ତେଲକୋଇ,୨୨ା୧୧(ଡି.ଏନ.ଏ): ରାଜ୍ୟ ସରକାର ‘୫-ଟି’ ଜରିଆରେ ସରକାରୀ କାର୍ଯ୍ୟରେ ସ୍ବଚ୍ଛତା ଆଣିବାକୁ ପ୍ରୟାସ କରୁଛନ୍ତି। କିଛି ଅସାଧୁ କର୍ମଚାରୀଙ୍କ ପାଇଁ ଯୋଜନା ଏକ ପ୍ରକାର ବିଫଳ ହେଉଛି। ଠିକାଦାରଙ୍କ ସହ ମିଶି ଅନିୟମିତତାକୁ ପ୍ରୋତ୍ସାହିତ କରୁଛନ୍ତି। ଫଳରେ ବିଭିନ୍ନ ଉନ୍ନୟନ କାର୍ଯ୍ୟ ନିମ୍ନମାନର ହେଉଛି। କେନ୍ଦୁଝର ଜିଲା ତେଲକୋଇ ବ୍ଲକ୍ ସମ୍ମୁଖ ପାଖ ପଞ୍ଚାୟତ ସମିତି କାର୍ଯ୍ୟାଳୟର ପାଚେରି ନିର୍ମାଣରେ ଦୁର୍ନୀତିର ଗନ୍ଧ ବାରି ହେଉଛି।
ସୂଚନାଯୋଗ୍ୟ, ବ୍ଲକ୍ କାର୍ଯ୍ୟାଳୟର ସମ୍ମୁଖ ଭାଗରେ ପାଚେରି କାମ ଚାଲିଛି। ଏହା କେତେ ଟଙ୍କାର ପ୍ରକଳ୍ପ, ଲମ୍ବା ଉଚ୍ଚତା କେତେ? ନିର୍ମାଣ ସ୍ଥଳରେ କୌଣସି ସୂଚନାଫଳକ ନ ଥିବାରୁ କାର୍ଯ୍ୟ ସନ୍ଦେହ ଘେରକୁ ଆସିଛି। ଅନ୍ୟପକ୍ଷେ ପାଚେରି କାର୍ଯ୍ୟ କରୁଥିବା ଠିକାଦାର ପାଚେରିରୁ ବାହାରୁଥିବା ଭଲ ଇଟାକୁ ନେଇଯାଉଛନ୍ତି। ଯାହାକି ନୂତନ ଇଟାଠାରୁ ବହୁ ମଜଭୁତ୍। ଏହାକୁ ନେଇ ବାହାରେ ବିକ୍ରି ହେଉଥିବା ଅଭିଯୋଗ ହେଉଛି। ଘଟଣାରେ ବ୍ଲକ୍ ପ୍ରଶାସନ ଚୁପ୍ରହିବା ଅର୍ଥ ଦୁର୍ନୀତିକୁ ପ୍ରୋତ୍ସାହନ ଦେବା ବୋଲି ସ୍ଥାନୀୟ ନାଏବ ସରପଞ୍ଚ ଶୁକେସିନି ପାତ୍ର କହିଛନ୍ତି। ଏ ସମ୍ବନ୍ଧରେ ଗୋଷ୍ଠୀ ଉନ୍ନୟନ ଅଧିକାରୀ ଶାନ୍ତନୁ ନାୟକଙ୍କୁ ପଚାରିବାରୁ ଉକ୍ତ ପ୍ରକଳ୍ପ ପାଇଁ ୯ ଲକ୍ଷ ଟଙ୍କା ଅନୁମୋଦନ ହୋଇଥିବା ପ୍ରକାଶ କରିଥିଲେ। କିନ୍ତୁ ସୂଚନା ଫଳକ ଓ ଇଟା ନେବା ସମ୍ପର୍କରେ ପଚାରିବାରୁ ଏହାର ତଦନ୍ତ କରାଯିବ ବୋଲି କହିଛନ୍ତି।