ସମ୍ବଲପୁର,୧୩ା୧(ବ୍ୟୁରୋ): ସମ୍ବଲପୁର ଜିଲା ଯୁଯୁମୁରା ବ୍ଲକ ଇକୋଟୁରିଜମ ଦେବଝରଣରେ ବୋଟିଂ ସେବା ଖୁବ୍ଶୀଘ୍ର ଆରମ୍ଭ ହେବ। ବୁଧବାର ଡ୍ୟାମ୍ରେ ବନ ବିଭାଗ ପକ୍ଷରୁ ପ୍ଲାଟଫର୍ମ ନିର୍ମାଣ କରାଯାଇଛି। ଏସିଏଫ୍ ମଦନଲାଲ ଶର୍ମା, ସଦର ରେଞ୍ଜର ଗୌରୀ ଦାସ ଉପସ୍ଥିତ ରହି କାମ ତଦାରଖ କରିଥିଲେ। ଏକ ସପ୍ତାହ ମଧ୍ୟରେ ବୋଟ୍ଗୁଡିକ ଆସିବ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ, ଦେବଝରଣରେ ଜଳପ୍ରପାତ, ଡ୍ୟାମ, ପାର୍କ, ଝରଣା ଆଦି ପର୍ଯ୍ୟଟକଙ୍କୁ ଆକୃଷ୍ଟ କରୁଛି। ଚଳିତମାସରୁ ପର୍ଯ୍ୟଟକମାନେ ଡ୍ୟାମ୍ରେ ନୌକା ବିହାର କରିପାରିବା ନେଇ ଯୋଜନା ଆରମ୍ଭ ହୋଇଛି। ବୋଟ୍ ଚାଳନା ଲାଗି ସ୍ଥାନୀୟ ତାଲଝରଣ, ଗଇଲଗୁଡି ଗ୍ରାମର ଭିଏସ୍ଏସ୍ର ୬ ସଦସ୍ୟଙ୍କୁ ତାଲିମ ଦିଆଯାଇଛି। ଏମାନେ ପୁରୀ ସମୁଦ୍ରରେ ବୋଟ ଚଲାଇବା ସହ ପର୍ଯ୍ୟଟଙ୍କୁ ଦୁର୍ଘଟଣା ସମୟରେ କିଭଳି ଉଦ୍ଧାର କରାଯିବ ସେ ନେଇ ମକ୍ଡ୍ରିଲ କରି ଫେରିଛନ୍ତି। ୨ବର୍ଷ ତଳେ ଦେବଝରଣ ଇକୋଟୁରିଜମ୍ ଘୋଷଣା ପରେ ୱାଚ୍ ଟାୱାର, ପାଦ ଚଲା ପଥର ରାସ୍ତା, ସୁରକ୍ଷା ବାର୍ତ୍ତା ସୂଚନା, ପାଇଖାନା, ନଳକୂପ, ରୋଷେଇ ପିଣ୍ଡି ପ୍ରଭୃତି ଉନ୍ନୟନମୂଳକ କାମ କରାଯାଉଛି।