ଭୁବନେଶ୍ୱର,୧୭।୭(ଅଭିଜିତ ଦାସ) : ପୂର୍ବରୁ କାମ ସାରିଲେନି, ଏବେ ବର୍ଷାରେ ହେଉଛି ଡ୍ରେନ୍ ପୁନଃ ଉଦ୍ଧାର। ମୌସୁମୀ ପୂର୍ବରୁ ସହରର ସମସ୍ତ ଡ୍ରେନ ସଫେଇ ଓ ଅନ୍ୟାନ୍ୟ କାମ ସରିବ ବୋଲି ମେୟର ସୁଲୋଚନା ଦାସ କହିଥିଲେ, ହେଲେ ଏବେ ବି ଡ୍ରେନ୍ରୁ କଢ଼ା ଚାଲିଛି ପଙ୍କ ଓ ଆବର୍ଜନା। ସବୁଠାରୁ ଉଦ୍ବେଗର ପ୍ରସଙ୍ଗ ହେଲା ଡ୍ରେନ୍ ସଫେଇ ପରେ ତାହାକୁ ତୁରନ୍ତ ସ୍ଥାନାନ୍ତର କରା ନ ଯାଇ ସେମିତି ରାସ୍ତାରେ ଗଦା କରି ରଖାଯାଉଛି। ଅଧିକାଂଶ ରାସ୍ତା ସଂକୀର୍ଣ୍ଣ ହୋଇଥିବାରୁ ଲୋକଙ୍କ ସମେତ ଗାଡିମୋଟର ତା’ ଉପରେ ଚଳପ୍ରଚଳ କରିବାକୁ ବାଧ୍ୟ ହେଉଛନ୍ତି। ପୁଣି ବର୍ଷା ହେଉଥିବାରୁ ପଙ୍କ ଓ ଆର୍ବଜନା ରାସ୍ତାସାରା ହୋଇଯିବା ସହ ପୂତିଗନ୍ଧମୟ ପରିବେଶ ସୃଷ୍ଟି କରୁଛି। ଅଧିକାଂଶ ପଙ୍କ ପୁଣି ସେହି ଡ୍ରେନ୍ରେ ପଶୁଛି। ଅନେକ ସ୍ଥାନରେ ଡ୍ରେନ୍ ଜାମ୍ ହୋଇ ଆବର୍ଜନା ପାଣି ରାସ୍ତାରେ ଚାଲୁଛି। ଅନ୍ୟପକ୍ଷରେ ବଡ଼ ଡ୍ରେନ୍ରୁ ମଧ୍ୟ ଦଳ, ପଙ୍କ, ଆର୍ବଜନା କଢ଼ାଯାଇ ରାସ୍ତା ପାର୍ଶ୍ୱରେ ଗଦା କରି ଦିଆଯାଉଛି। ସଫେଇ ଓ ସ୍ଥାନାନ୍ତର ବାବଦକୁ ବିଏମ୍ସି ଠିକା ସଂସ୍ଥାକୁ ଟଙ୍କା ଗଣୁଥିଲେ ମଧ୍ୟ ସ୍ଥାନାନ୍ତର ହେଉ ନ ଥିବାରୁ ତାହା ସେଠାରେ ପଚିଶଢ଼ି କିଛି ରାସ୍ତାରେ ମାଡୁଛି, ଆଉ କିଛି ପୁଣି ସେହି ନାଳକୁ ଯାଉଛି। ଦୟା ଓ୍ବେଷ୍ଟ କେନାଲର ପଳାଶୁଣିରୁ ବଡ଼ଗଡ଼ ସମେତ ସହରର ବିଭିନ୍ନ ମୁଖ୍ୟ ଡ୍ରେନ୍ ଓ ଶାଖା ଡ୍ରେନ୍ର ବିଭିନ୍ନ ସ୍ଥାନରେ ଏଭଳି ଚିତ୍ର ସାମ୍ନାକୁ ଆସୁଛି। ରାଜଧାନୀକୁ ଆର୍ବଜନା ଓ ଜଳବନ୍ଦୀମୁକ୍ତ କରିବା ଲାଗି ବିଏମ୍ସି ପକ୍ଷରୁ ଘନ ଘନ ବୈଠକ କରାଯାଉଛି। କିନ୍ତୁ ବାହାଘରବେଳେ ବାଇଗଣ ରୁଆ ଭଳି କାର୍ଯ୍ୟ କରାଯାଉଥିବାରୁ ତାହାସବୁ ପ୍ରହସନରେ ପରିଣତ ହେଉଛି। ମନମାନି ଭାବେ ଡ୍ରେନ୍ କାର୍ଯ୍ୟ କରୁଛନ୍ତି ଠିକା ସଂସ୍ଥା। ସ୍ଥାନୀୟ ବାସିନ୍ଦା ବାରମ୍ବାର ଅଭିଯୋଗ କରୁଥିଲେ ମଧ୍ୟ ଦାୟିତ୍ୱରେ ରହୁଥିବା ବିଏମ୍ସି ଅଧିକାରୀ ସେପରି ତ୍ୱରିତ ପଦକ୍ଷେପ ନେଉ ନ ଥିବାରୁ ବର୍ଷ ବର୍ଷ ଧରି ଏମିତି ଦୁର୍ଦ୍ଦଶା ଭୋଗୁଛନ୍ତି ରାଜଧାନୀବାସୀ।
