କାଳିଆପାଣି,୧୧ା୭(ଅସିତ ମହାନ୍ତ): ଯାଜପୁର ଜିଲା ସୁକିନ୍ଦା ବ୍ଲକ ଅନ୍ତର୍ଗତ କାଳିଆପାଣି ଖଣି ଅଞ୍ଚଳରେ କ୍ରୋମାଇଟ ବ୍ୟତୀତ ଏକ ମୂଲ୍ୟବାନ ନୀଳପଥର ବହୁଳ ମାତ୍ରାରେ ମିଳୁଛି। ହେଲେ ତାହାର ଗୁରୁତ୍ୱକୁ ସରକାର ଅଣଦେଖା କରୁଛନ୍ତି। ଏଥିସହିତ ବିଭାଗୀୟ ଅଧିକାରୀଙ୍କ ଅପାରଗତା ଯୋଗୁ ଧୀରେଧୀରେ ଏହାର ଚୋରା କାରବାର ବୃଦ୍ଧି ପାଉଛି। ବ୍ଲକ୍ ଅଧୀନ କଅଁସ ପଞ୍ଚାୟତର ଟିକରପଡ଼ା ଗଁା ନିକଟ ଦୈତାରୀ ସଂରକ୍ଷିତ ପାହାଡ଼ରେ ନୀଳ ଓ ଧୁସର ପଥର ବହୁଳ ଭାବେ ମିଳୁଛି। ୭ ବର୍ଷ ପୂର୍ବରୁ ଏହା ଚୋରାଚାଲାଣ ହେଉଥିବା ପ୍ରଥମେ ନଜରକୁ ଆସିଥିଲା। ଟିକରପଡ଼ା ଗାଁ ପାହାଡ଼ ପର୍ବତ ଘେରା ହୋଇ ରହିଥିବାରୁ ବାହାର ଦୁନିଆଁ ସହ ସମ୍ପର୍କ ନ ଥିଲା। ଏହାର ସୁଯୋଗରେ ସ୍ଥାନୀୟ ଲୋକଙ୍କ ଦ୍ବାରା ମୂଲ୍ୟବାନ ପଥର ସଂଗ୍ରହ କରାଯାଇ ତାହାକୁ ସିମେଣ୍ଟ୍ ବସ୍ତାରେ ଭର୍ତ୍ତି କରି ରାଜସ୍ଥାନକୁ ଚାଲାଣ ହେଉଥିଲା। ଏନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ତତ୍କାଳୀନ କାଳିଆପାଣି ଥାନା ଅଧିକାରୀ ଯୁବରାଜ ସ୍ବାଇଁ ରାଜସ୍ଥାନ ଯାଇ ଚୋରା ନୀଳପଥର ଜବତ କରିବା ସହ ଚୋରା ଚାଲାଣରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଥିଲେ। ସେ ସମୟରେ ସମ୍ପୃକ୍ତ ଅଞ୍ଚଳରେ ମାଓବାଦୀଙ୍କ ଗତିବିଧି ଥିବାରୁ ଏକ ପ୍ରକାର କୋକୁଆ ସୃଷ୍ଟି ହୋଇଥିଲା। ଏହାର ସୁଯୋଗ ନେଇ ଚୋରାଚାଲାଣକାରୀ ବେଧଡ଼କଭାବେ କାରବାର କରୁଥିଲେ। ପୋଲିସର ଚଢ଼ାଉ ପରେ ସେ ସମୟରେ ଚୋରାଚାଲାଣ ବନ୍ଦ ହୋଇଯାଇଥିଲା। ମାତ୍ର କିଛିଦିନ ପରେ ପୋଲିସର କାର୍ଯ୍ୟ ଶିଥିଳତା ପଡ଼ିଥିଲା। ଫଳରେ ମାଫିଆ ପୁଣି ସକ୍ରିୟ ହୋଇ ଉଠିଥିଲେ। ଏବେ ମାଫିଆମାନେ ନୀଳପଥରକୁ ଲୋକଙ୍କ ଦ୍ବାରା ସଂଗ୍ରହ କରି ବିଭିନ୍ନ ଛୋଟ ଗାଡ଼ିରେ ଜଙ୍ଗଲ ରାସ୍ତା ଦେଇ ଢେଙ୍କାନାଳ ଜିଲାକୁ ଚାଲାଣ କରୁଛନ୍ତି। ଆଗ ଅପେକ୍ଷା ଏବେ ମାଫିଆ ଅଧିକ ସକ୍ରିୟ ହୋଇ ସପ୍ତାହରେ ୨/୩ ଟ୍ରିପ ପଥର ନେଉଥିବା ପ୍ରତ୍ୟକ୍ଷଦର୍ଶୀମାନେ ପ୍ରକାଶ କରିଛନ୍ତି।
ଅନ୍ୟପକ୍ଷରେ ଏତେମାତ୍ରାରେ ନୀଳପଥର ଚାଲାଣ ହେଉଥିଲେ ମଧ୍ୟ ସ୍ଥାନୀୟ ଲୋକେ ତା’ର ମହତ୍ତ୍ୱ ବିଷୟରେ ଅଜ୍ଞ ଅଛନ୍ତି। ସେଥିପାଇଁ ଏକ ଝୁଡ଼ି ନୀଳପଥରକୁ ସଂଗ୍ରହ କରି ଚୋରା ବେପାରୀଙ୍କୁ ଦେଲେ ସେମାନେ ୫୦ ଟଙ୍କା ମଜୁରୀ ପାଉଛନ୍ତି। ଏଠାରେ ପ୍ରଶ୍ନ ଉଠେ ଟିକରପଡ଼ା ପାହାଡ ସଂଲଗ୍ନରେ କଅଁସ ଫରେଷ୍ଟ ଅଫିସ ରହିଥିବାବେଳେ ଫରେଷ୍ଟର ପ୍ରତିଦିନ ସକାଳୁ ସେ ଅଞ୍ଚଳକୁ ବୁଲିବାକୁ ଯାଉଛନ୍ତି। ହେଲେ ତାଙ୍କ ନଜରକୁ କିପରି ଏ ଘଟଣା ଆସୁନାହିଁ। ଏ ସମ୍ପର୍କରେ କାଳିଆପାଣୀ ଥାନା ଅଧିକାରୀ ସୁଶାନ୍ତ କୁମାର ଦାସଙ୍କୁ ପଚାରିବାରେ ସେ ଏହା ଉପରେ ନଜର ଦେବେ ବୋଲି ପ୍ରକାଶ କରିଛନ୍ତି। ଏ ସମ୍ପର୍କରେ ଟମକା ରେଞ୍ଜ ଅଫିସରଙ୍କ ମତାମତ ନେବାକୁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନାହିଁ।