ପାନିପଥ, ୧୯।୯: ହରିୟାଣାର ଜଣାଶୁଣା କବାଡ଼ି ଖେଳାଳି ସୁରେନ୍ଦ୍ରଙ୍କ ମୃତ୍ୟୁ ହୋଇଛି। ସୁରେନ୍ଦ୍ରଙ୍କ ମୃତ ଦେହ ଏକ ବିଲରୁ ଉଦ୍ଧାର କରାଯାଇଛି। ସୁରେନ୍ଦ୍ର ପାନିପଥର କୁରାନା ଗ୍ରାମର ବାସିନ୍ଦା। ଏକାଧିକ ରାଜ୍ୟରେ ମ୍ୟାଚ୍ ଖେଳି ସୁରେନ୍ଦ୍ର ଅନେକ ପୁରସ୍କାର ଜିତିଛନ୍ତି। ସବୁଠାରୁ ଦୁଃଖଦ ଖବର ହେଉଛି ଏକମାସ ତଳେ ସୁରେନ୍ଦ୍ରଙ୍କ ବଡ଼ ଭାଇଙ୍କ ବିୟୋଗ ହୋଇଥିଲା। ଆଶ୍ଚର୍ଯ୍ୟଜନକ ଭାବେ ତାଙ୍କ ବଡ଼ ଭାଇଙ୍କ ଶବ ମଧ୍ୟ ବିଲରୁ ଉଦ୍ଧାର କରାଯାଇଥିଲା। ସେହିଭଳି ଦେଢ଼ବର୍ଷ ତଳେ ସୁରେନ୍ଦ୍ରଙ୍କ ମା’ଙ୍କ ପରଲୋକ ହୋଇଥିଲା। ଏବେ ସୁରେନ୍ଦ୍ରଙ୍କ ମୃତ୍ୟୁ ପରେ ପରିବାର ଲୋକ ଦୁଃଖରେ ଭାଙ୍ଗି ପଡ଼ିଛନ୍ତି।
ଲୋକଙ୍କ କହିବା କଥା, ସୁରେନ୍ଦ୍ରଙ୍କ କାହା ସହିତ ଶତ୍ରୁତା ନ ଥିଲା। ଜଣେ କ୍ରୀଡ଼ାବିତ୍ ହୋଇଥିବା ହେତୁ ସମସ୍ତଙ୍କ ସହ ଉତ୍ତମ ସମ୍ପର୍କ ଥିଲା। ଶୁକ୍ରବାର ସନ୍ଧ୍ୟାରେ ବିଲକୁ ଯାଇଥିଲେ ମଧ୍ୟ ଆଉ ଫେରି ନ ଥିଲେ। ଏହାପରେ ଖୋଜାଖୋଜି ପରେ ବିଲରୁ ତାଙ୍କ ମୃତ ଦେହ ମିଳିଥିଲା। ପୋଲିସ ଘଟଣାର ତଦନ୍ତ ଚଳାଇଛି। ପରିବାର ଲୋକଙ୍କ ବୟାନ ନେଇ ପୋଲିସ ତଦନ୍ତକୁ ଆଗେଇଛି।