କାଳିଆପାଣି,୨୪ା୪(ଡି.ଏନ.ଏ.): ଯାଜପୁର ଜିଲା କାଳିଆପାଣି ଖଣି ଅଞ୍ଚଳରେ କ୍ରୋମାଇଟ୍, ଆଇରନ ଓ ପାରାସନାଇଟ ନୀଳପଥର ଆଦି ରହିଥିବା ବେଳେ ୯୫ ପ୍ରତିଶତ କ୍ରୋମାଇଟ ରହିଛି। ତେବେ ଏହି ଧାତୁ ଉପରେ ସରକାରଙ୍କ ନଜର ପଡ଼ି ନ ଥିବା ବେଳେ ଚୋରା ମାଫିଆଙ୍କ ନଜର ପଡ଼ିଛି। ଏବେ ଖୋଲାଖୋଲି ଭାବେ ନୀଳପଥର ଚୋରାଚାଲାଣ ହେଉଥିବା ଅଭିଯୋଗ ହେଉଛି। ସ୍ଥାନୀୟ ପୋଲିସ ଓ ବନ ବିଭାଗର ନିଷ୍କ୍ରିୟତା ଚୋରା ବେପାରୀଙ୍କ ପାଇଁ ଭୂସ୍ବର୍ଗ ପାଲଟିଛି।
୨୦୧୪ରେ ଚୋରା ବେପାରୀମାନେ ନୀଳପଥର ଚୋରାଚାଲାଣ କରିବା ଆରମ୍ଭ କରିଥିଲେ। ପରବର୍ତ୍ତୀ ସମୟରେ ୨୦୧୬ରେ କାଳିଆପାଣି ଥାନା ଅଧିକାରୀ ଚୋରାଚାଲାଣ ରୋକିବାକୁ ଚଢ଼ାଉ କରିଥିଲେ। ଏପରି କି ରାଜସ୍ଥାନରୁ ଚୋରା ନୀଳପଥର ଜବତ କରିବା ସହ ଚୋରା ବେପାରୀଙ୍କୁ ଗିରଫ କରିଥିଲେ। ଏହାପରେ ନୀଳପଥର ବେପାରୀଙ୍କ ଚୋରାଚାଲାଣରେ ରୋକ ଲାଗିଥିଲା। ତେବେ କିଛି ଦିନରେ ବିରତି ପରେ ପୁଣି ଏବେ ଚୋରାଚାଲାଣ ନୀଳପଥର ବେପାରୀ ସକ୍ରିୟ ହୋଇ ଉଠିଛନ୍ତି। ସେମାନେ ସ୍ଥାନୀୟ ଲୋକଙ୍କୁ ନୀଳପଥର ସଂଗ୍ରହ କାମରେ ଲଗାଇ ଝୁଡିକୁ ୫୦ ଟଙ୍କା ଦେଇ କିଣିନେଉଥିବା କେତେଜଣ ଗାଁ ଲୋକଙ୍କଠାରୁ ଶୁଣିବାକୁ ମିଳିଛି। ପ୍ରତିଦିନ ଚୋରା ବେପାରୀ ବେଧଡ଼କ ଭାବେ ଗାଡ଼ି ଲଗାଇ ନୀଳପଥର ଚୋରାଚାଲାଣ କରୁଥିବା ଦେଖିବାକୁ ମିଳିଛି। ଗାଁଲୋକ ଛୋଟ ପଥର ଗୋଟାଇବା ସହ ବଡ଼ପଥର ଛୋଟଛୋଟ ଖଣ୍ଡ କରି ବସ୍ତାରେ ପୂରାଇ ଚାଲାଣ କରୁଥିବା ଅଭିଯୋଗ ହେଉଛି। ରାସ୍ତାଠାରୁ ଅଳ୍ପ ଦୂରରେ ନୀଳ ପଥରକୁ ଜଙ୍ଗଲର ବୁଦୁବୁଦିଆ ବଣମଧ୍ୟରେ ଲୁଚାଇ ରଖି ଅଖାରେ ଭର୍ତ୍ତି କରି ଚାଲାଣ କରାଯାଉଛି।
ତେବେ ପାହାଡ଼ ପାଦଦେଶରେ ବନ ବିଭାଗର କାର୍ଯ୍ୟାଳୟ ରହିଥିବାବେଳେ ପ୍ରତିଦିନ ସେ ଅଞ୍ଚଳକୁ ଅଧିକାରୀ ଗସ୍ତ କରୁଛନ୍ତି। କିନ୍ତୁ ସାଧାରଣ ଲୋକ ଗଲେ ଏସବୁ କାରବାର ସେମାନଙ୍କ ନଜର ପଡୁଥିବା ବେଳେ ବନ ବିଭାଗ ଅଧିକାରୀଙ୍କ ନଜର କିପରି ପଡୁନାହିଁ ତାହା ଲୋକଙ୍କ ମନରେ ବନ ବିଭାଗ କାର୍ଯ୍ୟ ପ୍ରତି ସନ୍ଦେହ ସୃଷ୍ଟି କରିଛି। କାଳିଆପାଣି ଓ ଟମକା ଥାନା ପୋଲିସ ନଜର ଦେଲେ ଚୋରାଚାଲାଣ ରୋକିପାରନ୍ତା। ତେବେ କାହିଁକି ପୋଲିସ ପଥର ଚୋରାଚାଲାଣ ରୋକିବାରେ ପ୍ରୟାସ କରୁନି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ପ୍ରତିକ୍ରିୟା ଲାଗି କାଳିଆପାଣି ଥାନା ଅଧିକାରୀ ସୁଶାନ୍ତ କୁମାର ଦାସଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳି ପାରିନାହିଁ। ବନ ବିଭାଗ ପକ୍ଷରୁ ଫରେଷ୍ଟର ଗଣେଶ୍ବର ଦାସଙ୍କୁ ପଚାରିବାରେ ସେ କହିଛନ୍ତି, ପଥର ଚୋରା ଚାଲାଣ ସମ୍ପର୍କରେ ଖବର ମିଳିଲେ ଚଢ଼ାଉ କରାଯାଇ ବନ୍ଦ କରାଯାଉଛି। ଆଗକୁ ଚଢ଼ାଉ ଜାରି ରହିବ।
