବରରେ ଶେଷ ହେଉଛି। ଦ୍ୱିତୀୟ ମାମଲାରେ ଉଭୟଙ୍କୁ ୧ ମିଲିୟନ ସୁଇସ୍ ଫ୍ରାଙ୍କ୍ ଜରିମାନ ୩୦ ଦିନ ମଧ୍ୟରେ ଦେବାକୁ କୁହାଯାଇଛି। ସମାନ କାରଣରୁ ପୂର୍ବତନ ଫାଇନାନ୍ସ ଡାଇରେକ୍ଟର ମାର୍କୁସ କାଟ୍ନରଙ୍କୁ ୧୦ ବର୍ଷ ବାସନ୍ଦ କରାଯାଇଥିଲା।