ଭୁବନେଶ୍ୱର, ୨୪।୬ (ବନ୍ଦନା ସେଠୀ): ନିଶା ଖାଇ ହାଇଡ୍ରାମା କରିବା ଭୁବନେଶ୍ବର ମହାନଗର ନିଗମ (ବିଏମସି)ର ପରିମଳ ଏନ୍ଫୋର୍ସମେଣ୍ଟ ସ୍କ୍ବାଡ୍ ଟିମ୍ ଲିଡରଙ୍କୁ ମହଙ୍ଗା ପଡିଛି। ସମ୍ପୃକ୍ତ ବ୍ୟକ୍ତିଙ୍କୁ କାର୍ଯ୍ୟରୁ ନିଲମ୍ବିତ କରିବା ସହ ବିଏମ୍ସିକୁ ଲୋକ ଯୋଗାଉଥିବା ଘରୋଇ ସଂସ୍ଥା ଟାଇମ୍ସକୁ ମେୟର ସୁଲୋଚନା ଦାସ ଓ କମିଶନର ବିଜୟ ଅମୃତା କୁଲାଙ୍ଗେ କଡ଼ା ଚେତାବନୀ ଶୁଣାଇଛନ୍ତି। ଯଦି ଆଗକୁ ଏପରି କୌଣସି ଅଭିଯୋଗ ସାମ୍ନାକୁ ଆସେ, ତେବେ ଘରୋଇ ସଂସ୍ଥାକୁ ବ୍ଲାକ୍ ଲିଷ୍ଟେଡ କରାଯିବ ବୋଲି ମେୟର କହିଛନ୍ତି। ବୁଧବାର ରାତିରେ ବିଏମ୍ସି ଉତ୍ତର ମଣ୍ଡଳରେ ପରିମଳ ଏନ୍ଫୋର୍ସମେଣ୍ଟ ସିକ୍ୟୁରିଟି ଭାବେ କାମ କରୁଥିବା ପ୍ରମୋଦ କୁମାର ରାଉତ ଏକ ହୋଟେଲକୁ ଯାଇ ତୁମୁଳ କାଣ୍ଡ କରିଥିଲେ। ଏନେଇ ଖବର ପ୍ରକାଶିତ ହେବାପରେ ଶୁକ୍ରବାର ମେୟର ସମ୍ପୃକ୍ତ ସଂସ୍ଥା ଏବଂ ବିଡିଏ ଏନ୍ଫୋର୍ସମେଣ୍ଟ ଟିମ୍ ‘ପ୍ରାଇଡ’ର ଟିମ ଲିଡରଙ୍କୁ ଡାକି ସମୀକ୍ଷା କରିଥିଲେ। ଏନେଇ ଟାଇମ୍ସର ମ୍ୟାନେଜର କହିଛନ୍ତି, ସମ୍ପୃକ୍ତ ବ୍ୟକ୍ତି ବୁଧବାର ରାତିରେ ହୋଟେଲକୁ ଖାଇବାକୁ ଯାଇଥିଲେ। ସେ ବିଏମସି ପକ୍ଷରୁ ଫାଇନ କାଟୁଥିବାରୁ ସେଠାରେ ତାଙ୍କୁ କିଛି ବ୍ୟବସାୟୀ ତଥା ହୋଟେଲ କର୍ମଚାରୀ ଆକ୍ରମଣ କରିବା ସହ ପ୍ରବଳ ମାଡ଼ ମାରିଥିଲେ। ତେବେ ସମ୍ପୃକ୍ତ ବ୍ୟକ୍ତି ବଟି ମାଗୁଥିବା ଅଭିଯୋଗ ନେଇ ସଂସ୍ଥା ଅଧିକାରୀ ଚୁପ୍ ରହିଥିଲେ। ସମୀକ୍ଷା ବୈଠକରେ ମେୟର କାର୍ଯ୍ୟରତ ସମସ୍ତ ଟିମ୍ ଲିଡରଙ୍କୁ ଜନସାଧାରଣ ଓ ଦୋକାନୀଙ୍କୁ ସଚେତନ କରାଇବାକୁ ଅଧିକ ଫୋକସ ଦେବାକୁ ବୁଝାଇଥିଲେ। ଫାଇନ କେବଳ ସାନିଟାରୀ ଇନ୍ସପେକ୍ଟର ହିଁ ଆଦାୟ କରିବେ ବୋଲି ନିଷ୍ପତ୍ତି ହୋଇଥିଲା। ପ୍ରତ୍ୟେକ ମାସରେ ପରିମଳ ଏନଫୋର୍ସମେଣ୍ଟ ଟିମକୁ ରୋଟେସନ କରାଯିବ। ଫଳରେ ପରିମଳ ଯାଞ୍ଚରେ ସ୍ବଚ୍ଛତା ରହିବ ବୋଲି ବିଏମ୍ସି ଅତରିକ୍ତ କମିଶନର ଶୁଭେନ୍ଦୁ ସାହୁ ସୂଚନା ଦେଇଛନ୍ତି। ସୂଚନାଯୋଗ୍ୟ, ନିକଟରେ ବିଏମସି ପରିମଳ ବିଭାଗ ଖରାପ ପ୍ରଦର୍ଶନ କରୁଥିବା କିଛି ସଦସ୍ୟଙ୍କୁ ଛଟେଇ କରିଥିଲା। ତାଙ୍କ ବଦଳରେ ଘରୋଇ ସଂସ୍ଥା ‘ଟାଇମ୍ସ’ କିଛି ନୂଆ ଅବସରପ୍ରାପ୍ତ ଆର୍ମି ଅଫିସରଙ୍କୁ ଯୋଗାଇଥିଲା। ବିଏମସିର ଉତ୍ତର ଜୋନ ପରିମଳ ଯାଞ୍ଚ ଟିମରେ ପ୍ରମୋଦଙ୍କୁ ନିଯୁକ୍ତ କରାଯାଇଥିଲା। ତେବେ କାମ କରିବାର ୪୮ ଘଣ୍ଟା ନ ପୁରୁଣୁ ବାବୁଙ୍କ ହାଇଡ୍ରାମା ନଜରକୁ ଆସିଛି। ଡ୍ୟୁଟି ସରିବା ପରେ ନିଶା ଖାଇ ସେ ଏକ ହୋଟେଲକୁ ଯାଇ ପରିମଳ ଯାଞ୍ଚ ନାଁରେ ବଟି ମାଗୁଥିବା ଅଭିଯୋଗ ହେବାପରେ ଘଟଣାର ସତ୍ୟାସତ୍ୟ ଯାଞ୍ଚ କରି ବିଏମ୍ସି ତାଙ୍କ ଉପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି।