ଭୁବନେଶ୍ୱର, ୮।୧ (ବନ୍ଦନା ସେଠୀ): ଦୀର୍ଘ ୬ମାସରୁ ଊର୍ଦ୍ଧ୍ୱ ସମୟ ଧରି ବନ୍ଦ ରହିଥିବା ଆନିମଲ୍ ବାର୍ଥ କଣ୍ଟ୍ରୋଲ (ଏବିସି) ବା କୁକୁର ବନ୍ଧ୍ୟାକରଣ ଅସ୍ତ୍ରୋପଚାର ଖୁବ୍ଶୀଘ୍ର ଆରମ୍ଭ ହେବ। ଏନେଇ ସୋମବାର ହାଇକୋର୍ଟ ବିଏମ୍ସିକୁ ସବୁଜ ସଙ୍କେତ ଦେଇଛନ୍ତି। ରାଜ୍ୟରେ ଚାଲିଥିବା ଏବିସି କାର୍ଯ୍ୟକ୍ରମ ଠିକ୍ ତଥା ସୁରକ୍ଷିତ ଭାବେ ହେଉ ନ ଥିବା ଅଭିଯୋଗ କରି ଆଇନଜୀବୀ ବିଶ୍ୱଜିତ୍ ପ୍ରଧାନ ହାଇକୋର୍ଟରେ ଜନସ୍ବାର୍ଥ ମାମଲା ଦାଏର କରିଥିଲେ। ତେବେ ସହରରେ ବୁଲା କୁକୁରଙ୍କ ଉପଦ୍ରବ ବଢି ଚାଲିଥିବାବେଳେ ଲୋକଙ୍କ ଅସନ୍ତୋଷକୁ ଦେଖି ବିଏମ୍ସି ନିଜଆଡୁ ଏହି ମାମଲାରେ ହସ୍ତକ୍ଷେପ କରିଥିଲା।
ସୋମବାର ମାମଲାର ଶୁଣାଣି କରି ହାଇକୋର୍ଟ ପୁଣିଥରେ ଏବିସି କାର୍ଯ୍ୟକ୍ରମ ଆରମ୍ଭ କରିବା ପାଇଁ ଅନୁମତି ପ୍ରଦାନ କରିଛନ୍ତି। ଏହାପରେ ଅସ୍ତ୍ରୋପଚାର ପାଇଁ ଚୁକ୍ତି କରିଥିବା ମହାରାଷ୍ଟ୍ରର ସଂସ୍ଥା ‘ଭେଟ୍ ଫର୍ ଆନିମଲ୍’ ସହିତ ବିଏମ୍ସି ପକ୍ଷରୁ ଯୋଗାଯୋଗ କରାଯାଇଛି। ଆସନ୍ତା ୨/୩ଦିନ ମଧ୍ୟରେ କର୍ମଚାରୀଙ୍କ ସହ ଭୁବନେଶ୍ୱର ଆସିବାକୁ କୁହାଯିବା ସହ ସପ୍ତାହେ ଭିତରେ କାମ ଆରମ୍ଭ ହେବ ବୋଲି ସୂଚନା ଦିଆଯାଇଛି। ୫ମାସରୁ ଅଧିକ ସମୟ ଧରି କାର୍ଯ୍ୟ ବନ୍ଦ ଥିବାରୁ ସଂସ୍ଥାର କର୍ମଚାରୀମାନେ ନିଜ ଘରକୁ ପଳାଇଛନ୍ତି। ତେଣୁ କର୍ମଚାରୀମାନେ ଆସିବାକୁ ପ୍ରାୟ ୧ ସପ୍ତାହ ଲାଗିଯିବ ବୋଲି ସଂସ୍ଥା ପକ୍ଷରୁ କୁହାଯାଇଛି। ଅନୁମତି ମିଳିବା ପରେ ବିଏମ୍ସିର ଏହି ସଜବାଜ ରାଜଧାନୀରେ କୁକୁରଙ୍କ ସଂଖ୍ୟା ବୃଦ୍ଧି ଓ ଉପଦ୍ରବରେ ରୋକ୍ ଲାଗିବା ନେଇ ଆଶା ଦେଖାଦେଇଛି।
