ଅନୁଗୋଳ ଅଫିସ, ୧୪ା୧୦ – ଅନୁଗୋଳ ସହରର ବିକାଶ ହେବ। ପାନୀୟ ଜଳ ସମସ୍ୟାର ସମାଧାନ ସହ ସ୍ଥାନେ ସ୍ଥାନେ ଓ୍ବାଟର ଏଟିଏମ୍ ସ୍ଥାପନ କରାଯିବ। ଲୋକଙ୍କ ମନୋରଞ୍ଜନ ପାଇଁ ସ୍ମାର୍ଟ ପାର୍କ ନିର୍ମାଣ ହେବ। ଏଲ୍ଇଡି ଜରିଆରେ ସରକାରୀ ଯୋଜନା ସମ୍ପର୍କରେ ପ୍ରଚାର ପ୍ରସାର କରାଯିବ। ଜିଲା ପ୍ରଶାସନ ଓ ପୌରପାଳିକା ପକ୍ଷରୁ ଏଥିପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ସରିଛି। କେତୋଟି କାର୍ଯ୍ୟ ପାଇଁ ଟେଣ୍ଡର ପ୍ରକ୍ରିୟା ମଧ୍ୟ ଆରମ୍ଭ ହୋଇଛି।
ଅନୁଗୋଳ ସହରର ରୂପରେଖ ବଦଳାଇବା ପାଇଁ ପୌର ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି। ସହରବାସୀଙ୍କୁ ବିଶୁଦ୍ଧ ପାନୀୟ ଜଳ ସେବା ପ୍ରଦାନ କରିବାକୁ ପୌରପାଳିକା ସମ୍ମୁଖରେ ପ୍ରଥମେ ଏକ ୱାଟର ଏଟିଏମ୍ ଖୋଲାଯାଇଥିଲା। ଏହାର ଚାହିଦା ବଢ଼ିବା ସହ ଲୋକେ ଗହଳି କରୁଥିବାରୁ ଅନ୍ୟ ଦୁଇଟି ସ୍ଥାନରେ ୱାଟର ଏଟିଏମ୍ ଖୋଲିବା ପାଇଁ ଜିଲାପାଳ ନିର୍ଦ୍ଦେଶ ଦେଇଥିଲେ। ତେଣୁ ସହରର ବସ୍ଷ୍ଟାଣ୍ଡ ଓ ଜଗନ୍ନାଥ ମନ୍ଦିର ନିକଟସ୍ଥ ଗୋପବନ୍ଧୁ ପାର୍କ ପାର୍ଶ୍ୱରେ ଏହି ୱାଟର ଏଟିଏମ୍ ଖୋଲାଯିବ। ଟଙ୍କାଟିଏ ଦେଇ ଲୋକମାନେ ଏହି ଏଟିଏମ୍ରୁ ଗୋଟିଏ ଲିଟର ବିଶୁଦ୍ଧ ପାନୀୟ ଜଳ ପାଇ ପାରିବେ। ସେହିପରି ନୂତନ ବସ୍ଷ୍ଟାଣ୍ଡ ପଛପାର୍ଶ୍ୱରେ ଏକ ସ୍ମାର୍ଟ ପାର୍କ ନିର୍ମାଣ କରାଯିବ। ଏ ନେଇ ଟେଣ୍ଡର ପ୍ରକ୍ରିୟା ମଧ୍ୟ ଶେଷ ହୋଇଛି। କୋଟିଏ ଟଙ୍କା ବ୍ୟୟରେ ଏହି ପାର୍କରେ ସହରବାସୀଙ୍କ ଆମୋଦପ୍ରମୋଦ ପାଇଁ ଅତ୍ୟାଧୁନିକ ସୁବିଧା ରଖାଯିବ। ପୂର୍ବରୁ ସହରର ବିଭିନ୍ନ କୋଣ ଓ ଜନଗହଳି ପୂର୍ଣ୍ଣ ସ୍ଥାନରେ ପୌରପ୍ରଶାସନ ପକ୍ଷରୁ ହୋର୍ଡିଂ ଲଗାଯାଇ ବିଜ୍ଞାପନ ବ୍ୟବସ୍ଥା କରାଯାଉଥିଲା। ଏବେ କିନ୍ତୁ ପ୍ରଥମ କରି ଏଲ୍ଇଡିରେ ସରକାରୀ ଯୋଜନାର ପ୍ରଚାର ଓ ପ୍ରସାର ହେଉଥିବା ଅନୁଗୋଳବାସୀ ଦେଖିବେ। ଜିଲାପାଳଙ୍କ କାର୍ଯ୍ୟାଳୟ ମୁଖ୍ୟ ଫାଟକ ସହ ପୌରପାଳିକା ମୁଖ୍ୟ ଫାଟକ ସମ୍ମୁଖରେ ପ୍ରଥମେ ଏହା ଲାଗିବ। ପରେ ଜନଗହଳିପୂର୍ଣ୍ଣ ସ୍ଥାନରେ ଏଲ୍ଇଡି ଲଗାଯିବାର ବ୍ୟବସ୍ଥା କରାଯାଉଛି। ଆସନ୍ତା ସପ୍ତାହରେ ଏହି କାର୍ଯ୍ୟ ଆରମ୍ଭ ହେବାର ଅନୁମାନ କରାଯାଉଛି ବୋଲି ପୌରପାଳିକା ପକ୍ଷରୁ ସୂଚନା ମିଳିଛି।
