ଭୁବନେଶ୍ୱର,୧୮ା୧୧(ବ୍ୟୁରୋ) : ରାଜଧାନୀରେ ବେଧଡ଼କ ଭାବେ ଚାଲିଥିବା ଡ୍ରଗ୍ସ କାରବାରରେ ଭୁବନେଶ୍ୱର ମହାନଗର ନିଗମ (ବିଏମ୍ସି) କର୍ମଚାରୀ। ଲିଙ୍ଗରାଜ ଥାନା ପୋଲିସ ପୁରୁଣା ଭୁବନେଶ୍ୱରିରେ ଚଢ଼ାଉ କରି ଜଣଙ୍କୁ ଗିରଫ କରିବା ସହ ଏହି ଘଟଣାର ପର୍ଦ୍ଦାଫାସ କରିଛି। ଗିରଫ ଅଭିଯୁକ୍ତ ଜଣକ ହେଲେ ବଡ଼ଦାଣ୍ଡ ସାହିରେ ରହୁଥିବା ବିଏମ୍ସିର ଚତୁର୍ଥ ଶ୍ରେଣୀ ଠିକା କର୍ମଚାରୀ ଦିଲୀପ କୁମାର ବେହେରା ଓରଫ ଦିଲୁ। ଯାଞ୍ଚପରେ ପୋଲିସ ତାଙ୍କଠାରୁ ୭.୬୪୦ ଗ୍ରାମ୍ର ବ୍ରାଉନସୁଗାର, ୪୨ ହଜାର ଟଙ୍କା, ୪୦ ଗ୍ରାମର ସୁନା ଗହଣା ସମେତ ଏକ ସ୍କୁଟି ଜବତ କରିଛି। ଏଥିସହ ଦିଲୁଙ୍କ ଘରୁ ୭ଟି ସେଭିଙ୍ଗ୍ ବ୍ୟାଙ୍କ୍ ଆକାଉଣ୍ଟ, ୫ଟି ମୋବାଇଲ୍ ଫୋନ୍, ହାତଘଣ୍ଟା ମଧ୍ୟ ଜବତ କରାଯାଇଛି। ଏନ୍ଡିପିଏସ୍ ଆକ୍ଟ ୨୧(ବି)ରେ ମାମଲା (ନଂ.୨୨୮/୨୦) ରୁଜୁ ସହ ଅଭିଯୁକ୍ତ ଦିଲୁଙ୍କୁ ପଚରାଉଚରା ପରେ ବୁଧବାର କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଡ୍ରଗ୍ସ ଲିଙ୍କ୍ରେ ଦିଲୁ ଗିରଫ ହୋଇ ଜେଲ୍ ଯିବାପରେ ବିଏମ୍ସି ପକ୍ଷରୁ ତାଙ୍କୁ ଚାକିରିରୁ ନିଲମ୍ବନ କରାଯାଇଛି।