କେନ୍ଦୁଝର,୪ା୧୨ (ସ୍ବ.ପ୍ର.): କେନ୍ଦୁଝର ଜିଲା ପଣ୍ଡାପଡ଼ା ଥାନା ପୋଲିସ ଶନିବାର ବଡ଼କମଣ୍ଡରା ଗ୍ରାମର ଏକ କୂଅରୁ ନିରଞ୍ଜନ ନାୟକ ବ୍ୟକ୍ତିଙ୍କ ମୃତଦେହ ଜବତ କରିଛି। ତାଙ୍କ ଘର ସ୍ଥାନୀୟ କମଣ୍ଡରାଗ୍ରାମ ସାହିରେ। ସେ ସ୍ଥାନୀୟ ଆଞ୍ଚଳିକ ଉଚ୍ଚ ବିଦ୍ୟାଳୟ, ଧନୁର୍ଜୟପୁରରେ ପିଅନ ଭାବେ କାମ କରୁଥିଲେ। ସେ ଗତ ୨୮ ତାରିଖରୁ ନିଖୋଜ ଥିଲେ।
ପ୍ରକାଶ ଯେ, ଗତ ୨୮ ତାରିଖ ସନ୍ଧ୍ୟାରେ ନିରଞ୍ଜନ ସ୍କୁଲକୁ ସବୁଦିନ ଭଳି ରାତ୍ରିଜଗୁଆଳି ଭାବେ ଯାଇଥିଲେ। ପରଦିନ ଘରକୁ ନ ଫେରିବାରୁ ପରିବାର ଲୋକେ ତାଙ୍କୁ ଖୋଜାଖୋଜି କରିଥିଲେ। କାୈଣସି ସନ୍ଧାନ ନ ପାଇବାରୁ ତାଙ୍କ ସ୍ତ୍ରୀ ଦ୍ରୌପଦୀ ନିରଞ୍ଜନଙ୍କୁ ଅପହରଣ କରାଯାଇଥିବା ନେଇ ପଣ୍ଡାପଡା ଥାନାରେ ଅଭିଯୋଗ କରିଥିଲେ। ପୋଲିସ ଗୁରୁତ୍ୱ ନ ଦେବାରୁ ଗତ ୧ ତାରିଖରେ ତାଙ୍କ ପରିବାର ଲୋକେ କେନ୍ଦୁଝର ଏସ୍ପିଙ୍କ ଦ୍ୱାରସ୍ଥ ହୋଇଥିଲେ। ଶନିବାର ମୃତଦେହ ମିଳିବା ପରେ ପୋଲିସ ବିଶେଷଜ୍ଞ ଦଳ ସହାୟତାରେ ଘଟଣାର ତଦନ୍ତ କରୁଛି। କେନ୍ଦୁଝର ଏସ୍ଡିପିଓ ପି.ଜେ. ଟପୋ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ଜଣଙ୍କୁ ଅଟକ ରଖି ପଚରାଉଚରା କରାଯାଉଥିବା ସେ କହିଛନ୍ତି। ଏନେଇ ଥାନାରେ ଏକ ମାମଲା ରୁଜୁ ହୋଇଛି।