ସହରବାସୀଙ୍କ ସ୍ବାର୍ଥ ପାଇଁ ଯୋଜନା
ଅନୁଗୋଳ ସହରବାସୀଙ୍କ ପାଇଁ ବିଭିନ୍ନ ଯୋଜନା କରାଯାଉଛି। ଏହା କେବଳ ସହରର ସୌନ୍ଦର୍ଯ୍ୟ ବଢ଼ାଇବ ନାହିଁ ବରଂ ଗର୍ବର ବିଷୟ ହେବ। ସ୍ମାର୍ଟ ପାର୍କ ସହ ବିଶୁଦ୍ଧ ପାନୀୟ ଜଳର ବ୍ୟବସ୍ଥା, ୱାଟର ଏଟିଏମ୍ କରାଯିବ। ଏହାଦ୍ୱାରା ପୌରପାଳିକାର ରାଜସ୍ବ ମଧ୍ୟ ବୃଦ୍ଧି ପାଇବ।
-ବିନୋଦ ଚନ୍ଦ୍ର ପଣ୍ଡା, ପୌର ନିର୍ବାହୀ ଅଧିକାରୀ, ଅନୁଗୋଳ
ୱାଟର ଏଟିଏମ୍ ଜରୁରୀ
ସହରରେ ପାନୀୟ ଜଳ ସମସ୍ୟା ରହିଛି। ୱାଟର ଏଟିଏମ୍ ହେଲେ ଲୋକମାନେ ସୁବିଧାରେ ବିଶୁଦ୍ଧ ପାନୀୟ ଜଳ ପାଇପାରିବେ। ଗୋପବନ୍ଧୁ ପାର୍କରେ ଏହା ହେଉଥିବାରୁ ସହରକୁ ଆସୁଥିବା ଲୋକମାନେ ମଧ୍ୟ ସୁବିଧା ନେବେ। ଏଭଳି ବ୍ୟବସ୍ଥା ବିଭିନ୍ନ ସ୍ଥାନରେ କରାଯାଉ।
-ଭବାନୀ ଶଙ୍କର ପ୍ରଧାନ, ହୁଲୁରୁସିଂହା ବାସିନ୍ଦା
ସ୍ମାର୍ଟ ପାର୍କ ସ୍ବାଗତଯୋଗ୍ୟ ପଦକ୍ଷେପ
ସହରରେ ଏକାଧିକ ପାର୍କ ଅଛି। କିନ୍ତୁ ଅତ୍ୟାଧୁନିକ ସୁବିଧା ଥିବା ସ୍ମାର୍ଟ ପାର୍କ ନିଶ୍ଚିତ ସ୍ବାଗତ୍ୟଯୋଗ୍ୟ ପଦକ୍ଷେପ। ଏହା ସହରବାସୀଙ୍କ ମନୋରଞ୍ଜନର ଏକ ବଡ଼ ମାଧ୍ୟମ ହେବ। ତେବେ ଏହାର ରକ୍ଷଣବେକ୍ଷଣା ପ୍ରତି ପୌରପାଳିକା ଆବଶ୍ୟକ ଧ୍ୟାନ ଦେବା ଆବଶ୍ୟକ।
-ମମତା ଧୀରସାମନ୍ତ, ଅନୁଗୋଳ ବାସିନ୍ଦା
ବେସରକାରୀ ବିଜ୍ଞାପନ ସୁବିଧା ରହୁ
ସହରରେ ପ୍ରଥମ କରି ଏଲଇଡିରେ ସରକାରୀ ଯୋଜନାର ପ୍ରଚାର ପ୍ରସାର କରାଯିବାର ବ୍ୟବସ୍ଥା ଭଲ କଥା। ହେଲେ କେବଳ ସରକାରୀ କାହିଁିକି, ବେସରକାରୀ ବିଜ୍ଞାପନ ପାଇଁ ସୁଯୋଗ ରହିଲେ ଭଲ ହୁଅନ୍ତା। କେଉଁ ସମୟରେ ବଜାରରେ କ’ଣ ଅଫର୍ ରହୁଛି, ତାହା ଲୋକେ ଜାଣିପାରନ୍ତେ।
-ବିକ୍ରମ ଅଗ୍ରୱାଲ, ବ୍ୟବସାୟୀ