ଭୁବନେଶ୍ୱର,୧୧।୧(ବ୍ୟୁରୋ) : ଭୁବନେଶ୍ୱର ମହାନଗର ନିଗମ(ବିଏମ୍ସି)କୁ ଓଡିଏଫ୍ ପ୍ଲସ୍ପ୍ଲସ୍ ମାନ୍ୟତା ମିଳିଛି। ସ୍ବଚ୍ଛ ଭାରତ ମିଶନର ଏକ ପ୍ରମୁଖ ସୂଚକାଙ୍କ ହେଉଛି ଓଡିଏଫ୍ପ୍ଲସ୍ ପ୍ଲସ୍ ମାନ୍ୟତା। ୨୦୨୦ ଡିସେମ୍ବର ୧୦ ଓ ୧୧ ତାରିଖରେ କ୍ୟୁସିଆଇ ସଂସ୍ଥା ଦ୍ୱାରା ଭୁବନେଶ୍ୱରର ସ୍ଥିତିକୁ ନେଇ ପ୍ରସ୍ତୁତ ରିପୋର୍ଟ ଆଧାରରେ ଭାରତ ସରକାରଙ୍କ ପକ୍ଷରୁ ଏହି ମୂଲ୍ୟାୟନ କରାଯାଇଛି। ଏ ନେଇ ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି ଯେ, କୌଣସି ଏକ ସହରର ଓଡିଏଫ୍ ସ୍ଥିତି ଜାଣିବାକୁ ଯେଉଁସବୁ ସୂଚକାଙ୍କ ବା ପରିମଳଜନିତ ସ୍ଥିତି, ସେବା ବ୍ୟବସ୍ଥା ଓ ଆଚରଣଗତ ପରିବର୍ତ୍ତନ ଦରକାର ବିଏମ୍ସି ସେଗୁଡ଼ିକ ପୂରଣ କରିଛି। କେବଳ ପ୍ରଶାସନ ନୁହେଁ, ନାଗରିକଙ୍କ ସହଯୋଗ ଓ ପରିମଳ ଆଚରଣ ମଧ୍ୟ ପ୍ରମୁଖ ଭୂମିକା ଗ୍ରହଣ କରିଛି।
ବିଏମ୍ସି ତରଫରୁ ଏହି ମାନ୍ୟତା ନିମନ୍ତେ ୨୦୨୦ ମାର୍ଚ୍ଚ ଓ ଏପ୍ରିଲରେ ଆବେଦନ କରାଯାଇଥିଲା। କୋଭିଡ୍ ମହାମାରୀ ପ୍ରଭାବରେ ଚୟନ ପ୍ରକ୍ରିୟା କିଛି ମାସ ଧରି ଚାଲିଥିଲା। ବର୍ତ୍ତମାନର ଅନ୍ଲାଇନ୍ରେ ଓଡିଏଫ୍ ପ୍ଲସ୍ ପ୍ଲସ୍ର ମୂଲ୍ୟାୟନ କରାଯାଇଛି। ଏଥିପାଇଁ ନିୟୋଜିତ ସଂସ୍ଥା ଗତ ମାସରେ ଆସି କ୍ଷେତ୍ର ମୂଲ୍ୟାୟନ କରି ଭାରତ ସରକାରଙ୍କ ସମ୍ପୃକ୍ତ ବିଭାଗକୁ ଦେଇଥିଲେ। ନିୟମାନୁସାରେ ଏହି ତୃତୀୟ ପକ୍ଷ ସଂସ୍ଥା ସମ୍ପୃକ୍ତ ପୌର ସଂସ୍ଥାର ଅଜ୍ଞାତରେ କ୍ଷେତ୍ର ବିଶେଷରେ ପରିମଳ ସ୍ଥିତି କ’ଣ ରହିଛି ତାହା ଦେଖି ରିପୋର୍ଟ ଦେଇଥିଲେ ବୋଲି ବିଏମ୍ସି ଡେପୁଟି କମିଶନର ଶୁଭେନ୍ଦୁ କୁମାର ସାହୁ କହିଛନ୍ତି।
ଓଡିଏଫ୍ ପ୍ଲସ୍ ପ୍ଲସ୍ର ନିୟମାବଳୀ ଅନୁସାରେ, ଶୌଚାଳୟ ସେବା ମିଳିବା, ସହର ବାହ୍ୟ ମଳମୁକ୍ତ ହେବା, ମଳ ପରିଚାଳନା ବିଜ୍ଞାନ ସମ୍ମତ ହେବା, ବ୍ୟକ୍ତିଗତ ଘରୋଇ ପାଇଖାନାର ବ୍ୟବହାର ଥିବା, ବ୍ୟକ୍ତିଗତ ପାଇଖାନାଗୁଡିକର ସ୍ବିରେଜ ଲାଇନ୍ ସହିତ ସଂଯୋଗ ଓ ପ୍ରତି ଘରୋଇ ପାଇଖାନାର ଦୁଇଟି ସେଫଟିକ୍ ଟାଙ୍କି ରହିବା, ସେଫ୍ଟିକ୍ ଟାଙ୍କି ନିୟମିତ ସଫା ହେବା ତଥା ଏ ସଂକ୍ରାନ୍ତ ସେବା ନିୟମିତ ମିଳିବା, ମଳ ପରିଚାଳନା ସଂସ୍ଥା ସମ୍ପୃକ୍ତ ପୌର ସଂସ୍ଥା ସହିତ ନିବନ୍ଧିତ ହେବା, ମଳ ପରିଚାଳନା ଉଲ୍ଲଂଘନ କରିଥିବା ସଂସ୍ଥାକୁ ଜରିମାନା କରାଯିବା ଇତ୍ୟାଦିକୁ ବିଚାରକୁ ନିଆଯାଇଥାଏ।