ଜୟପୁର, ୧୬।୯: ରାଜସ୍ଥାନରେ ବୁଧବାର ସକାଳେ ଏକ ଅଭାବନୀୟ ଘଟଣା ଘଟିଛି। ସ୍ଥାନୀୟ ବୁନ୍ଦି ଅଞ୍ଚଳର ଚନ୍ଦା ଖୁର୍ଦଠାରେ ଥିବା ଚମ୍ବଲ ନଦୀରେ ଏକ ଡଙ୍ଗାରେ ଯାତ୍ରୀମାନେ ଏକୂଳରୁ ସେ କୂଳକୁ ଯାଉଥିବା ସମୟରେ ଅଧାବାଟରେ ଏହା ଓଲଟି ପଡ଼ିଥିଲା। ଲଗାତାର ବର୍ଷା ଯୋଗୁ ନଦୀରେ ଜଳସ୍ତର ବଢ଼ିଥିବାବେଳେ ଯାତ୍ରୀମାନେ ଚାହୁଁ ଚାହୁଁ ବୁଡ଼ି ଯାଇଥିଲେ ବୋଲି ଦେଖଣାହାରୀ କହିଛନ୍ତି। ନଈକୂଳରେ ଥିବା ଲୋକେ ପହଁରି ୨୦-୨୫ ଜଣ ଯାତ୍ରୀଙ୍କୁ ଉଦ୍ଧାର କରିଥିଲେ। ଡଙ୍ଗାରେ କ୍ଷମତାଠାରୁ ଅଧିକ ଯାତ୍ରୀ ଥିବାରୁ ଏହା ନିୟନ୍ତ୍ରଣ ହରାଇ ମଝି ନଦୀରେ ବୁଡ଼ିଯାଇଥିବା ସ୍ଥାନୀୟ ପୋଲିସ କହିଛି। ଖବର ପାଇ ଉଦ୍ଧାରକାରୀ ଦଳ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ୭ ଜଣ ଯାତ୍ରୀଙ୍କ ମୃତଦେହ ଉଦ୍ଧାର କରାଯାଇଛି। ଆହତଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ମୃତାହତଙ୍କ ସଂଖ୍ୟା ବଢ଼ିବାର ଆଶଙ୍କା ଥିବା ପୋଲିସ କହିଛି। ଡ଼ଙ୍ଗାରେ ୪୦ରୁ ଅଧିକ ଜଣ ଯାତ୍ରୀ ଥିଲେ। ୧୦-୧୨ ଜଣ ଯାତ୍ରୀ ନିଖୋଜ ଥିବା କୁହାଯାଉଛି। ନିଖୋଜଙ୍କ ସନ୍ଧାନ ଜାରି ରହିଛି। ଯାତ୍ରୀମାନେ ଇନ୍ଦରଗଡ଼ ଅଞ୍ଚଳରେ ଥିବା କମଳେଶ୍ୱର ମହାଦେବ ମନ୍ଦିରକୁ ଯାଉଥିଲେ ବୋଲି ପୋଲିସ କହିଛି।