ଖୋର୍ଦ୍ଧା ଅଫିସ,୧୬ା୭: ଜଣେ ବାର୍ କର୍ମଚାରୀଙ୍କୁ ହତ୍ୟା ଘଟଣାରେ ଖୋର୍ଦ୍ଧା ପୋଲିସ ଗୁରୁବାର ୬ ଜଣଙ୍କୁ ଗିରଫ କରିଛି। ସେମାନେ ହେଲେ ଭୁବନେଶ୍ୱର ନୂଆପଲ୍ଲୀ ଅଞ୍ଚଳର ମିକୁ ଓରଫ୍ ମୃତ୍ୟୁଞ୍ଜୟ ନାୟକ, ସାନଭାଇ ଚିକୁ ଓରଫ୍ ଧନଞ୍ଜୟ ନାୟକ, ନୂଆପଲ୍ଲୀ ବେହେରାବସ୍ତିର ଅମିତ ପ୍ରଧାନ, ଗଗନ ଓରଫ ନନ୍ଦନ ବେହେରା, ଖୋର୍ଦ୍ଧା ଦଳେଇପୁଟର ନିଲୁ ଓରଫ ରାକେଶ ସାହୁ ଓ ଲୋକେଶ୍ୱର ପୁରର ବାପିନା ଓରଫ ଦେବକାନ୍ତ ଦାସ । ଗିରଫ ଅଭିଯୁକ୍ତଙ୍କଠାରୁ ପୋଲିସ ଛୁରି, ଏକ ବିଏମ୍ଡବ୍ଲ୍ୟୁ କାର୍, ରକ୍ତଛିଟା ପଡ଼ିଥିବା ଶାର୍ଟ, ବାଇକ୍, ୯ଟି ମୋବାଇଲ ଆଦି ଜବତ କରିଛି। ଏମାନଙ୍କ ବିରୋଧରେ ଭୁବନେଶ୍ବର ନଆପଲ୍ଲୀ ଥାନାରେ ଏକାଧିକ ମାମଲା ରହିଛି ବୋଲି ପୋଲିସ କହିଛି।
ସୂଚନାଯୋଗ୍ୟ, ମଙ୍ଗଳବାର ଅପରାହ୍ନରେ ମିକୁ, ଅମିତ ଓ ଗଗନ ଏକ ବିଏମ୍ଡବ୍ଲ୍ୟୁ ଗାଡି (ଏଚ୍ଆର୨୬-ବିଜି-୧୧୪୫) ନେଇ ନୂଆପଲ୍ଲୀରୁ ବାହାରିଥିଲେ। ଇସ୍କନ ମନ୍ଦିର ନିକଟରେ ଗାଡି ହର୍ନ ମାରିବାକୁ ନେଇ ଗଣ୍ଡଗୋଳ ହେବାରୁ ଦୁଇ ଯୁବକଙ୍କୁ ଛୁରାମାଡ଼ କରିଥିଲେ। ଏଥିରେ ଅବିନାଶ ପ୍ରଧାନ ଗୁରୁତର ହୋଇଥିଲେ । କମିଶନରେଟ ପୋଲିସ ଘଟଣାର ତଦନ୍ତ କରୁଥିବା ବେଳେ ସେମାନେ ଖୋର୍ଦ୍ଧା ଆଡ଼କୁ ଖସି ପଳାଇଥିଲେ। ଏସ୍ପିଙ୍କ ନିର୍ଦ୍ଦେଶରେ ୫ଟି ଟିମ୍ ଗଠନ କରାଯାଇ ଖୋର୍ଦ୍ଧା, ଭୁବନେଶ୍ବର, ପୁରୀ ଓ ନୟାଗଡ ଅଞ୍ଚଳରେ ଚଢ଼ାଉ କରିଥିଲେ। ହତ୍ୟାକାଣ୍ଡ ପରେ ସେମାନେ ଭୁବନେଶ୍ୱର ଫେରିବାକୁ ଚେଷ୍ଟା କରିଥିଲେ। କମିଶନରେଟ ପୋଲିସ ହାତରେ ଧରାପଡ଼ିବା ଭୟରେ ସେମାନେ ନୟଗଡ଼ ଆଡକୁ ପଳାଉଥିଲେ। ବୁଧବାର ରାତିରେ ରଣପୁର ଜଙ୍ଗଲରୁ ୩ ଜଣଙ୍କୁ ଗିରଫ କରାଯାଇଥିବା ବେଳେ ପରେ ଅନ୍ୟମାନଙ୍କୁ କରାଯାଇଥିଲା ବୋଲି ଏସ୍ପିଙ୍କ ଠାରୁ ପ୍ରକାଶ।