ଏଠି ବର୍ଷା ଆସିଲେ ଡ୍ରେନ୍ କାମ ହୁଏ
ବାହାଘରବେଳେ ବାଇଗଣ ରୋଇବା ଭଳି ବର୍ଷାଦିନେ ବିଏମ୍ସି ପକ୍ଷରୁ ଡ୍ରେନ୍ ସଫା କାର୍ଯ୍ୟ ଆରମ୍ଭ କରାଯାଉଛି। ତରବରିଆ ଭାବେ ବିଭିନ୍ନ ଡ୍ରେନ୍ରୁ ଆବର୍ଜନା କଢାଯାଉଛି। ତେବେ ଡ୍ରେନ୍ କଡରେ ଆବର୍ଜନାକୁ ଗଦା କରାଯାଉଥିବାବେଳେ ତାହାକୁ ସେଠାରୁ ଉଠାଉନାହାନ୍ତି। ଫଳରେ ଅସରାଏ ବର୍ଷା ହେଲେ ଆବର୍ଜନାଗୁଡିକ ପୁଣି ଥରେ ଡ୍ରେନ୍ ଭିତରକୁ ପଶୁଥିବା ଦେଖାଯାଉଛି। ଏଥିପାଇଁ ଲୋକମାନେ ନାନା ହଇରାଣ ହେଉଛନ୍ତି।
-ବିକାଶ ନାୟକ, ଭୁବନେଶ୍ୱର ବାସିନ୍ଦା
ନିୟମିତ ଭାବେ ସଫା କରାଯାଉଛି
ପ୍ରତିଦିନ ଡ୍ରେନ୍ରୁ ଆବର୍ଜନା କଢାଯିବା ପରେ ସଫେଇ ଗାଡି ସହାୟତାରେ ଉଭୟ ସ୍ଥାନକୁ ସଫା କରାଯାଏ। ବେଳେବେଳେ ଗାଡି ଅଭାବରୁ କିଛି ଘଣ୍ଟା ବିଳମ୍ବରେ ଅଳିଆ ଉଠାଯାଏ। କିନ୍ତୁ ନିୟମିତ ଭାବେ ଡ୍ରେନ୍ ସଫେଇ ସହ ଆବର୍ଜନା ସ୍ଥାନାନ୍ତର କରାଯାଉଛି।
-ଲକ୍ଷ୍ମଣ ବେହେରା, ଜାଗୃତି ସଫେଇ କର୍ମଚାରୀ
ବିଏମ୍ସି ଡ୍ରେନ୍ ହିଁ ଡେଙ୍ଗୁ ଉତ୍ପତ୍ତିସ୍ଥଳ ପାଲଟିଛି
ଏବେ ଭୁବନେଶ୍ୱରରେ ଡେଙ୍ଗୁ ବ୍ୟାପୁଛି। ବିଏମ୍ସି ସଚେତନତା କଥା କହୁଛି। କିନ୍ତୁ ବାସ୍ତବରେ ବିଏମ୍ସିର ଡ୍ରେନ୍ ହେଉଛି ଡେଙ୍ଗୁ ଉତ୍ପତ୍ତି ସ୍ଥଳ। ଠିକ୍ ଭାବେ ଡ୍ରେନ୍ ସଫେଇ ହେଉ ନ ଥିବାରୁ ବର୍ଷା ହେଲେ ଅଳିଆ ଆର୍ବଜନା ପାଣି ଘରେ ପଶୁଛି। ମଶାଧୂଆଁ ବ୍ୟବହାର କରାଯାଉନାହିଁ। ବିଶେଷକରି ଦୟା ଓ୍ବେଷ୍ଟ କେନାଲ, ଗଙ୍ଗୁଆ ସମେତ ସହରରେ ଥିବା ଛୋଟବଡ଼ ଡ୍ରେନ୍ର ସ୍ଥିତିକୁ ଦେଖିଲେ ଏହା ଜଣାପଡୁଛି। କେନାଲ ବନ୍ଧ ଅଞ୍ଚଳରେ ଅଧିକ ଡେଙ୍ଗୁ ରୋଗୀ ବଢିବାର ସମ୍ଭାବନା ରହିଛି।
-ବିଭୁଦତ୍ତ ମହାନ୍ତି, ଭୁବନେଶ୍ୱର ବାସିନ୍ଦା