ହାଇକୋର୍ଟରେ ମାମଲା ଦାଏର ହେବା ପରେ ଗୃହ ଓ ନଗର ଉନ୍ନୟନ ବିଭାଗକୁ ଅଭିଯୋଗ ବାବଦରେ ରିପୋର୍ଟ ରଖିବାକୁ ନିର୍ଦ୍ଦେଶ ଦିଆଯାଇଥିଲା। ଏଥିସହ ଅଗଷ୍ଟ ୩୧ ପର୍ଯ୍ୟନ୍ତ କୁକୁର ଅସ୍ତ୍ରୋପଚାର ବନ୍ଦ ରଖିବାକୁ କୁହାଯାଇଥିଲା। ମାତ୍ର ଏନେଇ ବିଭାଗ ନୀରବତା ଅବଲମ୍ବନ କରିବା ସହ କୌଣସି ରିପୋର୍ଟ ଦାଖଲ ନ କରିବାରୁ ସେପ୍ଟେମ୍ବର ୩୦ ଏବଂ ପରେ ଅନିର୍ଦ୍ଦିଷ୍ଟ କାଳ ପାଇଁ ଅସ୍ତ୍ରୋପଚାର ଉପରେ ଷ୍ଟେ’ ବଳବତ୍ତର ରହିଥିଲା। ତେବେ କୁକୁରଙ୍କ ଦୌରାତ୍ମ୍ୟକୁ ନେଇ ସହରବାସୀଙ୍କ ଅସନ୍ତୋଷ ବଢିବାକୁ ନଭେମ୍ବରରେ ବିଏମ୍ସି ନିଜଆଡୁ ପକ୍ଷ ରଖି ମାମଲାରେ ହସ୍ତକ୍ଷେପ କରିଥିଲା।
ଯେଉଁଭଳି ଭାବେ କୁକୁରଙ୍କ ବଂଶ ବୃଦ୍ଧି ଘଟିଛି ତାକୁ ନିୟନ୍ତ୍ରଣକୁ ଆଣିବା ଏବେ ବିଏମ୍ସି ପାଇଁ ବଡ଼ ଚ୍ୟାଲେଞ୍ଜ ହେବ ବୋଲି ଆଶଙ୍କା କରାଯାଉଛି। ଆକଳନ ଅନୁଯାୟୀ, ୬ମାସ ତଳେ କୁକୁରଙ୍କ ସଂଖ୍ୟା ୫୦ହଜାରରୁ ଊର୍ଦ୍ଧ୍ୱ ଥିବାବେଳେ ଏବେ ଏହି ସଂଖ୍ୟା ବୃଦ୍ଧି ପାଇ ୬୦ ହଜାର ଡେଇଁଥିବା ସୂଚନା ମିଳିଛି। ହେଲେ ଏହାର ପ୍ରକୃତ ତଥ୍ୟ ବିଏମ୍ସି ଅଧିକାରୀଙ୍କ ପାଖରେ ନାହିଁ। ହାଇକୋର୍ଟଙ୍କ ରୋକ୍ ପୂର୍ବରୁ ବିଏମ୍ସି ପ୍ରାୟ ୨୮ହଜାର କୁକୁରଙ୍କ ବନ୍ଧ୍ୟାକରଣ କରିଥିବା ସୂଚନା ଦେଇଥିଲା। ତେବେ ଅସ୍ତ୍ରୋପଚାର ବନ୍ଦ ଯୋଗୁ କୁକୁର ବଂଶ ଦ୍ରୁତଗତିରେ ବଢିଥିବାରୁ ବିଏମ୍ସିର ଅର୍ଥ ପାଣିରେ ପଡିଥିଲା।
