କୋରାପୁଟ,୧୫।୪(ସ୍ବ.ପ୍ର.): କୋରାପୁଟ ଜିଲା ସେମିଳିଗୁଡ଼ା ବ୍ଲକର ରାଜପୁଟ ପଞ୍ଚାୟତର କୋଲାବ ଜଳଭଣ୍ଡାରେ ଗୁରୁବାର ଅପରାହ୍ନରେ ଏକ ଦେଶୀଡଙ୍ଗା ବୁଡ଼ି ଘଟଣାରେ ନିଖୋଜ ଥିବା ୪ ଜଣଙ୍କ ମଧ୍ୟରୁ ରାତିରେ ବବିତା ହନ୍ତାଳଙ୍କ ମୃତଦେହ ମିଳିଥିଲା। ଅନ୍ୟ ନିଖୋଜମାନଙ୍କୁ ଉଦ୍ଧାର କରିବା ଲାଗି ଅଗ୍ନିଶମ ବିଭାଗ ଓଡ୍ରାଫ ଟିମ୍ କର୍ମଚାରୀମାନେ ଖୋଜାଖୋଜି ଜାରି ରଖିଥିଲେ। ଶୁକ୍ରବାର ଅପରାହ୍ନରେ ନିଖୋଜ ୩ ଜଣଙ୍କ ମୃତଦେହ ମିଳିଛି। ସେମାନେ ହେଲେ ରମା ହନ୍ତାଳ, ସାବିତ୍ରୀ ହନ୍ତାଳ ଏବଂ କମୁ ବାଲଡି (୧୮) ବୋଲି ଓଡ୍ରାଫ୍ର ଡେପୁଟି ସୁବେଦାର ଶ୍ରୀନିବାସ ରେଡ୍ଡି କହିଛନ୍ତି। କମୁଙ୍କ ମାଆବାପା କେହି ନାହାନ୍ତି। ସେ ଗ୍ରାମବାସୀଙ୍କ ସହ ଯାତ୍ରା ଦେଖିବାକୁ ଯାଇ ସେମାନଙ୍କ ସହ ଡଙ୍ଗାରେ ଫେରୁଥିଲେ। ରେଡ୍ଡିଙ୍କ ନେତୃତ୍ୱରେ ହାବିଲଦାର ରାଜେଶ ସାହୁ, ହାବିଲଦାର ବିଜୟ ହରିଜନଙ୍କ ସମେତ ଅନ୍ୟମାନେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିଲେ। ଗୁରୁବାର ରାତିରେ ଏହି ଟିମ୍ ବବିତାଙ୍କ ମୃତଦେହ ଜବତ କରିଥିବାବେଳେ ଶୁକ୍ରବାର ଉପରୋକ୍ତ ୨ ମହିଳା ଓ ଜଣେ ଯୁବକଙ୍କ ମୃତଦେହ ଜବତ କରିଛନ୍ତି। ଏହି ମୃତଦେହ ମିଳିବା ପରେ ଡଙ୍ଗାବୁଡ଼ି ଘଟଣାରେ ମୃତ୍ୟୁ ସଂଖ୍ୟା ୪କୁ ବୃଦ୍ଧି ପାଇଛି। ମୃତ୍ୟୁବରଣ କରିଥିବା ପ୍ରତି ବ୍ୟକ୍ତିଙ୍କ ପରିବାରକୁ ଜିଲା ରେଡ୍କ୍ରସ୍ ପକ୍ଷରୁ ସ୍ଥାନୀୟ ତହସିଲଦାରଙ୍କ ଜରିଆରେ ୧୫ ହଜାର ଟଙ୍କା ଲେଖାଏ ସହାୟତା ପ୍ରଦାନ କରାଯାଇଛି। ପଞ୍ଚାୟତ ପକ୍ଷରୁ ମଧ୍ୟ ହରିଶ୍ଚନ୍ଦ୍ର ଯୋଜନାରେ ୨ ହଜାର ଟଙ୍କା ଲେଖାଏ ପ୍ରଦାନ କରାଯାଇଥିବା ଜିଲା ଜରୁରୀ ବିଭାଗ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ଗୁରୁବାର ଅପରାହ୍ନରେ ଲମତାପୁଟ ଉମ୍ବେଲକୁ ଚଇତିଯାତ୍ରା ଦେଖିବା ପାଇଁ ଯାଇ ସେଠାରୁ ନିଜ ଘର ରାଜପୁଟ ପଞ୍ଚାୟତର ମୁଖିବୁଡ଼େଇକୁ ଏକ ଦେଶୀ ଡଙ୍ଗାରେ ୮ ଜଣ ବ୍ୟକ୍ତି ଫେରୁଥିବାବେଳେ କୋଲାବ ଜଳଭଣ୍ଡାରର ତେନ୍ତୁଳିପଡ଼ା ଘାଟ ନିକଟରେ ଡଙ୍ଗାଟି ଭାରସାମ୍ୟ ହରାଇ ବୁଡ଼ିଯାଇଥିଲା। ଫଳରେ ଡଙ୍ଗାରେ ଥିବା ପୂର୍ଣ୍ଣ ମୁଦୁଲି, କବିତା ଜାନି, ମଦନ କାଲପାଡିଆ, ନୀଳା ଜାନି ୪ ଜଣ ପହଁରି ପହଁରି କୂଳକୁ ଆସିଥିଲେ। ଅନ୍ୟ ୪ ଜଣ ପାଣିରେ ବୁଡ଼ି ନିଖୋଜ ହୋଇଯାଇଥିଲେ। ଖବର ପାଇ ସୁନାବେଡ଼ା ଏସ୍ଡିପିଓଙ୍କ ସମେତ ସେମିଳିଗୁଡ଼ା ପୋଲିସ ଓ ଅଗ୍ନିଶମ ବାହିନୀ ପ୍ରଥମେ ଘଟଣାସ୍ଥଳରେ ପହଞ୍ଚତ୍ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ା ପରେ କୋରାପୁଟରୁ ଓଡ୍ରାଫ ଟିମ୍ ଆସି ଏଥିରେ ସାମିଲ ହୋଇଥିଲେ। ମୃତଦେହ ମିଳିବା ପରେ ସମ୍ପୃକ୍ତ ଗ୍ରାମରେ ଶୋକର ଛାୟା ଖେଳାଯାଇଛି। କୋରାପୁଟ ବିଧାୟକ ରଘୁରାମ ପଡ଼ାଲ, ପଟ୍ଟାଙ୍ଗି ବିଧାୟକ ପ୍ରୀତମ ପାଢ଼ୀ ଘଟଣାସ୍ଥଳରେ ପହଞ୍ଚତ୍ ମୃତକଙ୍କ ପରିବାରବର୍ଗକୁ ସମବେଦନା ଜଣାଇଛନ୍ତି।