ଖଲ୍ଲିକୋଟ,୨୦ା୩(ପ୍ରଶାନ୍ତ କୁମାର ମିଶ୍ର): ଗଞ୍ଜାମ ଜିଲା ଖଲ୍ଲିକୋଟ ଥାନା ଅନ୍ତର୍ଗତ ଆଦିବାସୀ ବହୁଳ ଗୁହାରିଆପାଟ ଗ୍ରାମରେ ଦୀର୍ଘଦିନ ଧରି ମଦ ବିକ୍ରି କରୁଥିବା ଅଭିଯୋଗରେ ଗ୍ରାମର ଜଣେ ୬୦ ବର୍ଷୀୟ ବୃଦ୍ଧା ଲକ୍ଷ୍ମୀ ଜାନିଙ୍କୁ ବ୍ରହ୍ମପୁରସ୍ଥିତ ଅବକାରୀ ଗୋଇନ୍ଦା ବିଭାଗ ବୁଧବାର ଥାନାକୁ ଆଣିଥିଲେ। ଏହାର ପ୍ରତିବାଦରେ ଲକ୍ଷ୍ମୀଙ୍କୁ ଅଯଥାରେ ପୋଲିସ ଉଠାଇ ନେଇଥିବା ଅଭିଯୋଗ କରି ତୁରନ୍ତ ତାଙ୍କୁ ଛାଡ଼ିବା ଦାବିରେ ସକାଳ ୮.୩୦ରୁ ଖଲ୍ଲିକୋଟ-ବ୍ରହ୍ମପୁର ମୁଖ୍ୟ ରାସ୍ତାରେ ଟାୟାର ଜାଳି ରାସ୍ତାରୋକୋ କରିଛନ୍ତି। ଆଦିବାସୀମାନେ ହାତରେ ଧନୁତୀର, ଟାଙ୍ଗିଆ, କୁରାଢ଼ି ଆଦି ପାରମ୍ପାରିକ ଅସ୍ତ୍ର ଧରି ରାସ୍ତା ଉପରେ ବସି ରହିଛନ୍ତି। ଅଦ୍ୟାବଧି ରାସ୍ତାରୋକୋ ଚାଲିଥିବା ବେଳେ ଘଟଣାସ୍ଥଳରେ ପୋଲିସ କିମ୍ବା କୌଣସି ପ୍ରଶାସନିକ ଅଧିକାରୀ ପହଞ୍ଚି ନାହାନ୍ତି। ଆମେ ମଦ ବିକ୍ରି କରୁ ନାହୁଁ। ଆମର ଗୋଟିଏ ଛୋଟିଆ ଜଳଖିଆ ଦୋକାନ ଅଛି। ଆମେ ମା’ ଝିଅ ସେଠାରେ ଥିଲୁ। ପୋଲିସ ଆସି କବାଟ ବାଡେଇଲା। ମୁଁ କବାଟ ଖୋଲି ଦେବାରୁ ପୋଲିସ ଆସି ମାଆକୁ ଉଠେଇ ନେଲା। ମୁଁ ଯେତେ ପଚାରିଲେ ମଧ୍ୟ ସେମାନେ କିଛି କହିଲେ ନାହିଁ ବୋଲି ଝିଅ କୁମାରୀ ଜାନି ଅଭିଯୋଗ କରିଛନ୍ତି। ଯେଉଁ ପର୍ଯ୍ୟନ୍ତ ଆମ ମାଆଙ୍କୁ ପୋଲିସ ଛାଡ଼ିନାହିଁ ସେ ପର୍ଯ୍ୟନ୍ତ ରାସ୍ତାରୋକୋ ଜାରି ରହିବ ବୋଲି ଆଦିବାସୀମାନେ କହିଛନ୍ତି। ଏପଟେ ବର୍ଷା ଲାଗିରହିଥିବା ବେଳେ ରାସ୍ତାରୋକୋରୁ ଜରୁରିକାଳୀନ କାମରେ ଯାଉଥିବା ଲୋକେ ପ୍ରବଳ ହଟହଟାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି।