ବ୍ରହ୍ମପୁର ଅଫିସ,୨।୧୧: ବ୍ରହ୍ମପୁର ସହରର ବହୁ ପୁରାତନ ୫୦ ବର୍ଷ ପୁରୁଣା ଗିରି ମାର୍କେଟ କୋଠା ଆସନ୍ତା ୧୦ ତାରିଖରେ ଭଙ୍ଗା ଯିବାକୁ ନେଇ ବ୍ରହ୍ମପୁର ମହାନଗର ନିଗମ(ବିଏମ୍ସି)ପକ୍ଷରୁ ନିଷ୍ପତ୍ତି ହୋଇଥିବା ବିଏମ୍ସି ଡେପୁଟି କମିଶନର ନୀଳମାଧବ ଭୋଇ ସୂଚନା ଦେଇଛନ୍ତି। ତେବେ ମାର୍କେଟ ଭଙ୍ଗା ଯିବା ପୂର୍ବରୁ ସମସ୍ତ ଦୋକାନ ଗୃହ ଖାଲି କରିବା ପାଇଁ ମାଲିକଙ୍କୁ ନୋଟିସି ଦିଆଯାଇଛି। କିନ୍ତୁ ମାର୍କେଟ ଭଙ୍ଗାଯିବା ପୂର୍ବରୁ ସ୍ଥାନୀୟ ବାସିନ୍ଦା ଦୋକାନର ଶଟର ତାଡି ନେଇଯାଉଥିବା ଦେଖିବାକୁ ମିଳିଛି। ଏପରିକି ଦୋକାନ ଘରେ ଲାଗିଥିବା ଅନେକ କାଠ ଆସାବପତ୍ର ଗୁଡିକ ମଧ୍ୟ ସ୍ଥାନୀୟ ଲୋକେ ବୋହି ନେଉଥିବା ଦେଖିବାକୁ ମିଳିଥିଲା। ବିଏମ୍ସି ପକ୍ଷରୁ ଚୂଡାନ୍ତ ନିଷ୍ପତ୍ତି ହେବା କ୍ଷଣି ବୋହୁ ଦୋକାନରୁ ରାତି ଅଧରେ ସ୍ଥାନୀୟ କିଛି ବାସିନ୍ଦାମାନେ ସଟର ତାଡି ନେଇଯାଇଥିବା ବହୁ ବ୍ୟବସାୟୀ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ୧୯୭୪ ମେ ୨୪ରେ ଗିରି ମାର୍କେଟ ପ୍ରତିଷ୍ଠା ହୋଇଥିଲା। ଏହାକୁ ତତ୍କାଳୀନ ରାଷ୍ଟ୍ରପତି ଭି.ଭି. ଗିରି ଉଦ୍ଘାଟନ କରିଥିଲେ। ଏଠାରେ ୧୫୦ରୁ ଊର୍ଦ୍ଧ୍ୱ ଦୋକାନ ଗୃହ ରହିଛି। କିନ୍ତୁ ପରବର୍ତ୍ତୀ ସମୟରେ ବିଏମ୍ସିର ଉଚିତ ରକ୍ଷଣାବେକ୍ଷଣ ଅଭାବରୁ ମାର୍କେଟ କୋଠାଟି ବିପଦ ସଙ୍କୁଳ ପାଲଟିଥିଲା। ଯାହା ଦ୍ୱାରା ଜରାଜୀର୍ଣ୍ଣ ଛାତତଳେ ବ୍ୟବସାୟୀମାନେ ବ୍ୟବସାୟ କରିବାକୁ ଭୟ କରିଥିଲେ। ଏହାର ମରାମତି ପାଇଁ ବ୍ୟବସାୟୀଙ୍କ ପକ୍ଷରୁ ବିଏମ୍ସିକୁ ବାରମ୍ବାର ଅବଗତ କରାଯାଇଥିଲା। କିନ୍ତୁ କୌଣସି ମରାମତି କରାଗଲା ନାହିଁ। ଫଳରେ ବ୍ୟବସାୟୀମାନେ ବିପଦ ସଙ୍କୁଳ ଛାତ ତଳେ ବ୍ୟବସାୟ ଜାରି ରଖିଥିଲେ। ଏହାପରେ ଉକ୍ତ ମାର୍କେଟକୁ ଭାଙ୍ଗିବା ସହ ଉନ୍ନତିତୀକରଣ ପାଇଁ ମେ ୧୩ ରେ ବିଏମ୍ସି କାଉନସିଲ ବୈଠକରେ ନିଷ୍ପତ୍ତି ହୋଇଥିଲା। ମାର୍କେଟର ଉନ୍ନତୀକରଣ ପାଇଁ ୧୫ କୋଟି ମଞ୍ଜୁର ହୋଇଥିଲା। ଚଳିତ ବର୍ଷ ଅଗଷ୍ଟ ୧୫ ପୂର୍ବରୁ କୋଠା ଭଙ୍ଗା ଯିବା ପାଇଁ ନିଷ୍ପତ୍ତି ହୋଇଥିଲା। କିନ୍ତୁ ନିଷ୍ପତ୍ତିର ଦୀର୍ଘ ଦିନ ପରେ ବି କୋଠା ଭଙ୍ଗା ଯିବା କ୍ଷେତ୍ରରେ ବିଏମ୍ସି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ଦେଖିବାକୁ ମିଳିଥିଲା। ମାର୍କେଟ କୋଠାରେ ବ୍ୟବସାୟୀମାନେ ଦୋକାନ ଘର ଖାଲି କରି ନ ଥିବା ଦର୍ଶାଇ କୋଠା ଭଙ୍ଗାଯିବାରେ ବିଳମ୍ବ ହେଉଥିବା ବିଏମ୍ସି ପକ୍ଷରୁ କୁହାଯାଇଥିଲା। ଏହାପରେ ସମସ୍ତ ଦୋକାନ ଗୃହ ସ୍ଥାନାନ୍ତରଣ ହୋଇଥିଲା। ଏହାର ଦୀର୍ଘ ଦିନ ପରେ ବର୍ତ୍ତମାନ ବିଏମ୍ସିର କୋଠା ଭଙ୍ଗାଯିବା ଚୂଡାନ୍ତ ନିଷ୍ପତ୍ତିକୁ କିଛି ବ୍ୟବସାୟୀ ସ୍ବାଗତ ଜଣାଇଛନ୍ତି। କିନ୍ତୁ କୋଠା ଭଙ୍ଗା ଯିବା ପରେ ନୂତନ ମାର୍କେଟ କମ୍ପ୍ଲେକ୍ସ ନିର୍ମାଣ ଦିଗରେ ଖୁବ୍ ଶୀଘ୍ର ପଦକ୍ଷେପ ଗ୍ରହଣ କରିବା ପାଇଁ ବହୁ ବ୍ୟବସାୟୀ ଦାବି କରିଛନ୍ତି।