ବାରିପଦା ଅଫିସ,୩ା୧୨- ଜନ୍ମରୁ ଦୁନିଆର ଆଲୋକ ଦେଖି ପାରି ନ ଥିବା କୁନି ଝିଅ ମନରେ ଅସୁମାରୀ ସ୍ବପ୍ନ। ବଡ଼ ହେଲେ ଅନ୍ୟର ସାହାରା ନ ନେଇ ସମାଜରେ ଉଦାହରଣ ସାଜିବେ ବୋଲି ଦୃଢ଼ ଇଛା ଶକ୍ତି ରଖିଛନ୍ତି ସେ। ନିଜ ଭାଇର ସାହାରାରେ ଆଗକୁ ବଢ଼ୁଥିବା ଏହି ଉଚ୍ଚମନା ଝିଅ ହେଲେ ମୟୂରଭଞ୍ଜ ଜିଲା ଶୁଳିଆପଦା ବ୍ଲକ କାଣିମହୁଲୀ ପଞ୍ଚାୟତ ଅନ୍ତର୍ଗତ ପଣ୍ଡୁପାଳ ଗ୍ରାମର ମାଳତୀ ହେମ୍ବ୍ରମ। ୧୩ ବର୍ଷ ବୟସ୍କ ମାଳତୀ ନିତ୍ୟକର୍ମ ସହ ପାଠପଢ଼ାରେ ବେଶ୍ ଆଗ୍ରହ ରଖନ୍ତି। ଦିବ୍ୟାଙ୍ଗ ହୋଇବି ସେ ସବୁ କ୍ଷେତ୍ରରେ ପାରଙ୍ଗମ ହୋଇ ପାରିଛନ୍ତି।
ନିପଟ ମଫସଲରେ ଜନ୍ମ ହୋଇଥିବା ମାଳତୀ ଦୃଷ୍ଟିହୀନ। ପରିବାର କହିଲେ ବାପା ସାଇବା, ମା’ ମୀରୁ, ଭାଇ ରାଜୁ ଓ ସେ। ଦିବ୍ୟାଙ୍ଗ ମାଳତୀଙ୍କୁ ସ୍ନେହଶ୍ରଦ୍ଧାରେ ମାତାପିତା କେବେ ବି ଉଣା କରିନାହାନ୍ତି ା ଗାଁରେ ଥିବା ସରକାରୀ ପ୍ରାଥମିକ ସ୍କୁଲରେ ସପ୍ତମ ଶ୍ରେଣୀରେ ପଢ଼ୁଛନ୍ତି। ଭାଇ ରାଜୁଙ୍କ ହାତ ଧରି ପ୍ରତିଦିନ ସ୍କୁଲକୁ ଯାଉଛନ୍ତିି। ସ୍କୁଲରେ ନାମ ଲେଖାଇବା ପରେ ପ୍ରଥମେ ପାଠପଢ଼ାରେ ସାମାନ୍ୟ ଅସୁବିଧା ହେଉଥିଲା। ଏବେ ସବୁ ଠିକଠାକ୍ ଚାଲିଥିବା ବେଳେ ପଢ଼ା ପ୍ରତି ତାଙ୍କ ଆଗ୍ରହ ବୃଦ୍ଧି ପାଇଛି। ସ୍କୁଲର ସମସ୍ତ କାର୍ଯ୍ୟକ୍ରମରେ ଭାଗ ନେଉଛନ୍ତି। ଗୀତ, ନାଚ ଓ ଅନ୍ୟାନ୍ୟ କାର୍ଯ୍ୟକ୍ଷେତ୍ରରେ ଆଗଭର ହୋଇ ଅଂଶ ଗ୍ରହଣ କରୁଥିବା ଶିକ୍ଷୟିତ୍ରୀ ପୁଷ୍ପଲତା ପାଲ କହିିଛନ୍ତି। ରଙ୍ଗ ଓ ଆଲୋକ ଦେଖିପାରୁ ନ ଥିଲେ ମଧ୍ୟ ସମସ୍ତ ଜିନିଷକୁ ଛୁଇଁ ଅନୁମାନ କରିପାରୁଛନ୍ତି। ସାଙ୍ଗସାଥି ଓ ଭାଇଙ୍କ ସହ ଖେଳାବୁଲା କରୁଛନ୍ତି। ଭାଇ ରାଜୁ ତାଙ୍କ ପାଇଁ ସବୁକିଛି। ତାଙ୍କରି ଆଖିରେ ସେ ଦୁନିଆ ଦେଖୁଥିବା ମାଳତୀ କହିଛନ୍ତି। ଆଦିବାସୀ ପର୍ବପର୍ବାଣୀ ଓ ପରମ୍ପରାରେ ହେଉଥିବା ନୃତ୍ୟର ତାଳ ସହ ପାଦରେ ପାଦ ମିଶାଇ ସେ ନାଚିଥାନ୍ତି ା ତେବେ କୌଣସି ଦିବ୍ୟାଙ୍ଗ ନିଜକୁ ଅସହାୟ ନମଣି ସାହସ ଓ ଇଚ୍ଛାଶକ୍ତି ଦ୍ୱାରା ଆଗକୁ ବଢ଼ିବାକୁ ସେ ପ୍ରେରଣା ଦେଇ ଚାଲିଛନ୍ତି ା