![](https://www.dharitri.com/wp-content/uploads/2024/04/Untitled-1-48.jpg)
ନିିଶ୍ଚିନ୍ତକୋଇଲି,୫।୪(ଅଶୋକ କୁମାର ମହାପାତ୍ର): ଠିକାଦାର ରାସ୍ତା ନିର୍ମାଣ ନିମନ୍ତେ ଦୀର୍ଘ ବର୍ଷର ଏକ କେନାଲକୁ ପୋତି ଦେଇଥିବାର ଚାଷୀମହଲରେ ଅଭିଯୋଗ ହୋଇଛି। ଫଳରେ ଚାଷୀମାନେ ଚଳିତ ବର୍ଷ ଚାଷ ଜମିରେ ଜଳସେଚନ ନିମନ୍ତେ ନାହିଁ ନଥିବା ଦୁର୍ଦ୍ଦଶାର ସମ୍ମୁଖୀନ ହେବା ନେଇ ଆଶଙ୍କା ପ୍ରକାଶ ପାଇଛି। ନିଶ୍ଚିନ୍ତକୋଇଲି ଗ୍ରାମ୍ୟଉନ୍ନୟନ ଓ କେନ୍ଦୁପାଟଣା ଜଳସମ୍ପଦ ବିଭାଗ ମଧ୍ୟରେ ସମନ୍ବୟର ଅଭାବ ଯୋଗୁ ଏପରି ଅସୁବିଧା ହୋଇଥିବା ଚର୍ଚ୍ଚା ହେଉଛି।
ନିଶ୍ଚିନ୍ତକୋଇଲି ବ୍ଲକ ନତକାଇ ବୁଢୀ ଜାଗୁଳାଇ ଠାକୁରାଣୀ ମନ୍ଦିର ଠାରୁ ମନ୍ଦିର ମହାଜନପୁର(ବାହାବଳପୁର ଛକ) ପର୍ଯ୍ୟନ୍ତ ୬ କିମି ଗାଡଓ୍ବାଲ ରାସ୍ତା ନିର୍ମାଣ ନିମନ୍ତେ ସରକାର ୪କୋଟି ୬୦ ଲକ୍ଷ ୪୦ହଜାର ଟଙ୍କା ଅର୍ଥ ମଞ୍ଜୁର କରିଛନ୍ତି। ଟେଣ୍ଡର ମାଧ୍ୟମରେ ଠିକାଦାର ଚୟନ କରାଯାଇଛି। ମାହାଙ୍ଗା ବିଧାୟକ ପ୍ରତାପ ଜେନା ଗତ ମାର୍ଚ୍ଚ ୪ରେ ଏହି ରାସ୍ତାର ଶିଳାନ୍ୟାସ କରିଥିଲେ। ରାସ୍ତା ନିର୍ମାଣ ଦାୟିତ୍ୱ ନିଶ୍ଚିନ୍ତକୋଇଲି ଗ୍ରାମ୍ୟ ଉନ୍ନୟନ ବିଭାଗ କରୁଥିଲା। ନିର୍ମାଣାଧୀନ ରାସ୍ତାଟି ୮ ବି କେନାଲ ପାର୍ଶ୍ୱରେ ଅବସ୍ଥିତ। ଏହି କେନାଲଟି ଉପରେ ଦୀର୍ଘ ବର୍ଷ ହେଲା ଜଳସେଚନ ନିମନ୍ତେ ସ୍ଥାନୀୟ ନିଶ୍ଚିନ୍ତକୋଇଲି , ନତକାଇ ଓ ଜିଗ୍ନିପୁର ପଞ୍ଚାୟତର ବହୁ ଚାଷୀ ନିର୍ଭରଶୀଳ। ଗତ କିଛି ବର୍ଷ ହେଲା ଏହି କେନାଲକୁ ଜଳସମ୍ପଦ ବିଭାଗର ଜ୍ଞାତସାରରେ କେତେଜଣ ପ୍ରଭାବଶାଳୀ ବ୍ୟକ୍ତି ଜବରଦଖଲ କରି ସ୍ଥାୟୀ ଗୃହ ନିର୍ମାଣ କରିଥିଲେ। ତେବେ ଅବଶିଷ୍ଟ ଅଞ୍ଚଳର ଲୋକେ ଜଳସେଚନ ସୁବିଧା ପାଇପାରିଥିଲେ। ଏହି କେନାଲ ନିର୍ମାଣ ନିମନ୍ତେ ସରକାର ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିଥିଲେ। ମାତ୍ର