ଦୁନିଆରେ ଏପରି ଅନେକ ସ୍ଥାନ ଅଛି, ଯେଉଁଠାରେ ଅଧିକାଂଶ ଲୋକ ଏହାର ରହସ୍ୟ ବୁଝି ପାରନ୍ତି ନାହିଁ। ଏମିତି ଏକ ଗାଁ ମେକ୍ସିକୋରେ ଅଛି। ଏହି ଗାଁରେ ପିଲାମାନେ ଭଲ ଭାବରେ ଜନ୍ମ ହୁଅନ୍ତି। କିନ୍ତୁ ଜନ୍ମର କିଛି ଦିନ ପରେ, ସେମାନଙ୍କର ଆଖି ନଷ୍ଟ ହୋଇଯାଏ। ଏଠାରେ ମଣିଷଠାରୁ ଆରମ୍ଭ କରି ପଶୁ ପର୍ଯ୍ୟନ୍ତ ସମସ୍ତେ ଅନ୍ଧ ହୋଇଯାଆନ୍ତି। ଏହାକୁ ଅନ୍ଧ ଗାଁ ମଧ୍ୟ କୁହାଯାଏ। ଏହି ଅଦ୍ଭୁତ ଘଟଣା ଯୋଗୁ ଗାଁଟି ପ୍ରସିଦ୍ଧ ଅଟେ।
ମେକ୍ସିକୋର ଟିଲଟେପକ୍ ଗାଁ ଅନ୍ଧମାନଙ୍କ ଗାଁ ଭାବରେ ଜଣାଶୁଣା। ଏହା ହେଉଛି ଦୁନିଆର ଏକମାତ୍ର ଗାଁ, ଯେଉଁଠାରେ କେବଳ ଅନ୍ଧମାନେ ବାସ କରନ୍ତି। ଏହି ଗାଁରେ ଜାପୋଟେକ ଜନଜାତିର ଲୋକମାନେ ବାସ କରନ୍ତି। ଯେତେବେଳେ ଏଠାରେ ଶିଶୁଟିଏ ଜନ୍ମ ହୁଏ, ତା’ର ଆଖି ଭଲ ଥାଏ, କିନ୍ତୁ ସମୟ ସହିତ ସେମାନଙ୍କର ଦୃଷ୍ଟିଶକ୍ତି ହ୍ରାସ ପାଏ।
ଗାଁରେ ରହୁଥିବା ଲୋକମାନେ ଏଠାରେ ଉପସ୍ଥିତ ଥିବା ଏକ ଗଛକୁ ସେମାନଙ୍କର ଅନ୍ଧ ହେବାର କାରଣ ବୋଲି ଭାବନ୍ତି। ଗାଁରେ ଏକ ଅଭିଶାପିତ ଗଛ ଅଛି ବୋଲି ସ୍ଥାନୀୟ ଲୋକ ବିଶ୍ୱାସ କରନ୍ତି। ଏହି ବୃକ୍ଷ ଏହି ଗାଁରେ ବହୁ ବର୍ଷ ଧରି ରହିଆସିଛି। ଲୋକମାନେ ଏହି ବୃକ୍ଷକୁ ଅଭିଶାପର କାରଣ ବୋଲି ବିବେଚନା କରନ୍ତି। ସେମାନେ କହିଛନ୍ତି, ଏହି ଗଛକୁ ଦେଖିବା ମାତ୍ରେ ସେମାନେ ଅନ୍ଧ ହୋଇଯାଆନ୍ତ। କିନ୍ତୁ ଅନେକ ଲୋକ ଏହାକୁ କେବଳ ଅନ୍ଧବିଶ୍ୱାସ ବୋଲି ଭାବନ୍ତି ।
ଅନ୍ୟପକ୍ଷରେ ବିଶେଷଜ୍ଞ ଯୁକ୍ତି ବାଢ଼ନ୍ତି ଯେ, ଏଠାରେ ବହୁ ସଂଖ୍ୟାରେ ଏକ ବିଷାକ୍ତ ମାଛି ଦେଖିବାକୁ ମିଳେ। ଏହି ମାଛି ଲୋକମାନଙ୍କୁ କାମୁଡ଼େ ଏବଂ ଏହା ସହିତ ସେମାନେ ଅନ୍ଧ ହୋଇଯାଆନ୍ତି। ଯେତେବେଳେ ମେକ୍ସିକୋ ସରକାର ଏହି ଗାଁ ବିଷୟରେ ଜାଣିଲେ, ସେମାନେ ଗ୍ରାମବାସୀଙ୍କୁ ସାହାଯ୍ୟ କରିବାକୁ ଚେଷ୍ଟା କଲେ। କିନ୍ତୁ ସମସ୍ତ ଉଦ୍ୟମ ବ୍ୟର୍ଥ ହେଲା। ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରିବାକୁ ସରକାର ଚେଷ୍ଟା କରିଥିଲେ ମଧ୍ୟ ସେମାନଙ୍କ ଶରୀର ଅନ୍ୟ ଜଳବାୟୁ ସହିତ ଖାପ ଖୁଆଇ ପାରି ନ ଥିଲା। ଏହି କାରଣରୁ ଲୋକମାନେ ନିଜ ନିଜ ଅବସ୍ଥାରେ ଚାଲିବା ପାଇଁ ବାଧ୍ୟ ହୋଇଥିଲେ।