ଭୋପାଳ,୧୦।୧: ମଧ୍ୟପ୍ରଦେଶର ଖରଗୋନ ଜିଲାରେ ଏକ ହୃଦୟ ବିଦାରକ ଘଟଣା ଘଟିଛି। ନର୍ମଦା ନଦୀରେ ୧୧ ଜଣ ଯାତ୍ରୀଙ୍କୁ ନେଇ ଯାଉଥିବା ଏକ ଡଙ୍ଗା ଓଲଟି ପଡ଼ିଛି। ଏଥିରେ ଜଣେ ମହିଳାଙ୍କର ମୃତ୍ୟୁ ଘଟିଥିବା ବେଳେ ଜଣେ ନିଖୋଜ ଅଛନ୍ତି। ଶନିବାର ଡଙ୍ଗା ବୁଡ଼ିବା ଘଟଣାର ଠିକ୍ ପୂର୍ବରୁ ଏକ ଭିଡିଓ ଭାଇରାଲ ହୋଇଥିଲା ଯେଉଁଥିରେ ମହିଳାମାନେ ଡଙ୍ଗାରେ ଡ୍ୟାନ୍ସ କରୁଥିବା ଦେଖିବାକୁ ମିଳିଛି।
ଡଙ୍ଗାରେ କିଛି ମହିଳା ଓଢଣୀ ଉଡ଼ାଇ ଡ୍ୟାନ୍ସ କରୁଥିବା ବେଳେ ଅନ୍ୟ ଏକ ଡଙ୍ଗାରେ ବାଜା ବଜାଉଛନ୍ତି କିଛି ବ୍ୟକ୍ତି। ସେହିପରି ତୃତୀୟ ଡଙ୍ଗାରେ ଶ୍ରଦ୍ଧାଳୁମାନେ ଓଢ଼ଣୀ ଧରି ଡଙ୍ଗାରେ ନାଚିବା ଯୋଗୁ ଭାରସାମ୍ୟ ହରାଇ ଡଙ୍ଗାଟି ଓଲଟି ପଡ଼ିଥିଲା ବୋଲି ଅନୁମାନ କରାଯାଉଛି।
ଡଙ୍ଗା ବୁଡ଼ିବାର ଦ୍ୱିତୀୟ ଦିନରେ ହୀନାଙ୍କ ମୃତଦେହ ମିଳିଥିବା ବେଳେ ଅନ୍ୟ ଜଣେ ଯୁବକ ଜିତେନ୍ଦ୍ର ନିଖୋଜ ଅଛନ୍ତି। ଆଉ ୯ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇ ସେମାନଙ୍କ ଘରକୁ ପଠାଇ ଦିଆଯାଇଛି।