ଭୁବନେଶ୍ୱର,୧୯।୧(ବ୍ୟୁରୋ): ଇ-ରିକ୍ସାରେ ବସି ବିଏମ୍ସି କମିଶନର ତଥା କ୍ରୁଟ ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ ଏକାମ୍ର କ୍ଷେତ୍ର ପରିଭ୍ରମଣ କରିଛନ୍ତି। ହକି ବିଶ୍ୱକପ୍କୁ ଦୃଷ୍ଟିରେ ରଖି କ୍ରୁଟ୍ ପକ୍ଷରୁ ‘ହେରିଟେଜ୍ ଅନ୍ ମୋ ଇ-ରାଇଡ୍’ ସେବା ପ୍ରଦାନ କରାଯାଉଛି। ତେବେ ଲୋକଙ୍କୁ ଏହି ସେବା ସମ୍ପର୍କରେ ଅବଗତ କରିବା ପାଇଁ କୁଲାଙ୍ଗେ ଏହି ଯାତ୍ରା କରିଛନ୍ତି। ଏକାମ୍ର କ୍ଷେତ୍ର ବୁଲିବାକୁ ଚାହଁଥିବା ନାଗରିକ ଓ ପର୍ଯ୍ୟଟକ ଇ-ରିକ୍ସାରେ ଆସନ୍ତା ୨୯ ତାରିଖ ପର୍ଯ୍ୟନ୍ତ ଏହି ସେବା ପାଇପାରିବେ। ଏକାମ୍ର କ୍ଷେତ୍ର ଓ ଅନ୍ୟାନ୍ୟ ଦର୍ଶନୀୟ ସ୍ଥାନ ପରିଦର୍ଶନ କରିବାକୁ ଚାହୁଁଥିବା ବ୍ୟକ୍ତିମାନେ ସକାଳ ୭ଟାରୁ ୯ଟା ଏବଂ ଅପରାହ୍ନ ୩ ଟାରୁ ୫ଟା ଦୁଇଟି ପର୍ଯ୍ୟାୟରେ ନିଃଶୁକ୍ଳ ଯାତ୍ରା କରିପାରିବେ ବୋଲି ସୂଚନା ଦିଆଯାଇଛି। ଅନ୍ୟପଟେ ହକି ବିଶ୍ୱକପ୍ର ବୈଧ ଟିକେଟ ରଖିଥିବା ଯାତ୍ରୀ ଭୁବନେଶ୍ୱରରୁ ରାଉରକେଲା କ୍ରୁଟ୍ର ସ୍ବତନ୍ତ୍ର ସଟଲ୍ରେ ନିଃଶୁକ୍ଳ ଯାତ୍ରା କରିପାରୁଛନ୍ତି। ଟିକେଟ ଉପରେ ଲେଖା ଯାଇଥିବା ତାରିଖ ଆଧାରରେ କ୍ରୀଡ଼ାପ୍ରେମୀମାନେ ଏହି ସୁବିଧା ପାଇ ପାଇପାରୁଛନ୍ତି। ସେହିପରି ୨୯ ତାରିଖ ପର୍ଯ୍ୟନ୍ତ ଏହି ସେବା ଭୁବନେଶ୍ୱରର ୩ଟି ରୁଟ୍ରେ ଉପଲବ୍ଧ ହେବ। ଡଟ୍ଫେଷ୍ଟ ଏବଂ କଳିଙ୍ଗ ଷ୍ଟାଡିୟମ୍କୁ ଯିବାକୁ ଥିବା ଯାତ୍ରୀ ଟିକେଟ୍ ଦେଖାଇ ଅନୁରୂପ ସୁବିଧା ପାଇପାରିବେ। ଅନ୍ୟପଟେ ଚଳିତମାସରେ ମୋ ବସରେ ଯାତ୍ରୀଙ୍କ ସଂଖ୍ୟ ବଢ଼ିଛି। ଜାନୁଆରୀ ୧ରୁ ୧୫ ତାରିଖ ମଧ୍ୟରେ ମୋଟ୍ ୩୩ ଲକ୍ଷ ୬୧ ହଜାର ୮୭୯ ଜଣ ଯାତ୍ରୀ ମୋ ବସରେ ଯାତ୍ରା କରିଥିବା କ୍ରୁଟ୍ ପକ୍ଷରୁ ସୂଚନା ଦିଆଯାଇଛି।
