ପଠାନକୋଟ୍,୧୭।୧୦: ଗତ ଅଗଷ୍ଟ ୩ ତାରିଖରେ ପଞ୍ଜାବର ପଠାନକୋଟ ଜିଲାର ରନ୍ଜୀତ ସାଗର ଡ୍ୟାମରେ ସେନାର ଏକ ହେଲିକାପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା। ସେବେଠାରୁ ହେଲିକାପ୍ଟର ଦ୍ୱିତୀୟ ପାଇଲଟ୍ ନିଖୋଜ ଥିଲେ। ଦୀର୍ଘ ୭୫ ଦିନ ଧରି ସ୍ଥଳସେନା ଓ ନୌସେନା ପକ୍ଷରୁ ସର୍ଚ୍ଚ ଅପରେଶନ ପରେ ମିଳିଛି କ୍ୟାପଟେନ ଜୟନ୍ତ ଯୋଶୀଙ୍କ ମୃତଦେହ।
ଡ୍ୟାମର ବିରାଟ ଆକାର ଓ ଗଭୀରତା କାରଣରୁ ସେନା ଅଧିକାରୀଙ୍କୁ ସର୍ଚ୍ଚ ଅପରେଶନ ବେଳେ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା। ମୃତଦେହକୁ ଖୋଜିବା ପାଇଁ ମଲ୍ଟି ବିମ ସୋନାର ଯନ୍ତ୍ର ମାଧ୍ୟମରେ ପୂରା ଡ୍ୟାମକୁ ସ୍କାନ କରାଯାଇଥିଲା। ସେଥିରୁ ମିଳିଥିବା ତଥ୍ୟକୁ ଭିତ୍ତି କରି ରିମୋର୍ଟ ମାଧ୍ୟମରେ ପରିଚାଳିତ ହେଉଥିବା ଏକ ଗାଡ଼ି ଓ ପେଶାଦାର ଡାଇଭର୍ସମାନେ ଅଞ୍ଚଳରେ ଖୋଜିବା ଆରମ୍ଭ କରିଥିଲେ।
କ୍ୟାପଟେନ ଜୟନ୍ତଙ୍କ ମୃତଦେହକୁ ପାଣିର ୬୫ରୁ ୭୦ ମିଟର ଗଭୀରତାରେ ଠାବ କରାଯାଇଥିଲା। ମୃତଦେହକୁ ପଠାନକୋଟ ସ୍ଥିତ ସେନା ହସ୍ପିଟାଲକୁ ପଠାଇ ଦିଆଯାଇଛି। ଏହି ଦୁର୍ଘଟଣାରେ ଲ୍ୟୁଟନାଣ୍ଟ କଲୋନେଲ ଏ ଏସ୍ ଭରତ ମଧ୍ୟ ପ୍ରାଣ ହରାଇଥିଲେ।
