ଭୁବନେଶ୍ୱର,୧୮।୧୧(ବ୍ୟୁରୋ): ସଫେଇକର୍ମୀଙ୍କୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ପକ୍କାଘର ମିଳିବ। ସେମାନେ ରହୁଥିବା ସ୍ଥାନକୁ ୨ ମାସ ଭିତରେ ରାସ୍ତା ଓ ଡ୍ରେନ୍ ନିର୍ମାଣ ହେବ। ସଫେଇ କର୍ମୀଙ୍କ ପିଲାଙ୍କୁ ଉନ୍ନତ ଶିକ୍ଷା ଯୋଗାଇବା ଲକ୍ଷ୍ୟରେ ନୂତନ ଅଙ୍ଗନଓ୍ବାଡ଼ି କେନ୍ଦ୍ର ସ୍ଥାପନ ସହ ଖେଳକୁଦ ପାଇଁ ଏକ ଛୋଟ ପାର୍କ ମଧ୍ୟ କରାଯିବ। ଏନେଇ ପ୍ରାଥମିକ ଭାବେ ବିଏମ୍ସି ପକ୍ଷରୁ ୭.୫ ଲକ୍ଷର ବ୍ୟୟ ଅଟକଳ ଧାର୍ଯ୍ୟ କରାଯାଇଛି। ଜାତୀୟ ସଫେଇ କମିଶନଙ୍କ ସଦସ୍ୟ ପି.ପି. ଭାଭା ସଫେଇ କର୍ମୀଙ୍କ ଆବାସସ୍ଥଳ ଗସ୍ତ ସମୟରେ ବିଏମ୍ସି ପକ୍ଷରୁ ଏହି ପ୍ରତିଶ୍ରୁତି ଦିଆଯାଇଛି।
ଅନୁଯାୟୀ, ବୁଧବାର ଜାତୀୟ ସଫେଇ କମିଶନ ସଦସ୍ୟ ଭାଭା ବାପୁଜୀ ନଗରସ୍ଥିତ କେଦାର ପଲ୍ଲୀରେ ଥିବା ସଫେଇ କର୍ମୀଙ୍କ ଆବାସସ୍ଥଳ ଗସ୍ତ କରିଥିଲେ। ସାମାଜିକ କର୍ମୀ ଅଶ୍ୱିନୀ ମହାପାତ୍ର, ଦେବାଶିଷ ମହାପାତ୍ର ଓ ସଫେଇକର୍ମୀ ମହାସଂଘ ସମ୍ପାଦକ ଗୁରୁବାରୀ ନାୟକ ସଫେଇକର୍ମୀଙ୍କ କ୍ଷେତ୍ରରେ ଥିବା ସମସ୍ୟାଗୁଡ଼ିକୁ ଭାଭାଙ୍କ ଦୃଷ୍ଟିଗୋଚର କରାଇଥିଲେ। ଭାଭା ଏହାର ତୁରନ୍ତ ସମାଧାନ କରିବା ପାଇଁ ନିର୍ଦ୍ଦେଶ ଦେଇଥିଲେ। ଏନେଇ ଖୁବ୍ଶୀଘ୍ର ଏକ କମିଟି ଗଠନ ହେବ। ସେଥିରେ ବିଏମ୍ସିର ବରିଷ୍ଠ ଅଧିକାରୀଙ୍କ ସହ ସଫେଇକର୍ମୀ ଓ କେତେଜଣ ସାମାଜିକ କର୍ମୀ ରହିବେ। ପ୍ରତି ୩ ମାସରେ ଥରେ କମିଟିର ବୈଠକ ହେବ। ସଫେଇକର୍ମୀଙ୍କ କ୍ଷେତ୍ରରେ ଥିବା ସମସ୍ୟା ଓ ତା’ର ସମାଧାନ ନେଇ ଆଲୋଚନା ହେବ। ଏହାକୁ ଜାତୀୟ ସଫେଇ କମିଶନଙ୍କ ସଦସ୍ୟ ତାଙ୍କ ଗସ୍ତ ସମୟରେ ଯାଞ୍ଚ କରିବେ।