ଅସ୍ତ୍ରୋପଚାର ପାଇଁ ବିଏମ୍ସି ପ୍ରଥମଥର ଗ୍ଲୋବାଲ ଟେଣ୍ଡର ଜରିଆରେ ‘ଭେଟ୍ ଫର୍ ଆନିମଲ୍’ ସଂସ୍ଥା ସହିତ ଚୁକ୍ତି କରିଥିଲା। ଏଥିପାଇଁ କୁକୁର ପିଛା ସଂସ୍ଥାକୁ ୧୬୫୦ ଟଙ୍କା ପ୍ରଦାନ କରାଯାଉଥିଲା। ଏଥିରେ କୁକୁରଙ୍କୁ ହସ୍ପିଟାଲକୁ ଆଣିବାଠାରୁ ଆରମ୍ଭ କରି ଅସ୍ତ୍ରୋପଚାର, ଔଷଧ, ଆଣ୍ଟି ରାବିଜ୍ ଡୋଜ୍ ଏବଂ ସେମାନଙ୍କୁ ନେଇ ସମ୍ପୃକ୍ତ ସ୍ଥାନରେ ଛାଡିବା ପର୍ଯ୍ୟନ୍ତ ସବୁକିଛି ଅନ୍ତର୍ଭୁକ୍ତ ଥିଲା। ସମ୍ପୃକ୍ତ ସଂସ୍ଥା ନଭେମ୍ବର ୧୬ରୁ ଜୁଲାଇ ୧୦ ମଧ୍ୟରେ ୪ହଜାର ୭୦ଟି କୁକୁରଙ୍କ ଅସ୍ତ୍ରୋପଚାର କରିଥିଲା। ୨ମାସ ଧରି ଅପେକ୍ଷା କରିବା ପରେ ଏଥିରେ ନିୟୋଜିତ ଡାକ୍ତର, କର୍ମଚାରୀ, ଆମ୍ବୁଲାନ୍ସ ଖର୍ଚ୍ଚ ବହନ କରିବା ସଂସ୍ଥା ପକ୍ଷରେ ଅସମ୍ଭବ ହୋଇପଡିବାରୁ ସଂସ୍ଥାର ମୁଖ୍ୟ ଓ କର୍ମଚାରୀମାନେ ମହାରାଷ୍ଟ୍ର ଫେରିଯାଇଥିଲେ। ଅପରପକ୍ଷେ ହାଇକୋର୍ଟଙ୍କ ରୋକ୍ ପରଠାରୁ ମଞ୍ଚେଶ୍ୱରରେ ପ୍ରସ୍ତୁତ ହେଉଥିବା କୁକୁରଙ୍କ ହସ୍ପିଟାଲ କାମ ଧିମେଇ ଯାଇଛି। ୨୦୨୩ ମେ’ ସୁଦ୍ଧା ଏହାକୁ କାର୍ଯ୍ୟକ୍ଷମ କରିବାକୁ ଲକ୍ଷ୍ୟ ଥିବା ପ୍ରଥମେ ବିଏମସି ଅଧିକାରୀ କହିଥିଲେ। ମାତ୍ର ନିର୍ଦ୍ଧାରିତ ସମୟର ୮ମାସ ପରେ ବି କାମ ସରିନି। ତେବେ ହାଇକୋର୍ଟଙ୍କ ନିର୍ଦ୍ଦେଶ ମିଳିବା ପରେ ତୁରନ୍ତ ହସ୍ପିଟାଲ ଉଦ୍ଘାଟନ କରାଯାଇ ଫୁଲ୍ ଫେଜ୍ରେ କାମ ଆରମ୍ଭ କରାଯିବ ବୋଲି ବିଏମ୍ସି ଅଧିକାରୀ ସୂଚନା ଦେଇଛନ୍ତି।