କେନ୍ଦୁପାଟଣା ଜଳସମ୍ପଦ ବିଭାଗଠାରୁ ଅନୁମତି ନ ନେଇ ନିଶ୍ଚିନ୍ତକୋଇଲି ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏଠାରେ ମନମୁଖିଭାବେ ରାସ୍ତା ନିର୍ମାଣ କରାଯାଉଛି। ଏପରିକି ଗ୍ରାମ୍ୟ ଉନ୍ନୟନ ବିଭାଗ ତରଫରୁ କେନାଲକୁ ସମ୍ପୂର୍ଣ୍ଣଭାବେ ପୋତି ଦିଆଯାଇଥିବା ନେଇ ଚାଷୀ ମହଲରେ ଅଭିଯୋଗ ହୋଇଛି। ଏସମ୍ପର୍କରେ ଚାଷୀମାନେ ବାରମ୍ବାର ଅଭିଯୋଗ କରିଥିଲେ ମଧ୍ୟ ଏଥିପ୍ରତି କେହିହେଲେ କର୍ଣ୍ଣପାତ କରୁ ନଥିବାର ସେମାନେ କହିଛନ୍ତି। ଫଳରେ ଆଗାମୀ ଦିନରେ ସ୍ଥାନୀୟ ଅଞ୍ଚଳର ଶତାଧିକ ଏକର ଚାଷ ଜମି ଜଳସେଚନରୁ ବଞ୍ଚତ୍ତ ହେବା ନେଇ ଆଶଙ୍କା ପ୍ରକାଶ ପାଇଛି। ଜଳ ସମ୍ପଦ ବିଭାଗ ତରଫରୁ ତୁରନ୍ତ ଏଦିଗରେ ପଦକ୍ଷେପ ଗ୍ରହଣ କରାନଗଲେ ଆଗାମୀ ଦିନରେ ଏଠାରେ ଚାଷୀ ଆନ୍ଦୋଳନକୁ ଏଡାଇ ଦିଆଯାଇନପାରେ ବୋଲି ସାଧାରଣରେ ମତପ୍ରକାଶ ପାଇଛି। ଏ ସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀ ଉର୍ମି ପ୍ରିୟଦର୍ଶିନୀ ଦାସ କୁହନ୍ତି କେନାଲ ବନ୍ଧ ହୋଇଥିବାରୁ ରାସ୍ତାର ସ୍ଥାୟିତ୍ୱ ପାଇଁ ଗାର୍ଡୱାଲ ନିର୍ମାଣ କରାଯାଇଛି। ଏନେଇ ଜଳସେଚନ ବିଭାଗ ସହ ବିଚାର ବମର୍ଷ ଚାଲିଛି। ଖୁବ୍ଶୀଘ୍ର ଏହାର ସମାଧାନ କରାଯାଇ କାର୍ଯ୍ୟ ତ୍ୱରାନ୍ବିତ କରାଯିବ। ଏନେଇ ଜଳସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଅକ୍ଷୟ ମଲିକଙ୍କୁ ମୋବାଇଲ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ସେ
କଲ ଉଠାଇ ନଥିଲେ। ସୂଚନାଯୋଗ୍ୟ, କେବଳ ଏହି ରାସ୍ତା ନୁହେଁ ବ୍ଲକର ବହୁ କେନାଲ ବନ୍ଧ ରାସ୍ତାକୁ ଗାମ୍ୟ ଉନ୍ନୟନ ବିଭାଗ ପକ୍ଷରୁ ମନମୁଖି ଭାବେ କେନାଲ ପୋତି ରାସ୍ତା ନିର୍ମାଣ କରାଯାଉଥିବା ଅଭିଯୋଗ ହୋଇଛି। ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ଦାବି କରାଯାଇଛି।