ସମ୍ବଲପୁର,୧୩ା୩(ବ୍ୟୁରୋ):ରାଜ୍ୟ ସରକାର ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ପର୍ଯ୍ୟଟନସ୍ଥଳୀର ବିକାଶ କରୁଛନ୍ତି। ସମ୍ବଲପୁର ଜିଲାରେ ମଧ୍ୟ ଅଧିକାଂଶ ପର୍ଯ୍ୟଟନ ସ୍ଥଳର ଭିତ୍ତିଭୂମି, ଆନୁଷଙ୍ଗିକ ବ୍ୟବସ୍ଥା କରାଯାଉଛି। ଜିଲାର ଅନ୍ୟତମ ପର୍ଯ୍ୟଟନ ସ୍ଥଳ ହୀରାକୁଦ ଜବାହର ଉଦ୍ୟାନରେ ଏବେ ବୋଟିଂ ସୁବିଧା ଯୋଡିହେବାକୁ ଯାଉଛି। ସମ୍ବଲପୁର ମହାନଗର ନିଗମ ପକ୍ଷରୁ ଏ ନେଇ କାମ ଆରମ୍ଭ ହୋଇଛି। ଉଦ୍ୟାନ ଭିତରେ ଥିବା ପୁରାତନ ପୋଖରୀ କାମର ପୁନଃ ଉଦ୍ଧାର କାମ ଯୁଦ୍ଧକାଳୀନ ଭିତ୍ତିରେ ଚାଲିଛି। ୬ ମାସ ଭିତରେ ଲୋକାର୍ପଣ କରାଯିବ ବୋଲି ଏସ୍ଏମ୍ସି ପକ୍ଷରୁ ସୂଚନା ଦିଆଯାଇଛି। ପୂର୍ବରୁ ଏଠାକୁ ଆସି ପର୍ଯ୍ୟଟକମାନେ ହୀରାକୁଦ ବନ୍ଧର ପାରିପାର୍ଶ୍ୱିକ ଦୃଶ୍ୟ ଦେଖିବା ସହିତ ଜବାହର ଉଦ୍ୟାନ ବୁଲିବାକୁ ଯାଉଥିଲେ। ଜବାହର ଉଦ୍ୟାନ ପରିସରରେ ସୁନ୍ଦର ପାର୍କ, ଏସ୍ଏଚ୍ଜି ଦ୍ୱାରା ପରିଚାଳିତ କଫି ହାଉସ, ଗାନ୍ଧୀ ମିନାର ପର୍ଯ୍ୟନ୍ତ ରୋପ୍-ୱେ ରହିଛି। ବୋଟିଂ ସୁବିଧା ହେଲେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବା ଆଶା କରାଯାଉଛି। ତିନୋଟି ପର୍ଯ୍ୟାୟରେ ପୋଖରୀ ପୁନଃ ଉଦ୍ଧାର କାମ ହେଉଛି। ଏସ୍ଏମ୍ସି ପକ୍ଷରୁ ଏହା ପରିଚାଳିତ ହେବ ବୋଲି ସୂଚନା ଦିଆଯାଇଛି। ସୂଚନାଯୋଗ୍ୟ, ୨୦୦୮-୦୯ ମସିହାରେ ହୀରାକୁଦ ଜଳସେଚନ ବିଭାଗ ପକ୍ଷରୁ ଏହି ପୋଖରୀ ପୁନଃ ଉଦ୍ଧାର କରାଯାଇଥିଲା। ହେଲେ ବୋଟିଂ ବ୍ୟବସ୍ଥା ହୋଇପାରି ନ ଥିଲା। ଜଳସେଚନ ବିଭାଗ ପକ୍ଷରୁ ଅନୁମତି ପ୍ରଦାନ ପରେ ଏସ୍ଏମ୍ସି ଏହାର ରକ୍ଷଣାବେକ୍ଷଣ ଓ ବିକାଶ କାମ ହାତକୁ ନେଇଛି। ପୂର୍ବରୁ ଦୁଇଟି ପର୍ଯ୍ୟାୟରେ ଉକ୍ତ ପୋଖରୀରେ କାମ ହୋଇଥିଲା। ଏବେ ଶେଷ ପର୍ଯ୍ୟାୟରେ କାମ ଚାଲିଛି ଓ ଶୀଘ୍ର ବୋଟିଂ ସେବା ଆରମ୍ଭ ହେବ ବୋଲି ଏସ୍ଏମ୍ସି ଲକ୍ଷ ରଖିଛି।