କେନ୍ଦୁଝର, ୧୨ା୪ (ସ୍ବ.ପ୍ର.): ବାଂଶପାଳ ବ୍ଲକ ଅନ୍ତର୍ଗତ କରଙ୍ଗାଡିହି ଗ୍ରାମର ରଙ୍ଗାଧର ମହାକୁଡଙ୍କ ନିଖୋଜ ୮ବର୍ଷର ପୁଅ ଫକିର ମହାକୁଡଙ୍କ ମୃତଦେହ ବୁଧବାର ଉଦ୍ଧାର ହୋଇଛି । ସେ ଗତ ୯ ତାରିଖଠାରୁ ନିଖୋଜ ହୋଇଯାଇଥିଲେ। ତେବେ ଆଜି ତାଙ୍କ ମୃତଦେହ ଘର ଠାରୁ ୫୦୦ ମିଟର ଦୂରରେ ମିଳିଛି । ଗାଁର ୨ ଜଣ ଲୋକ ଛେଳି ଚରାଇବାକୁ ଯାଇଥିବାବେଳେ ବିଲରେ ମୃତଦେହକୁ ଦେଖି ଘର ଲୋକଙ୍କୁ ଜଣାଇଥିଲେ ।
ସ୍ଥାନୀୟ କରଙ୍ଗାଡିହି ସରପଞ୍ଚ ବରୁଣ ଦେହୁରୀ ପୋଲିସକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ସଦର ଏସଡିପିଓ ମହେନ୍ଦ୍ର ନାଥ ହେମ୍ବ୍ରମ,କାଞ୍ଜିପାଣି ଥାନା ଅଧିକାରୀ ସେକ ଆଜାରୁଦ୍ଦିନ ସାଇନଟିଫିକ ଟିମ୍ ସହ ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି । ତେବେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି। ଗତ ୯ତାରିଖ ନିଖୋଜ ପରେ ବାପା, ମାଆ ଏବଂ ଗାଁ ଲୋକ ନିକଟସ୍ଥ ଜଙ୍ଗଲରେ ଖୋଜାଖୋଜି କରି ନ ପାଇବା ପରେ ମଙ୍ଗଳବାର ତାଙ୍କ ବାପା ରଙ୍ଗାଧର କାଞ୍ଜିପାଣି ଥାନାରେ ଏ ସମ୍ପର୍କରେ ଏତଲା ଦେଇଥିଲେ । ପୋଲିସ ପକ୍ଷରୁ ନାବାଳକ ନିଖୋଜ ନେଇ ଏକ ମିସିଂ ରିପୋର୍ଟ କରାଯାଇଥିଲା । ତେବେ ବୁଧବାର ନାବାଳକର ମୃତଦେହ ମିଳିବା ପରେ ହତ୍ୟାକାଣ୍ଡ ନା ଆଉ କିଛି କିଛି କାରଣ ତାହାର ବ୍ୟବଚ୍ଛେଦ ପରେ ଜଣାପଡିବ ବୋଲି ବୋଲି କାଞ୍ଜିପାଣି ଥାନା ଅଧିକାରୀ ସେକ ଆଜାରୁଦ୍ଦିନ ସୂଚନା ଦେଇଛନ୍ତି । କାଞ୍ଜିପାଣି ପୋଲିସ କେସ ନଂ ୩୬/୨୦୨୩ ରେ ଏକ ମାମଲା ରୁଜୁ କରି ଗୁରୁବାର ଶବ ବ୍ୟବଚ୍ଛେଦ କରିବ ବୋଲି ଜଣାପଡିଛି ।
